23 تامىزدا قازاقستاندا قۇرىلتاي دەپۋتاتتارىنىڭ سايلاۋى وتەدى، وعان جەتى تىركەلگەن ساياسي پارتيا قاتىسادى. سايلاۋ قارساڭىندا پارتيالار اراسىنداعى ساياسي باسەكەلەستىك تە كۇشەيدى. ال سايلاۋدى بايقاۋشى «حالىق ءۇنى» تاۋەلسىز بايقاۋشىلار توبى ەلىمىزدىڭ بىرقاتار وڭىرىندە بايقاۋشىلاردى دايارلاپ، وڭىرلىك شتابتار قۇرۋدى جالعاستىرۋدا.

«حالىق ءۇنى» تاۋەلسىز بايقاۋشىلار توبىنىڭ وكىلدەرى – نۇربولات نىشانباي، دوس كوشىم، نۇرگەلدى ابدىعاني قىزىلوردا، تۇركىستان، شىمكەنت، تاراز، تالدىقورعان قالالارىنا ساپارلاپ بارىپ، تاۋەلسىز بايقاۋشىلارمەن كەزدەستى.

ساپار بارىسىندا بولاشاق بايقاۋشىلارعا ارنالعان وقىتۋ سەمينارى ۇيىمداستىرىلىپ، سايلاۋ پروتسەسىندەگى قۇقىقتىق نورمالار مەن بايقاۋشىنىڭ قۇقىقتارى مەن مىندەتتەرى جان-جاقتى ءتۇسىندىرىلدى.

وقىتۋ بارىسىندا تاجىريبەلى ماماندار بايقاۋشىلاردىڭ سايلاۋ كۇنى زاڭ تالاپتارىن ساقتاي وتىرىپ جۇمىس ىستەۋىنىڭ ماڭىزدىلىعىنا ەرەكشە توقتالدى. سەميناردا ناقتى تاجىريبەلىك جاعدايلار تالدانىپ، قاتىسۋشىلاردىڭ سۇراقتارىنا جاۋاپ بەرىلدى.

«ءبىزدىڭ ميسسيامىز قانداي دا ءبىر ساياسي پارتيانى نەمەسە كانديداتتى قولداۋ ەمەس. ءبىزدىڭ مىندەتىمىز – ءاربىر داۋىستىڭ زاڭعا سايكەس سانالۋىنا، سايلاۋدىڭ اشىق تا ءادىل وتۋىنە جانە سايلاۋ پروتسەسىنە قاتىسۋشىلاردىڭ بارلىعى تەڭ جاعدايدا بولۋىنا ىقپال ەتۋ»، - دەيدى توپ مۇشەلەرى.

نۇربولات نىشانباەۆ:

«سوڭعى ءۇش جىلدا پىكىرلەس ارىپتەستەرىمىزبەن بىرگە ەلىمىزدەگى بىرقاتار ماڭىزدى ساياسي ناۋقاندارعا بەلسەندى قاتىسىپ كەلەمىز. جالپى، دەموكراتيالىق ينستيتۋتتاردىڭ ورنىعۋى ءۇشىن تاۋەلسىز قوعامدىق باقىلاۋ مادەنيەتىنىڭ قالىپتاسۋى اسا ماڭىزدى دەپ ەسەپتەيمىن. وسى باعىتتا كاسىبي مامان ءارى ازامات رەتىندە ءوز ۇلەسىمىزدى قوسىپ كەلەمىز. ماقساتىمىز، سايلاۋ پروتسەسىنىڭ دەموكراتيالىق قاعيداتتارعا، زاڭ تالاپتارىنا جانە حالىقارالىق ستاندارتتارعا ساي وتۋىنە قوعامدىق باقىلاۋ جاساپ، ازاماتتىق جاۋاپكەرشىلىگىمىز بەن كاسىبي تاجىريبەمىز ارقىلى ەلىمىزدەگى دەموكراتيالىق ينستيتۋتتاردىڭ نىعايۋىنا ءوز ۇلەسىمىزدى قوسۋ»، - دەيدى.

Abai.kz