ريددەر قالاسىندا 600 وقۋشىعا ارنالعان جاڭا «شاڭىراق» مەكتەپ-گيمنازياسى پايدالانۋعا بەرىلدى. مەملەكەتتىك تىلدە ءبىلىم بەرەتىن زاماناۋي وقۋ ورداسى «كازتسينك» جشس-نىڭ جەكە قاراجاتىنا سالىندى.

سالتاناتتى اشىلۋ راسىمىنە شىعىس قازاقستان وبلىسىنىڭ اكىمى نۇرىمبەت ساقتاعانوۆ قاتىستى. اۋقىمدى الەۋمەتتىك جوبا قالانىڭ 5-شاعىناۋدانىندا جۇزەگە اسىرىلدى. جاڭا نىسان ريددەردىڭ ءبىلىم بەرۋ ينفراقۇرىلىمىن كەڭەيتىپ، وقۋشى ورىندارىنىڭ تاپشىلىعىن ازايتۋعا مۇمكىندىك بەرەدى.

جايلىلىق پەن قاۋىپسىزدىك تالاپتارى

ءۇش بلوكتان تۇراتىن عيماراتتىڭ جالپى اۋماعى 10 مىڭ شارشى مەتردەن اسادى. ءبىلىم ورداسى قاۋىپسىزدىك پەن جايلىلىقتىڭ زاماناۋي ستاندارتتارىنا ساي جوبالانىپ، قاجەتتى قۇرال-جابدىقپەن تولىق قامتىلعان. وقۋ كەڭىستىگىن ۇيىمداستىرۋ كەزىندە ءار جاستاعى بالانىڭ ءبىلىم الۋ جانە ەركىن قوزعالۋ ەرەكشەلىكتەرى ەسكەرىلگەن.

ايماق باسشىسى بيىل شىعىس قازاقستان وبلىسىندا 10 مىڭعا جۋىق ءبۇلدىرشىن مەكتەپ تابالدىرىعىن العاش اتتاعانىن، سولاردىڭ 60-تان استامى وسى «شاڭىراق» مەكتەپ-گيمنازياسىنا قابىلدانعانىن اتاپ ءوتتى:

«جاڭا وقۋ جىلىندا شەكارالىق ايماق سانالاتىن مارقاكول اۋدانىندا، جاڭادان قۇرىلعان سامار اۋدانىندا جانە ءوندىرىسى قۋاتتى ريددەر قالاسىندا ءۇش جاڭا مەكتەپ پايدالانۋعا بەرىلدى. 600 ورىندىق زاماناۋي «شاڭىراق» مەكتەپ-گيمنازياسى ەلىمىزدىڭ ءبىلىمدى، باسەكەگە قابىلەتتى جاستارىن تاربيەلەيتىن ىرگەلى ءبىلىم ورداسىنا اينالسىن. جاڭا وقۋ جىلى قۇتتى بولسىن!» – دەدى نۇرىمبەت ساقتاعانوۆ.

مەكتەپتىڭ ىشكى مۇمكىندىكتەرى:

• وقۋ بلوگى: 5–11 سىنىپ وقۋشىلارىنا ارنالعان كەڭ كابينەتتەر، مامانداندىرىلعان شەبەرحانالار، زاماناۋي كىتاپحانا جانە رەسۋرستىق ورتالىق.

• باستاۋىش سىنىپتار: باستاۋىش وقۋشىلارىنىڭ ايماعى عيماراتتىڭ وزگە بولىگىنەن تولىق وقشاۋلانىپ، قاۋىپسىز ورتا قاعيداتىمەن جابدىقتالعان.

• الەۋمەتتىك جانە مەديتسينالىق كەشەن: 135 ورىندىق اكت زالى، تولىققاندى مەديتسينالىق بلوك، لوگوپەد پەن پسيحولوگ كابينەتتەرى جۇمىس ىستەيدى.

• تاماقتانۋ ايماعى: زاماناۋي قۇرال-جابدىقتارمەن قامتىلعان كەڭ ءارى جايلى اسحانا سانيتارلىق تالاپتارعا تولىق ساي كەلەدى.

كوپفۋنكتسيونالدى سپورت الاڭى

وقۋشىلاردىڭ دەنە شىنىقتىرۋى ءۇشىن ىشتە ۇلكەن جانە كىشى سپورت زالدارى قاراستىرىلعان. ال مەكتەپتىڭ سىرتقى اۋماعى تولىقتاي سپورتتىق-ساۋىقتىرۋ كەشەنىنە اينالدى:

• فۋتبول، ۆولەيبول جانە باسكەتبول الاڭدارى;

• ۇزىندىعى 250 مەترلىك كاسىبي جۇگىرۋ جولاعى;

• ءارتۇرلى جاستاعى بالالارعا ارنالعان قاۋىپسىز ويىن جانە دەمالىس ايماقتارى.

جاڭا «شاڭىراق» مەكتەپ-گيمنازياسىنىڭ اشىلۋى — ريددەردەگى وقۋشىلارعا قولايلى، تەحنولوگيالىق ءارى جان-جاقتى دامۋعا مۇمكىندىك بەرەتىن ورتا قالىپتاستىرۋداعى ماڭىزدى قادام.

Abai.kz