كەيىنگى كۇندەرى الەۋمەتتىك جەلىدە ونەرتانۋشى، ءداستۇرلى ءانشى ەرلان تولەۋتاي «قازاقفيلمنىڭ» جەرىنە قاتىستى بىرقاتار ماسەلە كوتەرىپ، جازبا جاريالادى. ونەر قايراتكەرى الماتى قالاسى اكىمدىگىنىڭ «قازاقفيلم» اۋماعىنا «كينەماتوگرافيستەر پاركىن» سالۋ باستاماسىنا قارسى شىعىپ، نازارىلىعىن ءبىلدىردى.

وسى ماسەلەنىڭ انىق-قانىعىن ءبىلۋ ماقساتىندا پرەمەر-ءمينيستردىڭ ورىنباسارى – قازاقستان رەسپۋبليكاسىنىڭ مادەنيەت جانە اقپارات ءمينيسترى ايدا بالاەۆاعا ساۋال قويدىق...

«ەرلان تولەۋتاي اعامىزدى ۇلتتىق ونەردىڭ دامۋىنا زور ۇلەس قوسىپ جۇرگەن ازامات رەتىندە جاقسى بىلەمىز. الايدا ەل اعاسىنا اينالعان ازاماتتىڭ بۇل داۋداعى ماقساتىن ەش تۇسىنە الماي-اق قويدىم. ماعان دەگەن جەكە باس ارازدىعى ما، الدە باسقالاي پيعىلى بار ما، بىلمەدىم. «قازاقفيلمدى» جەلەۋ قىلىپ قانشا ۋاقىتتان بەرى ەرتەلى-كەش مەنىمەن الىسىپ كەلەدى. بۇل جەردە ايتا كەتەر دۇنيە كوپ. بىرىنشىدەن، «ءابىل» ءفيلمى ۇلتتىق كينونى قولداۋ ورتالىعىنىڭ قولداۋىمەن ءتۇسىرىلدى. قازاقفيلمنىڭ تۋىندىسى. بىراق نەگە ەكەنىن بىلمەيمىن، ەرلان تولەۋتاي ءفيلمنىڭ مەملەكەتتىڭ قولداۋىمەن تۇسىرىلگەنى جونىندە جاق اشپايدى.

سوندىقتان مەملەكەتتىك قولداۋ تۋرالى ءسوز بولعاندا، بارلىق دۇنيەنى جان-جاقتى ايتۋ قاجەت. ال ەندى «مەن قۇتتىقتامادى» دەپ رەنجۋ ءتىپتى اقىلعا سىيمايدى. بۇدان ۇلكەن ماسەلە جاساۋ ۇيات سەكىلدى. وتكەن جىلى شەت ەلدەن جۇلدەلەردىڭ ءبىرىن العاندا مينيسترلىكتىڭ رەسمي پاراقشاسىندا ارنايى قۇتتىقتادىق. ەگەر بارلىق ماسەلە قۇتتىقتاۋعا عانا كەلىپ تىرەلسە، اعامىز سول كەزدە-اق تىنىشتالار ەدى. بىراق ماسەلە وندا ەمەس سەكىلدى»، - دەدى ا.بالاەۆا.

سونداي-اق ۆيتسە-پرەمەر ەرلان تولەۋتايدىڭ «قارا تىزىمگە» قاتىستى سوزىنە دە جاۋاپ بەردى.

«ەرلان تولەۋتاي ايتقانداي بىزدە «قارا ءتىزىم» دەگەن ماسەلە جوق. مۇنى انىق ايتۋ كەرەك. كينو سالاسىندا، كەز كەلگەن شىعارماشىلىق ورتاداعىداي، بۋىن الماسۋى ۇزدىكسىز ءجۇرىپ وتىرادى. قازىر سالاعا جاڭا رەجيسسەرلەر، پروديۋسەرلەر كەلىپ جاتىر. ساراپتامالىق كوميسسيالاردىڭ قۇرامى دا تۇراقتى تۇردە جاڭارتىلىپ وتىرادى. بەلگىلى ءبىر كەزەڭدە قانداي دا ءبىر ماراپاتتان نەمەسە جوبادان تىس قالۋ – «قارا تىزىمگە» ەندى دەگەن ءسوز ەمەس. مۇنداي تۇجىرىم جاساۋ نەگىزسىز. ەگەر ەرلان تولەۋتاي ۇلتتىق كينونىڭ دامۋى جولىندا بىرلەسە جۇمىس ىستەيمىن دەسە، ءبىز ءاردايىم دايىنبىز. قاجەت بولسا، جۇمىس تا تابىلادى»، - دەدى ول.

سونىمەن قاتار ايدا بالاەۆا «قازاقانيماتسياعا» قاتىستى ماسەلەدە ناقتى فاكتىلەرگە سۇيەنۋ كەرەك ەكەنىن اتاپ ءوتتى.

«بۇل ۇيىم 2022 جىلدان بەرى جۇمىس ىستەپ كەلەدى. وعان دەيىن قوردالانعان ماسەلەلەر از بولعان جوق. اشىعىن ايتۋ كەرەك، ءبىر عانا «التىن ادام» دەگەن جوبانى بەس جىل بويى بىتىرە الماي، قارجىسىن تالان-تاراجىعا سالعان. مەن قىزمەتكە كەلگەننەن كەيىن وسى جوبانى تولىق اياقتاي الدىق. ءبىز الدا «قازاقانيماتسياعا» جاڭا تىنىس بەرگىمىز كەلەدى»، - دەدى.

سۋرەت: قر مادەنيەت جانە اقپارات مينيسترلىگىنەن الىندى.

سونىمەن قاتار تاياۋدا الماتى قالاسىنا كەلگەن ساپارىندا «قازاقفيلمنىڭ» جاعدايىمەن تانىسىپ، اۋماقتى ارالاعانىن اتاپ ءوتتى.

«جالپى ءبىز ءبارىمىز «قازاقفيلمنىڭ» دامۋىنا مۇددەلىمىز. كەشە عانا مەن ءوزىم ارنايى بارىپ، اۋماعىن ارالاپ كوردىم. قاراۋسىز قالعان، قالىڭ ءشوپ باسقان اۋماقتار بار. وسىنداي جەرلەردى رەتكە كەلتىرىپ، حالىققا قولجەتىمدى ساياباققا اينالدىرۋعا قارسى بولۋ – قانشالىقتى دۇرىس؟ كەرىسىنشە، بۇل اۋماقتى اباتتاندىرىپ، وتاندىق كينو ونەرىنىڭ تاريحىنا ارنالعان زاماناۋي تاقىرىپتىق پارك سالۋدىڭ ماڭىزى زور دەپ ەسەپتەيمىن.

ءبىز قازىر كينوستۋديا اۋماعىن تۇتاستاي جاڭعىرتۋ ماسەلەسىن پىسىقتاپ جاتىرمىز. عيماراتتار مەن ينجەنەرلىك جەلىلەردى كۇردەلى جوندەۋدەن وتكىزۋ كەرەك. قول قۋسىرىپ قاراپ وتىرا المايمىز. مۇنىڭ ءبارى «قازاقفيلمدى» ساقتاۋ، ونى جاڭا دەڭگەيگە شىعارۋ ءۇشىن جاسالىپ جاتقانىن تۇسىنۋگە ءتيىسپىز»، - دەدى ا.بالاەۆا.

ايتا كەتسەك، قازاقستان كينوگەرلەر وداعىنىڭ باسقارما مۇشەسى ەرلان تولەۋتاي «قازاقفيلم» اۋماعىنا «كينەماتوگرافيستەر پاركىن» سالۋ ماسەلەسىنە قاتىستى قر پرەمەر-ءمينيسترىنىڭ ورىنباسارى نۇرلىبەك نالىباەۆقا ۇندەۋ جاساعان بولاتىن. الەۋمەتتىك جەلىدەگى جاريالانىمدارعا قاتىستى ش. ايمانوۆ اتىنداعى «قازاقفيلم» اق رەسمي مالىمدەمە جاساپ، ساياباقتىڭ جالپى جۇرتشىلىققا ارنالعانىن، اۋماقتا  ەشقانداي جەكە نەمەسە كوممەرتسيالىق نىساندار سالۋ كوزدەلمەگەن حابارلادى.

ودان بولەك كينوستۋديا وزدەرى جايلى جالعان اقپارات تاراتقان ازاماتتار بويىنشا قۇقىق قورعاۋ ورگاندارىنا جانە سوتقا جۇگىنەتىنىن حابارلادى.

نۇرگەلدى ابدىعانيۇلى

Abai.kz