استاناداعى Maqsut Narikbayev University-دە حالىقارالىق قاتىناس پانىنەن ساباق بەرگەن وزبەكستان ازاماتى يقبول­جون قورابوەۆ تىڭشىلىق جاسادى دەگەن كۇدىكپەن ۇستالدى دەپ حابارلايدى Ertenmedia.kz BBC-ءدىڭ وزبەك قىزمەتىنە سىلتەپ.

46 جاستاعى عالىمنىڭ قاماۋدا وتىرعانىنا ەكى ايعا جۋىقتاسا دا، ءىستىڭ ناقتى ءمان-جايى جانە ونىڭ قاي مەملەكەتتىڭ مۇددەسىنە جۇمىس ىستەگەنى ءالى بەلگىسىز.

قورابوەۆتىڭ ەت جاقىندارىنىڭ ايتۋىنشا، 3 شىلدەدە بىرنەشە ادام پروفەسسوردىڭ استاناداعى ۇيىنە ساۋ ەتىپ كىرىپ كەلگەن. ولار عالىمعا تىڭشىلىق جاسادى دەگەن كۇدىك تاعىلعانىن ايتىپ، وزدەرىمەن بىرگە الىپ كەتكەن.

عالىم قىلمىستىق كودەكستىڭ 176-بابى بويىنشا كۇدىككە ءىلىنىپ وتىر. اتالعان باپ شەتەلدىك ازاماتتىڭ مەملەكەتتىك قۇپيانى شەت مەملەكەتكە نەمەسە ۇيىمعا بەرۋى، جيناۋى، ۇرلاۋى مەن ساقتاۋىن، سونداي-اق قازاقستاننىڭ ۇلتتىق قاۋىپسىزدىگىنە قارسى وزگە دە ارەكەتىن قامتيدى.

عالىمنىڭ جاقىنى ۇقك قورابوەۆتى ۇيىنەن الىپ بارا جاتقاندا ونىڭ استاناداعى وزبەكستان كونسۋلدىعىنىڭ قىزمەتكەرىنە اقپارات جەتكىزىپ تۇرعانىن مەڭزەگەنىن ايتتى. پروفەسسور مۇنى سول ساتتە جۇبايىنا ايتىپ ۇلگەرگەن.

وسى دەرەككە سۇيەنگەن بولجامداردىڭ ءبىرى بويىنشا، قورابوەۆ تاشكەنتتىڭ پايداسىنا تىڭشىلىق جاسادى دەگەن كۇدىككە ءىلىنۋى مۇمكىن.

ەكىنشى بولجام عالىمنىڭ ستراتەگيالىق ماڭىزى بار مينەرالدارعا قاتىستى زەرتتەۋىمەن بايلانىستى. BBC قورابوەۆتىڭ بيىل ساۋىردە جازىلعان، بىراق ءالى جارىق كورمەگەن سوڭعى عىلىمي ەڭبەگىمەن تانىسقان ەكەن. زەرتتەۋ «قازاقستان مەن وزبەكستانداعى ماڭىزدى مينەرالعا قاتىستى ساياسي جانە ستراتەگيالىق نارراتيۆتەر» دەپ اتالادى.

Abai.kz