قۇرىلتاي سايلاۋى قارساڭىندا چەحيانىڭ Free Eurasia.com باسىلىمىنىڭ باس رەداكتورى يسلام تەكۋشەۆ قازاقستانعا كەلدى. «قازاقستان جانە جاڭا ەۋرازيالىق لاندشافت: ستراتەگيالىق سەرىكتەستىكتەر، ءوزارا بايلانىس جانە ەكونوميكالىق مۇمكىندىكتەر» تاقىرىبىندا وتكەن دوڭگەلەك ۇستەل اياسىندا ول ەلدەگى ساياسي وزگەرىستەر مەن ءبىرپالاتالى پارلامەنتكە ءوتۋ پروتسەسىنە قاتىستى پىكىر ءبىلدىردى.

ول قازاقستانعا بىرنەشە رەت كەلىپ، جۋرناليست رەتىندە ەلدەگى ساياسي وقيعالاردى ۇزدىكسىز جاريالاپ وتىرعانىن اتاپ ءوتتى. ساراپشىنىڭ پىكىرىنشە، قازاقستانداعى ساياسي وزگەرىستەردىڭ قاجەتتىلىگى، سونىڭ ىشىندە، الەمدە ورىن الىپ جاتقان جاھاندىق ۇدەرىستەرمەن دە بايلانىستى.

«سوڭعى بىرنەشە جىلدا الەمدەگى قوعامدىق-ساياسي جاعداي تۇبەگەيلى وزگەردى. ورتالىق ازيا ەلدەرى ءۇشىن ەكونوميكالىق تا، ساياسي دا جاڭا سىناقتار مەن قاتەرلەر پايدا بولدى.

وسىنداي جاھاندىق جاعدايدا قازاقستاننىڭ بۇرىنعى مەملەكەتتىك باسقارۋ جۇيەسى زامان تالابىنا تولىق جاۋاپ بەرە المادى. ونى وزگەرتۋ قاجەتتىلىگى تۋىندادى. بىزدىڭشە، بيلىكتىڭ قارقىندى قۇبىلىپ جاتقان سىن-قاتەرلەرگە جەدەل ارەكەت ەتۋىنە مۇمكىندىك بەرۋ ءۇشىن كونستيتۋتسيانى وزگەرتۋگە، ەڭ الدىمەن، وسى جايت نەگىز بولدى»، - دەدى ساراپشى.

قازاقستاننىڭ ءبىرپالاتالى پارلامەنتكە كوشۋى تۋرالى ءسوز قوزعاعان تەكۋشەۆ بۇل بۇرىلىستىڭ باستى ماقساتتارىنىڭ ءبىرى — زاڭ شىعارۋشى ورگاننىڭ تيىمدىلىگىن ارتتىرۋ ەكەنىن ايتتى.

«بۇل قادامنىڭ ساياسي جۇيەگە ناقتى قالاي اسەر ەتەتىنىن كەسىپ ايتۋ قيىن. مەنىڭ ۇعۋىمشا، مۇنداعى باستى يدەيا — زاڭ شىعارۋ دەڭگەيىندەگى ۇدەرىستەرگە جىلدام ىقپال ەتىپ، جەدەل ارەكەت ەتۋى ءۇشىن پارلامەنتتىڭ پارمەندىلىگى مەن پارتيالاردىڭ وكىلدىگىن ارتتىرۋ. ونىڭ ناتيجەسىن ۋاقىت كورسەتەدى»، - دەدى ساراپشى.

Abai.kz