ءححىىى الەمدىك فۋتبول چەمپيوناتى اياقتالدى. ءبىز بۇگىن جۇلدەنى ساراپقا سالعان ءتورت ۇزدىك تۋرالى ويىمىزدى تۇيىندەپ، دوپ دوداسىن قورىتىندىلايمىز.

سۋرەت: idman.biz سايتىنان الىندى.

4-ورىن. فرانتسيا (18 ۇپاي، دوپ ايىرماسى 20:10)

چەمپيونات باستالماي تۇرىپ-اق فرانتسيا قۇراماسىن جۇرتشىلىق التىن كۋبوكتان باستى ۇمىتكەردىڭ ءبىرى رەتىندە باعالاعان بولاتىن. ديدە دەشامنىڭ شاكىرتتەرى دوپ دوداسىن سول بولجامدى راستاۋعا ادەيى كىرىسكەندەي وتە ءساتتى باستادى. توپتىق كەزەڭدەگى ءۇش قارسىلاسىنان دا ايقىن باسىم ءتۇستى – سەنەگالدى 3:1, يراكتى 3:0, نورۆەگيانى 4:1 ەسەبىمەن جەڭدى. پلەي-وففتىڭ العاشقى كەزەڭىندە شۆەتسيانى (3:0), 1/8 فينالدا پاراگۆايدى تىزە بۇكتىردى (1:0). شيرەك فينالدا وتكەن چەمپيوناتتىڭ تاڭداۋلى تورتتىگىنە ەنگەن ماروككونى ۇتتى (2:0). جانكۇيەرلەر مەن فۋتبول ماماندارىن كوماندانىڭ اسىرەسە العى شەبىنىڭ ارىندى ويىنى ەرەكشە ءسۇيسىنتتى.

وكىنىشكە قاراي، شابۋىل شەبىنىڭ شەبەرلىگى تالايدى تاڭ قالدىرىپ، تاڭداي قاقتىرعان فرانتسيا قۇراماسى يسپاندارعا قارسى ەشتەڭە ىستەي المادى. ءسويتىپ، فينالعا قول سوزىم قالعاندا ءسۇرىندى. ءۇشىنشى ورىن ءۇشىن بولعان ماتچتا دا ولار تاعى ءبىر ماسقارادان امان قالدى. ءبىرىنشى تايمنان سوڭ 0:4 ەسەبىمەن ويسىراي جەڭىلىپ جاتقان فرانتسيا ەسەپ ايىرماسىن ءسال قىسقارتقان بولدى، بىراق ءبارىبىر تىزە بۇكتى. مباپپە 10 دوپ سوعىپ، دودانىڭ باس مەرگەنى اتاندى، ال وليسە 7 ناتيجەلى پاس شىعارىپ، 1970 جىلدان بەرى بۇزىلماي كەلە جاتقان پەلەنىڭ رەكوردىن جاڭارتتى.

سۋرەت: championat.com سايتىنان الىندى.

3-ورىن. انگليا (19 ۇپاي، 20:12)

الەمدىك دوپ دوداسىنىڭ التىن ءتاجىن كيمەگەنىنە 60 جىل بولعان اعىلشىن كومانداسىن دا ماماندار سوعان قاراماستان چەمپيوندىقتان باستى ۇمىتكەرلەردىڭ قاتارىنا قوسقان ەدى. ويتكەنى «ءۇش ارىستان» «ۇمبەتتەرىندە» كەيىنگى جىلدارى ناعىز تۋرنيرلىك جەڭىسكەر مىنەز بايقالا باستادى، ال بۇل تۇپكى ناتيجەگە دە ءوز اسەرىن تيگىزدى. كەيىنگى بەس ءىرى دودادا انگليا قۇراماسى تاڭداۋلى تورتتىككە تەك ءبىر رەت قانا ەنبەي قالدى (2022). باسقاسىنىڭ بارىندە كوڭىل كونشىتەر كورسەتكىشكە يە بولدى – 4-ورىن (2018), كۇمىس جۇلدە (2021, 2024). مىنە، 2026 جىلى ولار قولا جۇلدەگە قول جەتكىزدى.

راس، توماس تۋحەلدىڭ كومانداسى التىنعا كوپ ءۇمىت ارتقان ەدى. ءتۋرنيردى دە جامان باستاعان جوق. پلەي-وفف ساتىسىندا دا قارسىلاستارىن، فرانتسۋزدار سەكىلدى ايقىن باسىمدىقپەن جەڭبەسە دە، ەرەكشە ەرىك-جىگەر تانىتا ەڭسەرىپ، جارتىلاي فينالعا جەتتى. اسىرەسە مەكسيكامەن (3:2), نورۆەگيامەن (2:1) بولعان ويىندار وڭايعا سوققان جوق. ارگەنتينانى دا ءبىراز ۋاقىت ۇتىپ تۇردى. ءبىر وكىنىشتىسى، وسى ماتچتىڭ سوڭىندا سول بولماشى ناتيجەنى ساقتاپ قالماققا ۇمتىلىپ، جانۇشىرا قورعانۋعا كوشتى. وسى قاتە تاكتيكانىڭ سالدارىنان جەڭىلىپ تىندى. دەگەنمەن قولا جۇلدە ءۇشىن بولعان قىزىقتى ويىنداعى جىگەرلى قيمىلى كوماندانىڭ بولاشاعى بار ەكەنىن اڭعارتقانداي بولدى.

سۋرەت: championat.com سايتىنان الىندى.

2-ورىن. ارگەنتينا (21 ۇپاي، 19:8)

قاتاردا وتكەن الدىڭعى چەمپيوناتتىڭ جەڭىمپازى سول اتاعىن ساقتاپ قالۋ ءۇشىن بارىن سالدى. وسىدان ءتورت جىل بۇرىنعى ءتۋرنيردىڭ ۇزدىك فۋتبولشىلارىنىڭ ءبىرى، «التىن دوپتىڭ» سەگىز دۇركىن يەگەرى، 39 جاستاعى ليونەل مەسسي بۇل جولى دا ءوز كومانداسىنىڭ ناعىز كوشباسشىسى بولدى. الجيرمەن ويىندا حەت-تريك جاسادى، اۆستريا قاقپاسىنا قوس دوپ سوقتى، يوردانيا قاقپاشىسىن دا قاپى قالدىردى. پلەي-وفف كەزەڭىندە دە ارداگەر ويىنشى كومانداسىن جەڭىسكە جەتەلەۋمەن بولدى. كەستە بويىنشا اسا كۇشتى قارسىلاستارمەن جولى تۇيىسپەسە دە، ارگەنتينا قۇراماسىنىڭ ادىمى العا باسقان سايىن قيىنداي ءتۇستى. كابو-ۆەردەنى قوسىمشا ۋاقىتتىڭ سوڭىنا تامان ارەڭ جەڭدى، ەگيپەتتەن ءتىپتى 79-مينۋتقا دەيىن 0:2 ەسەبىمەن ۇتىلىپ جاتتى. تورەشىلەردىڭ شەشىمدەرىنە بايلانىستى بىرنەشە داۋ دا تۋدى. شيرەك فينالدا شۆەيتساريا ون ويىنشىسىمەن-اق مەسسي مەن ونىڭ سەرىكتەرىنە ۇزاق ۋاقىت توتەپ بەردى. جارتىلاي فينالدا ءبىر ساعات بويى جاقسى ويناعان اعىلشىندار كەنەت ءوز باتىلدىقتارىنان وزدەرى شوشىعانداي، ءوز قاقپاسى ماڭىنا توپىرلاي جينالىپ، قورقاسوقتاي قيمىلدادى دا، جەڭىلىپ تىندى.

جاسى قىرىققا تاياعان ءبىر فۋتبولشىنىڭ شابىتى مەن قيمىلىنا وسىنشاما تاۋەلدى بولۋ جانكۇيەر قاۋىم مەن فۋتبول ماماندارى اراسىندا كوپ سۇراق تۋدىردى: «ەگەر مەسسيدىڭ ويىنى جۇرمەسە، كوماندانىڭ تاعدىرى نە بولماق؟». بۇل ءسات تە كوپ كۇتتىرمەدى: فينالدا مەسسيدىڭ عانا ەمەس، بۇكىل ارگەنتينالىقتاردىڭ اياعىنا دۇرىستاپ دوپ تيگەن جوق. دوپ تيگەننىڭ وزىندە شابۋىل ۇيىمداستىرماق تۇگىلى، ونى ويلاۋعا مۇمكىندىگى بولمادى. يسپاندار لەزدە دوپتى تارتىپ الىپ، قارسى شابۋىلعا شىعىپ وتىردى.

ناتيجەدە تاريحتا تۇڭعىش رەت فينالدىق ماتچتا ءبىر كوماندا 90 مينۋت بويىنا قارسى قاقپاعا ءبىر رەت تە سوققى جاساي العان جوق. 120 مينۋتتا 2 سوققى جاسادى، بىراق ەكەۋى دە دالاعا كەتتى. مۇنداي ويىنمەن چەمپيوندىق اتاقتى ساقتاپ قالۋ قيىن ەدى.

سۋرەت: gazeta.uz سايتىنان الىندى.

1-ورىن. يسپانيا (22 ۇپاي، 14:1)

يسپاندار سەگىز ويىندا ءوز قاقپاسىنا ءبىر-اق رەت گول جىبەرىپ، رەكورد جاسادى. بۇل جەردە كوماندانىڭ ۇيىمداسا قورعانۋ ءادىسىن شەبەر مەڭگەرگەنىنە ءمان بەرگەن ءجون. جاڭا الەم چەمپيوندارىنىڭ قورعانىسى ورتالىق قورعاۋشى ەمەريك لياپورتتان دا، جارتىلاي قورعاۋشى، كاپيتان رودريدەن دە ەمەس، سوناۋ ورتالىق شابۋىلشى ميكەل ويارسابالدىڭ وزىنەن باستالادى. كوماندالىق پرەسسينگ كۇشتى. دوپتان ايرىلىپ قالا سالا ولار بىردەن قارسىلاستى ۇجىمداسا قىسىمعا الادى دا، لەزدە قايتادان تارتىپ الا قويادى. ۋناي سيمون قورعاعان قاقپاعا قاۋىپتىڭ ءسال سيرەكتەۋ ءتونۋىنىڭ سەبەبىن وسى توڭىرەكتەن ىزدەگەن ابزال بولار.

چەمپيوناتتىڭ ۇزدىك فۋتبولشىسى (رودري ەرناندەس) مەن ۇزدىك جاس ويىنشىسى دا (پاۋ كۋبارسي) وسى جاڭا چەمپيوندار ساپىنان شىقتى. ءبىر قىزىعى، فرانتسۋزدار نەگىزىنەن مباپپە مەن وليسەگە سەنىم ارتسا، ارگەنتينالىقتار مەسسيدى ءپىر تۇتسا، اعىلشىندار كەين مەن بەللينگەمنىڭ شەبەرلىگىنە سۇيەنسە، يسپاندىقتار كوماندالىق ويىنعا جۇگىندى. جاڭا جەڭىمپاز ساپىندا مەسسي، مباپپە، كەين سەكىلدى جىل سايىن «التىن دوپتان» ۇمىتكەر سانالاتىن سۋپەرجۇلدىزدار جوق. ارينە، لامين يامال بار، بىراق، بىرىنشىدەن، ول جاراقاتىنان تولىق ايىعىپ، ناعىز بابىنا ەنە الماۋىنا بايلانىستى بۇل دودادا ءسال سولعىنداۋ وينادى، ەكىنشىدەن، 19 جاسقا كەشە عانا تولعان جاس تالانتتىڭ بولاشاعى ءالى الدا سەكىلدى.

يسپانيا قۇراماسى التىن كۋبوكتى جەكەلەگەن جۇلدىزدارىنىڭ ەمەس، وتە ۇيىمشىل كوماندالىق ويىنىنىڭ ارقاسىندا جەڭىپ الدى. بۇل ۇجىمنىڭ ويىنىنا قاراپ وتىرىپ، جىلىنا ءتورت-بەس رەت قانا باس قوساتىن ۇلتتىق قۇراما ەمەس، جىل ون ەكى اي بىرگە جاتتىعاتىن كلۋبتىق كوماندا ويناپ جاتقانداي اسەردە قالاسىز. فۋتبولشىلاردىڭ ءبىر-بىرىمەن ۇجىمداسا ويناۋى، كوزدى جۇمىپ تۇرىپ-اق ءبىر-ءبىرىن ءدال تابا الاتىنداي ۇيىمشىلدىعى، قارسىلاسقا دوپ بەرمەي قۇر سابىلتۋى، الاڭ ورتاسىندا قىسقا دا ورتا قاشىقتىقتاعى پاستارمەن وزگەشە ورنەك سىزۋى، قارسى كوماندانىڭ قىسىمىنان وسىنداي پاس الماسۋمەن، تەحنيكالىق شەبەرلىكتىڭ كومەگىمەن لەزدە شىعىپ كەتە الۋى، ت.ب. ەرەكشەلىكتەرى – تالاي ەڭبەكتىڭ، مىڭ سىپىرىلعان ماڭداي تەردىڭ ناتيجەسى.

بۇل جەردە ءبىز باس باپكەر لۋيس دە لا فۋەنتەنىڭ شەبەرلىگىن اتاپ ءوتۋىمىز كەرەك. وسى ويارسابال، ولمو، رودري، رۋيس، سيمون، مەرينو سەكىلدى ساڭلاقتاردى ول 16-17 جاستاعى ورىمدەي شاقتارىنان بەرى جاقسى بىلەدى، ويتكەنى سەنور لۋيس كەزىندە يسپانيانىڭ جاسوسپىرىمدەر، سوسىن جاستار قۇراماسىن جاتتىقتىرىپ، ەكى رەت ەۋروپا چەمپيونى اتانعان. توكيو وليمپياداسىندا كۇمىس جۇلدە يەلەنگەن. ياعني بۇل جىگىتتەردى، يسپان فۋتبولىنىڭ جاڭا ءداۋىرىن باستاعان دارىنداردى باپكەر بالا كەزىنەن باسىنان سيپاپ، تاربيەلەپ كەلەدى. بۇلارعا لامين يامال، پاۋ كۋبارسي، نيكو ۋيليامس سەكىلدى بوزبالالار، فەرران توررەس، مارك كۋكۋرەليا، پەدرو پوررو ءتارىزدى مايتالماندار قوسىلىپ وتىر. وسىدان ەكى جىل بۇرىن گەرمانيا، فرانتسيا، انگليا سەكىلدى مىقتىنىڭ بارىنەن باسىم ءتۇسىپ، تاماشا ستيلدە ەۋروپا چەمپيونى اتانعان «قىزىل فۋريانىڭ» نەگىزىنەن دە وسى جىگىتتەر قۇراعان بولاتىن. بۇلار بيىل دا كىل مىقتىلاردى شەتىنەن جايپادى – پورتۋگاليا، بەلگيا، فرانتسيا، ارگەنتينا... جەڭسەڭ، وسىلاي جەڭ!

بۇل بۇل ما، 2022 جىلى ارگەنتينا قۇراماسىن الەم چەمپيونى ەتكەن، بيىل دا فينالعا سۇيرەپ شىعارعان باس باپكەر ليونەل سكالوني دە – وسى دە لا فۋەنتەنىڭ شاكىرتى ەكەن. دەمەك، بۇل جولى ۇستاز شاكىرتىنە فۋتبول ساباعىن ۇيرەتتى دەۋگە بولادى.

شەشۋشى گولدىڭ اۆتورى فەرران توررەستى جانكۇيەرلەر دە، سپورت ماماندارى دا، ءتىپتى فۋتبولشىنىڭ ءوز اتاسى دا «وفسايدقا كىرىپ كەتە بەرەدى»، «گول سوعار ۇرىمتال ءساتتى دۇرىس پايدالانا المايدى»، «ءبۇيتىپ ماسقارا بولعانشا، دوپ تەبۋدى قويسا قايتەدى» دەپ سىناي بەرەتىن. مىنە، قاقپاسىن وتە جاقسى قورعاعان ارگەنتينالىق قاقپاشى ەميليانو مارتينەستى اقىرىندا سول ەڭ كوپ سىنالعان شابۋىلشى قاپى قالدىردى. يسپان كومانداسىنا التىن كۋبوكتى فەرران توررەستىڭ ءدال سوققىسى اپەردى!

بۇعان دەيىن فينالدىق ماتچتا جاس ايىرماشىلىعى 20 جاس بولاتىن فۋتبولشىلار ءبىر-بىرىنە قارسىلاس بولماعان ەكەن. 39 جاستاعى مەسسي مەن 19-عا كەشە تولعان يامال وسىلاي رەكورد جاسادى. التى بىردەي الەم چەمپيوناتىنا قاتىسقان، ءۇش رەت فينالدا ويناعان مەسسي – فۋتبول تاريحىندا ماڭگى قالار قاھارمان. بىراق بۇل جولى مول تاجىريبە ەمەس، جاستىق جىگەر جەڭدى (يسپانيا – وسى چەمپيوناتتا التىن جۇلدەدەن ۇمىتكەر سانالعان ۇزدىك كوماندالار اراسىندا ەڭ جاس ۇجىم).

ساكەن سىبانباي

Abai.kz