قازاقستان رەسپۋبليكاسىنىڭ ەنەرگەتيكا ءمينيسترى ەرلان اقكەنجەنوۆ امەريكا قۇراما شتاتتارىنىڭ قازاقستانداعى توتەنشە جانە وكىلەتتى ەلشىسى دجۋلي ستاففتپەن كەزدەسۋ وتكىزدى، دەپ حابارلايدى BAQ.KZ ەنەرگەتيكا مينيسترلىگىنە سىلتەمە جاساپ. 

كەزدەسۋ بارىسىندا تاراپتار ەنەرگەتيكا سالاسىنداعى ەكىجاقتى ىنتىماقتاستىقتىڭ كەڭ اۋقىمدى ماسەلەلەرىن تالقىلاپ، قازاقستان مەن اقش اراسىنداعى ستراتەگيالىق ارىپتەستىكتى ودان ءارى نىعايتۋعا ءوزارا مۇددەلىلىگىن راستادى.

- وڭىرلىك ەنەرگەتيكالىق قاۋىپسىزدىكتى قامتاماسىز ەتۋ، ەكسپورتتىق ينفراقۇرىلىمنىڭ سەنىمدى جۇمىس ىستەۋى جانە الەمدىك نارىقتارعا ەنەرگيا رەسۋرستارىن تۇراقتى جەتكىزۋ ماسەلەلەرىنە ەرەكشە نازار اۋدارىلدى. كەزدەسۋ قورىتىندىسى بويىنشا تاراپتار ءوزارا ءتيىمدى ىنتىماقتاستىقتى دامىتۋعا، ينۆەستيتسيالار تارتۋعا جانە ەنەرگەتيكا سالاسىنداعى بىرلەسكەن باستامالاردى ىسكە اسىرۋعا باعىتتالعان ستراتەگيالىق ەنەرگەتيكالىق ارىپتەستىك اياسىنداعى بەلسەندى ديالوگتى جالعاستىرۋعا دايىن ەكەندىكتەرىن راستادى، - دەپ حابارلادى ەنەرگەتيكا مينيسترلىگىنىڭ ءباسپاسوز قىزمەتى.

ەسكە سالايىق، بۇعان دەيىن قازاقستان مەن اقش بىرلەسكەن عىلىمي-ينجينيرينگتىك ورتالىقتار اشۋى مۇمكىن ەكەنى حابارلاندى.

Abai.kz