كقك تەڭىز تەرمينالى ماڭىنداعى ەكى تانكەرگە درونمەن شابۋىل جاسالدى. اقپاراتتى كاسپي قۇبىر كونسورتسيۋمىنىڭ ءباسپاسوز قىزمەتى تاراتتى. 

كقك تەڭىز تەرمينالى ماڭىنداعى تانكەرلەرگە درونمەن شابۋىل جاسالدى، دەپ حابارلايدى inbusiness.kz سايتى.

وقيعا 30 شىلدەدە ماسكەۋ ۋاقىتىمەن ساعات 01:48-دە تىركەلدى.

"مارشالل ارالدارىنىڭ تۋى استىندا جۇزەتىن "NIFFOS SIFNOS" تانكەرىنە تەررورلىق شابۋىل جاسالدى. كەمە "تەڭىزشەۆرويل" جشس-ءنىڭ (Chevron كومپانياسى) مۇنايىن تيەۋ ءۇشىن كاسپي قۇبىر كونسورتسيۋمىنىڭ (كقك) ۆپۋ-3 قاشىقتاعى تيەۋ قۇرىلعىسىندا تۇرعان.

شابۋىل بارىسىندا ۇشقىشسىز ۇشۋ اپپاراتتارى (دروندار) تانكەردىڭ جۇك پالۋباسىنداعى مۇناي قابىلداۋ قۇرىلعىلارى ورنالاسقان ايماققا سوققى جاساعان. سونىڭ سالدارىنان ءورت شىققان", – دەپ حابارلادى كاسپي قۇبىر كونسورتسيۋمىنىڭ ءباسپاسوز قىزمەتى.

ءورت تانكەر ەكيپاجى مەن كقك-نىڭ ءۇش كومەكشى كەمەسىنىڭ قاتىسۋىمەن ءسوندىرىلدى.

"وقيعا سالدارىنان كقك قىزمەتكەرلەرى مەن مەردىگەر ۇيىمداردىڭ ماماندارى اراسىندا زارداپ شەككەندەر جوق. مۇنايدىڭ تەڭىزگە توگىلۋىنە جول بەرىلگەن جوق. تانكەر ەكيپاجىنا مەديتسينالىق كومەك كورسەتۋ نەمەسە ەۆاكۋاتسيالاۋ قاجەتتىلىگى تۋىنداماعان. كەمە ءجۇزۋ قابىلەتىن ساقتاپ قالعان، قازىر كەلتىرىلگەن زالالدىڭ كولەمى باعالانىپ جاتىر. مۇناي تيەۋ ۋاقىتشا توقتاتىلدى، الايدا مۇناي قۇبىرىنىڭ قالعان نىساندارى قالىپتى رەجيمدە جۇمىسىن جالعاستىرىپ جاتىر", – دەلىنگەن حابارلامادا.

سونىمەن قاتار مەن ارالىنىڭ تۋى استىندا جۇزەتىن "MARATHI" تانكەرىنە دە شابۋىل جاسالعانى ايتىلدى. بۇل كەمە كقك تەرمينالىنا مۇناي تيەۋ ءۇشىن باعىت العان بولاتىن.

Abai.kz