وسك قازاقستان حالىق پارتياسىنىڭ پارتيالىق ءتىزىمىن تىركەدى
بۇگىن ورتالىق سايلاۋ كوميسسياسىنىڭ وتىرىسىندا 2026 جىلعى 23 تامىزعا تاعايىندالعان قازاقستان رەسپۋبليكاسى قۇرىلتايىنىڭ دەپۋتاتتارىن سايلاۋعا «قازاقستان حالىق پارتياسى» قوعامدىق بىرلەستىگىنىڭ پارتيالىق ءتىزىمىن تىركەۋ ماسەلەسى قارالدى.
اعىمداعى جىلعى 9 شىلدەدە ورتالىق سايلاۋ كوميسسياسىنا «قازاقستان حالىق پارتياسى» قوعامدىق بىرلەستىگى پارتيالىق ءتىزىمىن ۇسىنۋعا قاتىستى قۇجاتتارىن تاپسىرعان بولاتىن. ورتالىق سايلاۋ كوميسسياسى سايلاۋ زاڭناماسىنا سايكەس كانديداتتاردىڭ قازاقستان رەسپۋبليكاسى كونستيتۋتسياسى مەن «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭدا بەلگىلەنگەن تالاپتارعا سايكەستىگىن انىقتاۋ راسىمدەرىن جۇرگىزدى.
كۇن تارتىبىندەگى ماسەلە بويىنشا بايانداما جاساعان وسك مۇشەسى اسەل ءجانابىلوۆا كانديداتتارعا زاڭنامادا قويىلاتىن تالاپتار تۋرالى ايتتى. اتاپ ايتقاندا، كانديدات قازاقستان رەسپۋبليكاسىنىڭ ازاماتى بولۋى، سوڭعى 10 جىل بويى قازاقستان رەسپۋبليكاسىنىڭ اۋماعىندا تۇراقتى تۇرۋى جانە جاسى 25-تەن كەم بولماۋى ءتيىس.
«قازاقستان حالىق پارتياسى» 72 ادامنان تۇراتىن پارتيالىق ءتىزىمدى ۇسىندى. ونىڭ ىشىندە 30 كانديدات - ايەلدەر، جاستار جانە مۇگەدەكتىگى بار ادامدار. بۇل جالپى ءتىزىمنىڭ 41,7%-ىن قۇرايدى. زاڭدا بەلگىلەنگەن كۆوتا ساقتالعان. ورتالىق سايلاۋ كوميسسياسىنىڭ ۋاكىلەتتى مەملەكەتتىك ورگاندارعا جولداعان سۇراۋلارىنا سايكەس پارتيالىق تىزىمگە ەنگىزىلگەن تۇلعالاردىڭ قازاقستان رەسپۋبليكاسى كونستيتۋتسياسى مەن «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭ تالاپتارىنا سايكەستىگى تەكسەرىلدى. پارتيالىق تىزىمگە ەنگىزىلگەن بارلىق تۇلعالار زاڭنامادا بەلگىلەنگەن تالاپتارعا سايكەس كەلەدى»، - دەپ تۇيىندەدى ورتسايلاۋكوم مۇشەسى.
اسەل ءجانابىلوۆا سونداي-اق «قازاقستان حالىق پارتياسى» 2023 جىلعى 19 ناۋرىزدا وتكەن قازاقستان رەسپۋبليكاسى پارلامەنتى ءماجىلىسى دەپۋتاتتارىنىڭ سايلاۋىندا سايلاۋشىلاردىڭ 5 پايىزدان استامىنىڭ داۋىسىن العانىن ەسكە سالدى. وسىعان بايلانىستى زاڭعا سايكەس پارتيا سايلاۋ جارناسىن تولەۋدەن بوساتىلادى.
وسك مۇشەلەرى ءتيىستى حاتتامالارعا قول قويعاننان كەيىن 2026 جىلعى 23 تامىزعا تاعايىندالعان قازاقستان رەسپۋبليكاسى قۇرىلتايىنىڭ دەپۋتاتتارىن سايلاۋعا «قازاقستان حالىق پارتياسى» پارتيالىق ءتىزىمىن تىركەۋ تۋرالى قاۋلى قابىلداندى. تىركەلگەن كانديداتتارعا ءتيىستى كۋالىكتەر تابىستالدى.
وتىرىس قورىتىندىسى بويىنشا پارتيا باسشىلىعى ءداستۇرلى بريفينگ بارىسىندا بۇقارالىق اقپارات قۇرالدارى وكىلدەرىنىڭ سۇراقتارىنا جاۋاپ بەردى.
Abai.kz
