قوعامدىق ساياسات ينستيتۋتى ساۋالناماسىنىڭ ناتيجەلەرى 2026 جىلعى 23 تامىزدا وتەتىن قۇرىلتاي سايلاۋى تۋرالى حالىقتىڭ حاباردار بولۋ دەڭگەيى جوعارى ەكەنىن كورسەتەدى.

زەرتتەۋ دەرەكتەرىنە سايكەس، رەسپوندەنتتەردىڭ 89,4% الداعى سايلاۋ تۋرالى حاباردار («ءسىز 2026 جىلعى 23 تامىزدا قۇرىلتاي سايلاۋى وتەتىنى تۋرالى بىلەسىز بە؟»): 55,2% سايلاۋ تۋرالى تولىق حاباردار ەكەنىن، تاعى دا 34,2% سايلاۋ تۋرالى ەستىگەنىن، بىراق ەگجەي-تەگجەيلى بىلمەيتىنىن مالىمدەدى.

قۇرىلتاي سايلاۋى تۋرالى حاباردار بولۋ دەڭگەيى رەسپوندەنتتەردىڭ جاس ەرەكشەلىگىنە تىكەلەي ستاتيستيكالىق تاۋەلدى ەكەنى بايقالادى: رەسپوندەنتتىڭ جاسى ۇلعايعان سايىن ونىڭ سايلاۋ تۋرالى حاباردار بولۋ دەڭگەيى دە ارتا تۇسەدى. سايلاۋ تۋرالى حاباردار بولۋ دەڭگەيى اۋىل تۇرعىندارى اراسىندا جوعارى.

الەۋەتتى ەلەكتورالدى بەلسەندىلىك كورسەتكىشى دە ازاماتتاردىڭ داۋىس بەرۋگە دايىندىق دەڭگەيىنىڭ جوعارى ەكەنىن كورسەتەدى. زەرتتەۋ ناتيجەلەرىنە سايكەس، رەسپوندەنتتەردىڭ 72,3% قۇرىلتاي سايلاۋىنا قاتىسۋعا نيەتتى ەكەنىن مالىمدەدى («ءسىز 2026 جىلعى 23 تامىزدا وتەتىن قۇرىلتاي سايلاۋىندا داۋىس بەرۋدى جوسپارلاپ وتىرسىز با؟»). سونىمەن قاتار، رەسپوندەنتتەردىڭ 11,9% داۋىس بەرۋگە قاتىسۋدى جوسپارلامايتىنىن مالىمدەدى. ال 15,8% ءالى ناقتى شەشىم قابىلداماعان، ونىڭ ىشىندە جاۋاپ بەرۋگە قينالعان رەسپوندەنتتەردىڭ 0,5%-ى بار.

الەۋەتتى ەلەكتوراتتىڭ باستى ەرەكشەلىكتەرىنىڭ ءبىرى ونىڭ ساباقتاستىعى بولىپ وتىر. اتاپ ايتقاندا، سايلاۋعا قاتىسۋعا نيەتتى رەسپوندەنتتەردىڭ 87,6% 2026 جىلعى 15 ناۋرىزدا وتكەن جاڭا كونستيتۋتسيانى قابىلداۋ جونىندەگى رەسپۋبليكالىق رەفەرەندۋمعا دا قاتىسقان («ءسىز تومەندە كورسەتىلگەن سايلاۋ ناۋقاندارىنىڭ قايسىسىنا قاتىستىڭىز/داۋىس بەردىڭىز؟»). بۇل ەلدەگى نەگىزگى ساياسي ناۋقاندارعا ۇنەمى قاتىساتىن ازاماتتاردىڭ تۇراقتى توبى قالىپتاسقانىن كورسەتەدى.

سايلاۋعا قاتىسۋعا نيەتتى ازاماتتاردىڭ ەلەكتورالدىق تاڭداۋى بويىنشا «ادىلەت» پارتياسى الدا كەلەدى. اتالعان پارتياعا رەسپوندەنتتەردىڭ 67,3% داۋىس بەرۋگە دايىن ەكەنىن ءبىلدىردى («ءسىز قۇرىلتاي سايلاۋىندا قاي پارتياعا داۋىس بەرەسىز؟»). پارتيانى قولداۋ دەڭگەيى 36-60 جاستاعى رەسپوندەنتتەر، اۋىل تۇرعىندارى اراسىندا جوعارى ەكەنى بايقالادى. اتاپ وتەرلىگى، وسى پارتيانى قولدايتىندار سايلاۋعا قاتىسۋعا نيەتتى رەسپوندەنتتەر اراسىندا شوعىرلانعان.

ەكىنشى ورىنعا 6,2% ناتيجەسىمەن «اۋىل» پارتياسى ورنالاستى. ءارى قاراي «Respublica» – 5,5%، «اق جول» – 4,8%، جسدپ – 4,3%، قحپ – 3,9%، «بايتاق» – 1,1%  كورسەتكىشتەرىمەن جايعاستى.

ال رەسپوندەنتتەردىڭ 1,6% بارلىق پارتيالارعا قارسىمىن دەپ داۋىس بەرۋدى نيەت ەتسە، 5,3% ءالى شەشىم قابىلداماعانىن ايتتى.

تالداۋ ناتيجەلەرى پارتيانى تاڭداۋعا ىقپال ەتەتىن نەگىزگى فاكتور («جوعارىدا كورسەتىلگەن پارتيالاردىڭ بىرىنە داۋىس بەرۋىڭىزگە نەگىزگى سەبەپ قانداي؟»، رەسپوندەنتتىڭ بىرنەشە جاۋاپ نۇسقاسىن تاڭداۋ مۇمكىندىگى بولدى) –  ونىڭ باستامالارىنا بەرىلەتىن وڭ باعا ەكەنىن كورسەتتى، بۇل جاۋاپتى  رەسپوندەنتتەردىڭ 44,4% تاڭداعان، ەكىنشى ورىندا – رەسپوندەنتتەردىڭ بەلگىلى ءبىر پارتيامەن تۇراقتى بايلانىستى سەزىنۋى ( «مەن – وسى پارتيانىڭ جاقتاسىمىن» – 29,2%). ودان كەيىن «قازاقستاننىڭ كەلەشەگى وسى پارتيامەن بايلانىستى» (25,3%) جانە «پارتيانىڭ سايلاۋشىلارمەن جۇمىس ىستەۋ ءتاسىلى ماعان ۇنايدى» (14,7%) دەگەن پىكىر ءجيى كەزدەسەدى.

جالپى العاندا، زەرتتەۋ ناتيجەلەرى ازاماتتاردىڭ الداعى قۇرىلتاي سايلاۋىنا دەگەن ىنتاسىنىڭ جوعارى دەڭگەيدە ەكەنىن جانە ەلەكتورالدىق جۇمىلدىرۋدىڭ جەتكىلىكتى دارەجەدە قالىپتاسقانىن كورسەتەدى.

ساۋالنامانى قوعامدىق ساياسات ينستيتۋتى 2026 جىلعى 7-27 شىلدە ارالىعىندا ۇلتتىق رەپرەزەنتاتيۆتى ىرىكتەمە نەگىزىندە جۇرگىزدى. ىرىكتەمە كولەمى – 18 جاستان اسقان 8000 رەسپوندەنت (17 وبلىس، استانا، الماتى، شىمكەنت قالالارى). ىرىكتەمە قاتەلىگى – ±1,19%. دەرەكتەردى جيناۋ ءادىسى – جاپپاي ساۋالناما (face-to-face). قوعامدىق ساياسات ينستيتۋتى دەرەكتەردى قر «قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭىنا سايكەس قر ورتالىق سايلاۋ كوميسسياسىن 2026 جىلعى 4 شىلدەدەگى № KQ--26/14 جازباشا حاباردار ەتۋ نەگىزىندە جاريالايدى.

Abai.kz