بۇگىن قازاقستاننىڭ حالىقارالىق ادام قۇقىقتارى جونىندەگى بيۋروسىندا 2022 جىلعى قاڭتار وقيعاسىنا قاتىستى باياندامانىڭ ەكىنشى بولىگىنىڭ تانىستىرىلىمىنا ارنالعان ءباسپاسوز ءماسليحاتى ءوتتى. الماتى قالاسىندا وتكەن جيىندا باقىتجان تورەعوجينا مەن شاليپا بەكقۇلوۆا سپيكەرلەر رەتىندە ءسوز سويلەدى.

ءباسپاسوز جيىنىنا جينالعان جۋرناليستەر قاڭتار وقيعاسىمەن عانا شەكتەلگەن جوق، تىلشىلەر وسىنداي جوبالاردىڭ ارتىندا تۇرعان ۇيىمنىڭ قىزمەتىنە دە قاتىستى سۇراقتار قويدى.

باق وكىلدەرىنىڭ ءبىرى باقىتجان تورەعوجيناعا شەتەلدىك گرانتتىق جوبالارعا ادامداردىڭ قانداي جولمەن ىرىكتەلەتىنى جانە ولاردىڭ ەڭبەگىنە اقى تولەنە مە دەگەن ناقتى سۇراق قويدى.

الايدا ب.تورەعوجينا تۋرا جاۋاپ بەرۋدىڭ ورنىنا ۇيىمنىڭ شتاتتاعى قىزمەتكەرلەرى مەن ەرىكتىلەرى تۋرالى ايتىپ بەردى. ونىڭ سوزىنشە، قاڭتار وقيعاسى كەزىندە ول بەينەماتەريالدار مەن جاريالانىمداردى جيناۋعا 50-دەن استام ادامدى تارتا العان، ال مۇنداي جۇمىستى قالايتىنداردى تابۋ ءۇشىن وعان الەۋمەتتىك جەلىدە جازبا جاريالاۋدىڭ ءوزى جەتكىلىكتى بولعان.

ءجۋرناليستىڭ سۇراعى ناقتى گرانتتىق جوبالارعا، ادامداردى تارتۋ تەتىگىنە جانە ولاردىڭ ەڭبەگىنە قاتىستى ەدى. بۇعان قاراماستان ب.تورەعوجينا قارجىلاندىرۋ كوزدەرىن، جوباعا تارتۋ شارتتارىن جانە ەڭبەكاقى تولەۋ ءتارتىبىن اشىپ ايتۋدان باس تارتتى.

تاعى ءبىر جۋرناليست زەرتتەۋدىڭ مازمۇنىن تىكەلەي تالقىلاۋعا تىرىسقانىمەن، بۇل ماسەلە دە جاۋابىن تاپقان جوق. ول باياندامانىڭ ءبىرىنشى بولىگىندەگى تۇجىرىمدارعا سىلتەمە جاساي وتىرىپ، ىقتيمال سايكەسسىزدىكتەرگە تۇسىنىكتەمە بەرۋدى جانە زەرتتەۋدە قولدانىلعان تاريحي ۇقساستىقتاردىڭ دالەلدىك قۇندىلىعىن ءتۇسىندىرۋدى سۇرادى. اتاپ ايتقاندا، جۋرناليست ناقتى ەپيزودتاردى تالداۋ ماسەلەسىن كوتەرىپ، مۇنداي سالىستىرۋ ەموتسيونالدى تۇردە بەرىلگەن قورىتىندىنى الماستىرا ما دەگەن سۇراق قويدى.

الايدا ماسەلەنىڭ باسىن اشىپ بەرەتىن پىكىرتالاس بولعان جوق. ب.تورەعوجينا بۇل سۇراققا دا جاۋاپ بەرمەيتىنىن مالىمدەدى.

قازىرگى تاڭدا قازاقستانداعى ۇكىمەتتىك ەمەس سەكتوردى شەتەلدەن قارجىلاندىرۋ ماسەلەسىنىڭ وزەكتى ەكەنىن ايتا كەتۋ كەرەك جانە ونىڭ ناقتى اقشالاي كولەمى دە بار. مەملەكەتتىك كىرىستەر كوميتەتى جاريالاعان شەتەلدىك كوزدەردەن اقشا مەن وزگە دە مۇلىك الاتىن تۇلعالار تىزىلىمىنە سايكەس، تەك 2025 جىلدىڭ ەكىنشى جارتىجىلدىعىندا مۇنداي قارجىلاندىرۋدىڭ كولەمى 12 ملرد تەڭگەدەن اسقان.

بۇل تىزىلىمدەگى مالىمەتتەرگە سايكەس، قازاقستاننىڭ حالىقارالىق ادام قۇقىقتارى جونىندەگى بيۋروسى شەتەلدەن 350 ملن تەڭگەدەن استام قارجى العان. ال جەتەكشىسى باقىتجان تورەعوجينا سانالاتىن «ار.رۋح.حاق» قوعامدىق بىرلەستىگى 44 ملن تەڭگەدەن استام قاراجات يەمدەنگەن.

وسى تۇرعىدان العاندا، ءجۋرناليستىڭ گرانتتىق جوبالار مەن ولاردىڭ قارجىلاندىرىلۋىنا قاتىستى سۇراعىنىڭ بولۋى دا، قويىلۋى دا قيسىنعا كەلەتىن دۇنيە.

ءبىر قىزىعى، مۇنداي سۇراقتار قويىلعاننان كەيىن ءباسپاسوز ءماسليحاتى شۇعىل تۇردە اياقتالىپ، تىكەلەي ەفير كەنەتتەن ءۇزىلىپ كەتتى.

Abai.kz