Риддер қаласында 600 оқушыға арналған жаңа «Шаңырақ» мектеп-гимназиясы пайдалануға берілді. Мемлекеттік тілде білім беретін заманауи оқу ордасы «Казцинк» ЖШС-ның жеке қаражатына салынды.

Салтанатты ашылу рәсіміне Шығыс Қазақстан облысының әкімі Нұрымбет Сақтағанов қатысты. Ауқымды әлеуметтік жоба қаланың 5-шағынауданында жүзеге асырылды. Жаңа нысан Риддердің білім беру инфрақұрылымын кеңейтіп, оқушы орындарының тапшылығын азайтуға мүмкіндік береді.

Жайлылық пен қауіпсіздік талаптары

Үш блоктан тұратын ғимараттың жалпы аумағы 10 мың шаршы метрден асады. Білім ордасы қауіпсіздік пен жайлылықтың заманауи стандарттарына сай жобаланып, қажетті құрал-жабдықпен толық қамтылған. Оқу кеңістігін ұйымдастыру кезінде әр жастағы баланың білім алу және еркін қозғалу ерекшеліктері ескерілген.

Аймақ басшысы биыл Шығыс Қазақстан облысында 10 мыңға жуық бүлдіршін мектеп табалдырығын алғаш аттағанын, солардың 60-тан астамы осы «Шаңырақ» мектеп-гимназиясына қабылданғанын атап өтті:

«Жаңа оқу жылында шекаралық аймақ саналатын Марқакөл ауданында, жаңадан құрылған Самар ауданында және өндірісі қуатты Риддер қаласында үш жаңа мектеп пайдалануға берілді. 600 орындық заманауи «Шаңырақ» мектеп-гимназиясы еліміздің білімді, бәсекеге қабілетті жастарын тәрбиелейтін іргелі білім ордасына айналсын. Жаңа оқу жылы құтты болсын!» – деді Нұрымбет Сақтағанов.

Мектептің ішкі мүмкіндіктері:

• Оқу блогы: 5–11 сынып оқушыларына арналған кең кабинеттер, мамандандырылған шеберханалар, заманауи кітапхана және ресурстық орталық.

• Бастауыш сыныптар: Бастауыш оқушыларының аймағы ғимараттың өзге бөлігінен толық оқшауланып, қауіпсіз орта қағидатымен жабдықталған.

• Әлеуметтік және медициналық кешен: 135 орындық акт залы, толыққанды медициналық блок, логопед пен психолог кабинеттері жұмыс істейді.

• Тамақтану аймағы: Заманауи құрал-жабдықтармен қамтылған кең әрі жайлы асхана санитарлық талаптарға толық сай келеді.

Көпфункционалды спорт алаңы

Оқушылардың дене шынықтыруы үшін іште үлкен және кіші спорт залдары қарастырылған. Ал мектептің сыртқы аумағы толықтай спорттық-сауықтыру кешеніне айналды:

• Футбол, волейбол және баскетбол алаңдары;

• Ұзындығы 250 метрлік кәсіби жүгіру жолағы;

• Әртүрлі жастағы балаларға арналған қауіпсіз ойын және демалыс аймақтары.

Жаңа «Шаңырақ» мектеп-гимназиясының ашылуы — Риддердегі оқушыларға қолайлы, технологиялық әрі жан-жақты дамуға мүмкіндік беретін орта қалыптастырудағы маңызды қадам.

Abai.kz