رەداكتسيادان: Abai.kz اقپاراتتىق پورتالى - ەركىن الاڭ. مۇندا قازاقستاننىڭ ءاربىر زاڭدى ازاماتى وي جارىستىرىپ، پىكىر تالاستىرۋعا قۇقىلى. بۇگىن رەداكتسيامىزعا بەلگىلى كومپوزيتور ەرمۇرات ۇسەنوۆتىڭ ا.جۇبانوۆ اتىنداعى دارىندى بالالار مەكتەبىنەن الىنۋىنا قاتىستى ماقالا كەلىپ ءتۇستى. ءبىز ايگۇل ۇلكەنباەۆا،  راۋشان مۇساحوجاەۆا، باۋىرجان اقتاي باستاعان ەسىم-سويى ەلگە بەلگىلى ازاماتتاردىڭ ۇشبۋ پىكىرىمەن كەلگەن بۇل ماتەريالدى Abai.kz اقپاراتتىق پورتالىندا جاريالاۋدى ءجون كوردىك. 

سولاي بولا تۇرا، الداعى ۋاقىتتا ماقالادا ەسىمدەرى اتالاتىن جەكەلەگەن ازاماتتار رەداكتسيامىزعا پىكىر بىلدىرۋگە، جاۋاپ جولداۋعا نيەت بىلدىرسە، ولاردىڭ دا پىكىرلەرىنە الاڭ ۇسىناتىنىمىزدى جانە ماقالا رەداكتسيا ۇستانىمىن بىلدىرمەيتىنىن ەسكەرتەمىز...

ەرمۇرات ۇسەنوۆتەي تۇلعانىڭ قادىرىنە جەتپەسەك كىم بولعانىمىز؟..

قازىرگى كەزدە قازاق كومپوزيتورلارىنىڭ ىشىندە تازا ۇلتتىق باعىتتا شىعارما جازىپ جۇرگەندەردىڭ ءبىرى عانا ەمەس، بىرەگەيى – ەرمۇرات ۇسەنوۆ دەپ سەنىممەن ايتا الامىز. ونىڭ سيمفونيالىق جانە حالىق اسپاپتارى وركەسترىنە، سونداي-اق، حورعا، جەكە اسپاپتارعا ارنالعان تۋىندىلارى بەلگىلى ونەر ۇجىمدارىنىڭ رەپەرتۋارىنان بەرىك ورىن العان. حالىق اراسىنا كەڭ تاراعان «كەربەز سۇلۋ»، اياۋلى اقىن اپامىز فاريزا وڭعارسىنوۆاعا ارنالعان «اقجەلكەن» اتتى تاماشا كۇيلەرى، نەسىپبەك ايتۇلىنىڭ ولەڭدەرىنە جازىلعان «جالت-جۇلت ەتكەن دۇنيە»، «مەرۋەت مونشاق»، ت.ب. اندەرى تىڭدارمانداردىڭ زور ىقىلاسىنا بولەنگەن.

وسىدان ونشاقتى جىل بۇرىن ا.جۇبانوۆ اتىنداعى دارىندى بالالار مەكتەبىنىڭ سول كەزدەگى ديرەكتورى  اقان ءابدىۋالي ەرمۇرات ۇسەنوۆكە «اعا، بىزگە ۇلتتىق ناقىشتا، قازاقشا جازاتىن كومپوزيتور دايىنداپ، وقىتىپ بەرىڭىز» دەپ ءوتىنىش ايتقاندا، ول سوزگە كەلمەي كەلىسىپ، ءوزى سىيلايتىن ازاماتتىڭ ءوتىنىشىن لايىقتى تۇردە ورىنداپ شىقتى. جاتسا دا، تۇرسا دا ۇلتتىق مۋزىكانىڭ بولاشاعى تۋرالى ويلاۋدى ءبىر ءسات ەسىنەن شىعارمايتىن تالانتى كومپوزيتور قولعا العان ىسىنە جان سالا كىرىسىپ، از ۋاقىتتىڭ ىشىندە تاماشا جەتىستىكتەرگە جەتتى. اتاپ ايتقاندا، ەرمۇرات اعا ءتالىم بەرىپ، دايىنداپ شىققان ارجان ەسىركەپ اتتى وقۋشىسى جازعان «اقبالا» بالەتىنىڭ پرەمەراسى وسى جىلدىڭ 12-13 قىركۇيەگىندە الماتىداعى اباي اتىنداعى وپەرا جانە بالەت تەاترىندا وتپەك. ا.جۇبانوۆ اتىنداعى مەكتەپتىڭ تۇلەگى، ەرمۇراتتىڭ تاعى ءبىر شاكىرتى  الىبي جانات – قازىر ن.ا. ريمسكي-كورساكوۆ اتىنداعى سانكت-پەتەربۋرگ مەملەكەتتىك كونسەرۆاتورياسىنىڭ كومپوزيتسيا كلاسىنا گرانتپەن ءتۇسىپ، 3-كۋرستى اياقتادى. اتاپ ايتۋ كەرەك، ا.جۇبانوۆ مەكتەبىنىڭ تاريحىندا بۇرىن مۇنداي جەتىستىككە جەتكەن ەشكىم جوق! (كومپوزيتور اعامىزدىڭ وزگە دە شاكىرتتەرى جەتكەن جەتىستىكتەر تۋرالى اڭگىمە ءوز الدىنا ءبىر داستان).

عاجاپ ەمەس پە؟ ارينە سولاي! بىراق وسىنشا جەتىستىگى ءۇشىن ە.ۇسەنوۆكە قالاي «العىس» ايتىلدى؟ ەندى سوعان كەلەيىك.

بۇيىرسا، كومپوزيتور ەرمۇرات ۇسەنوۆ كەلەسى جىلى مەرەيلى 75 جاسقا تولماق. سوعان وراي ول ءوزى قىزمەت ىستەپ مەكتەپتىڭ باسشىلىعىنا جاڭادان كەلگەن دانيار بايجۇمانوۆقا وسى جىلدىڭ تامىز ايىنىڭ ورتالارىندا «دانيار، كەلەسى جىلى مەن 75-كە تولامىن. سوعان دەيىن ازعانا ساعاتپەن ىستەي تۇرايىن، سوسىن جۇمىستى دوعارامىن. سوندىقتان وسى ءوتىنىشىمدى ورىنداساڭ دۇرىس بولار ەدى» دەپتى. د.بايجۇمانوۆ تا ونى ماقۇلداعانداي كەيىپ تانىتقان. بىراق ول وسى جىلدىڭ 24 تامىزى كۇنى ە.ۇسەنوۆكە ەش ەسكەرتپەستەن ونىڭ ورنىنا ۆاكانتتىق كونكۋرس جاريالاپ، باسقا بىرەۋدى الا سالىپتى. مۇنى بىلگەن ە.ۇسەنوۆ «بۇل قالاي؟» دەسە، د.بايجۇمانوۆ «زاڭ سولاي!» دەپ بات باقتىرماپتى!

سۋرەت: اۆتوردىڭ جەكە مۇراعاتىنان الىندى.

سونىمەن بىرگە ەرمۇرات اعاي كەزىندە بولاشاعىنان ۇلكەن ءۇمىت كۇتىپ، كرنكۋرستا جۇلدەلى وورنى الۋعا ىقپال ەتكەن، بۇگىندە ا.جۇبانوۆ مەكتەبىنىڭ حالىق اسپاپتار ءبولىمىنىڭ مەڭگەرۋشىسى ماقپال ماناسباەۆا دا ۇستازىن قولداپ، ديرەكتورعا ءبىر اۋىز ءسوز ايتپاعان كورىنەدى...

ارينە، ءبارىمىز دە زاڭعا باعىنامىز، بىراق ديرەكتور «وسىنداي كونكۋرس بولادى، كەلەسى جىلى دا وسىندا ەڭبەك ەتكىڭىز كەلسە كونكۋرسقا قاتىسىڭىز» دەسە، ەرمۇرات اعا الدىن الا قام جەمەس پە ەدى؟ تاجىريبەسى مول، وسى مەكتەپتىڭ اتىن شىعارۋعا تەر توككەن كومپوزيتور-ۇستازدى ءبىر جىل ءوز جۇمىسىندا قالدىرۋ زاڭعا سونشالىقتى تومپاق كەلەر مە ەدى؟ ونىڭ ۇستىنە اسپاپتانۋ (ينسترۋمەنوۆكا) ساباعىن جۇرگىزەتىن بىلىكتى مامان، ا.جۇبانوۆ مەكتەبىن بىلاي قويعاندا، بۇكىل رەسپۋبليكادا جوقتىق قاسى عوي!

ال ەندى جاڭا جاس باسشى دانيار بايجۇمانوۆتىڭ بۇل «ءىرى جەڭىسىنە» نەت دەۋگە بولادى؟

ا.جۇبانوۆ مەكتەبىن دومبىرا كلاسى بويىنشا ءبىتىرىپ، قازىر سول وقۋ ورداسىن باسقارىپ وتىرعان ازاماتتىڭ  6-7 سىنىپ وقىپ جۇرگەن كەزىندە ەرمۇرات ۇسەنوۆتىڭ «تۇركى الەمى» شىعارماسىن ورىنداعان ۆيدەوسىن YouTube جەلىسىنەن كورگەنىمىزدە «ياپىراي، قازاق «قارعا قارعانىڭ كوزىن شۇقىمايدى» دەۋشى ەدى، شۇقيتىن دا كەزى بولادى ەكەن-اۋ» دەپ تاڭ قالماسقا شارامىز قالمادى...

سۋرەتتە: د.بايجۇمانوۆ وقۋشى كەزىندە ە.ۇسەنوۆتىڭ «تۇركى الەمى» تۋىندىسىن ورىنداپ وتىر.

جاس ديرەكتوردىڭ «زاڭ سولاي!» دەۋىنىڭ شىندىعىنا كەلسەك، قر ەڭبەك كودەكسىنىڭ 52-بابىنىڭ 9-تارماعىنا سايكەس، زەينەتكەرگە ەڭبەك شارتىن بۇزۋ تۋرالى ءبىر اي بۇرىن حابارلانۋى ءتيىس ەدى. ال مىنا جاعدايدا ول جوق!

سوسىن، ە.ۇسەنوۆ قر ەڭبەك كودەكسىنىڭ 52 بابى (ەڭبەك شارتىن جۇمىس بەرۋشىنىڭ باستاماسى بويىنشا بۇزۋ نەگىزدەرى), 1-تارماعىنىڭ قايسى ءبىر تارماقشاسىندا كورسەتىلگەن قايسى سەبەپتەرگە سايكەس بۇيرىقپەن جۇمىستان شىعارىلعالى وتىر؟ تۇسىنىكسىز...

نەگىزىندە، زەينەتكەردىڭ ۆاكانتتىق كونكۋرسقا قاتىسۋى دا زاڭ جۇزىندە بەلگىلەنگەن. ە.ۇسەنوۆتىڭ ايتۋىنشا، ول حابارلامانى بايقاماعان. ا.جۇبانوۆ مەكتەبى ديرەكتورىنىڭ ە.ۇسەنوۆ ساباقتارىنا ۆاكانتتىق كونكۋرس جاريالاپ جانە ول تۋرالى ە.ۇسەنوۆكە ەسكەرتپەگەنىنىڭ ءوزى ونى الدىن الا جۇمىستان شىعارۋدى جوسپارلاۋ ەمەس پە ەكەن دەگەن كۇدىكتى وي تۋعىزادى.

تاعى ءبىر ايتا كەتەتىن نارسە، د.بايجۇمانوۆ ە.ۇسەنوۆكە 24 تامىزدا عانا «جۇمىستان بوسادىڭىز» دەگەندى اۋىزشا ايتقان! ە.ۇسەنوۆ ديرەكتورعا «75-كە شىققان سوڭ جۇمىستى ءوزىم دە قويعالى وتىرمىن. تەك ادام سياقتى شىعارىپ سالساڭدار بولدى» دەگەنىنە ديرەكتوردىڭ ءزىلدى داۋىسپەن «بولدى عوي، ەندى دەمالىپ، جاستارعا ورىن بەرمەيسىز بە؟» دەگەنى قازاق مۋزىكاسىنا زور ەڭبەگى سىڭگەن اقساقالعا تىم اۋىر ەمەس پە؟

قۇدايعا شۇكىر، ەرمۇرات اعا جەرگە قاراپ وتىرعان ادام ەمەس، جاعدايى جاقسى. تەك «75 جاسىمدا وسى مەكتەپتەگى قىزمەتىمدى ابىرويمەن اياقتاپ، ورنىمدى جاستارعا بەرىپ كەتسەم. ءوزىم ۇزاق جىل ەڭبەك ەتكەن ۇجىممەن لايىقتى قوشتاسسام» دەگەن ارمانى بار ەدى كومپوزيتور-ۇستازدىڭ.

ەگەر بايجۇمانوۆ مىرزا ەلگە سىيلى، قازاق ونەرىنە ءبىر ادامداي ۇلەسىن قوسقان ەرمۇرات ۇسەنوۆ سەكىلدى ازاماتقا ءبىر جىل مۇمكىنجدىك بەرىپ، باتاسىن الىپ، لايىقتى شىعارىپ سالسا – ول بيىك ادامگەرشىلىك بولماس پا ەدى؟ وعان د.بايجۇمانوۆتى نە جىبەرمەدى؟ تاكاپپارلىق پا، الدە ۇلكەننىڭ قادىرىن بىلە بەرمەيتىن جاستىق استامدىق پا؟ ونەرگە ەڭبەگى سىڭگەن دارىندى ازاماتتىڭ زاڭعا سىيىمدى ءبىر تىلەگىن ورىنداماۋعا نە سەبەپ بولدى ەكەن؟

ءتۇيىن: ەرمۇرات ۇسەنوۆ – قازاق مۋزىكاسىنىڭ دامۋىنا ولشەۋسىز ەڭبەك سىڭىرە ءجۇرىپ، ەشكىمنەن ەشتەڭە دامەتپەگەن تۇلعا. ەندەشە سونداي ازاماتتىڭ ەشكىمگە سالماق تۇسىرمەيتىن ءبىر ءوتىنىشىن جەردە قالدىرۋ – كىم-كىمنىڭ دە ازاماتتىعىنا سىن!

بىرەۋدىڭ كىم ەكەنىن بىلگىڭ كەلسە اينالاداعى ادامداردىڭ ول تۋرالى ايتقاندارىن سارالاپ كورگەن ارتىق بولمايدى. كوپتەگەن ونەر قايراتكەرلەرى ەرمۇرات ۇسەنوۆتىڭ باسىنان كەشىپ جاتقان جاعدايدان كەيىن پىكىر ءبىلدىردى. ەندەشە سولاردىڭ بىرنەشەۋىن نازارلارىڭىزعا ۇسىنامىز.

ايگۇل ۇلكەنباەۆا، قازاقستانىڭ حالىق ءارتىسى، قۇرمانعازى اتىنداعى قازاق ۇلتتىق كونسەرۆاتورياسىنىڭ پروفەسسورى:

– ەرمۇرات اعامىزدىڭ قازاق دومبىراشىلار رەپەرتۋارىنا قوسقان ۇلەسى وراسان زور. ونىڭ تۋىندىلارىن ارناۋلى وقۋ ورىندارىندا – مەكتەپتەن كونسەرۆاتورياعا دەيىن ورىندايتىنىمىز، كوبىنە سونىڭ شىعارمالارى. ەرمۇرات اعامىز بۇگىنگى كۇننىڭ قايتالانباس كومپوزيتورى، جۇرەگى تۇنىپ تۇرعان اۋەن. جانى وتە نازىك ادامنان عانا وسىنداي تەرەڭ مۋزىكا شىقسا كەرەك. ااعامىزعا «دەنىڭىز ساۋ بولىپ، كۇش-قايراتىڭىز سارقىلماي، ءبىزدىڭ باعىمىزعا امان بولىڭىز» دەگەن تىلەك ايتامىن.

راۋشان مۇسحوجاەۆا، قر ەڭبەك سىڭىرگەن قايراتكەرى، ك.بايسەيىتوۆا اتىنداعى قازاق ۇلتتىق ۋنيۆەرسيتەتىنىڭ پروفەسسورى:

– ەرمۇرات ۇسەنوۆ كونسەرۆاتوريانى ەكى رەت: ءبىرىنشى – دومبىرا كلاسى بويىنشا، ەكىنشى – مۋزىكا زەرتتەۋ ماماندىعى بويىنشا بىتىرگەن. قوبىز مامانى رەتىندە ايتارىم، سوناۋ ا.جۇبانوۆ، م.قويشىباەۆ، ل.حاميدي، ن.تىلەنديەۆتەردەن كەيىن ءبىز وسى ەرمۇرات اعايدىڭ شىعارمالارىنا قانىق بولدىق. سونداي-اق، ول قۇرمانعازى، تاتتىمبەت كۇيلەرىن قوبىزعا وتە ءساتتى لايىقتادى. ونىڭ شىعارمالارى امەريكانىڭ جەتەكشى راديولارىندا جانە تۇركيانىڭ سيمفونيالىق وركەسترىندە، مەنىڭ ورىنداۋىمدا «ءومىر داستان» تۋىندىسى جازىلدى. امەريكادا ە.ۇسەنوۆ شىعارماسىن ايدونا ىنتىقباەۆا ورىنداپ جازدىردى.

ءبىز ن.تىلەنديەۆ باسقارۋىنداعى «وتىرار سازى» وركەسترىندە بىرگە جۇمىس ىستەدىك، ول دومبىرا توبىنىڭ كونتسەرتمەيستەرى، مەن قوبىز توبيۋىنىڭ كونتسەرتمەيستەرى بولدىم. اعاي ۇستازدىق كىزمەتتە ايتارلىقتاي جەتىستىكتەرگە جەتتى، ءالى دە بەرەرى كوپ. سوندىقتان ول كىسىنى ۇستازدىعىن جالعاستىرۋعا مۇمكىندىك بەرىپ، جاستارىمىزعا ۇلگى ەتۋىمىز كەرەك!

وراق جاۋىروۆ، قر ءبىلىم بەرۋ ءىسىنىڭ ۇزدىگى، ح.دوسمۇحامەدوۆ اتىنداعى اتىراۋ ۋنيۆەرسيتەتىنىڭ قۇرمەتتى پروفەسسورى:

– اتتەگەن-اي، انا ديرەكتور بالانىڭ ءىسى ابەستەۋ بولعان ەكەن. قازىر ەرەكەڭدەي ماماندى تابۋ قيىن عوي، ءبىر جىل بولسا دا پايدالانىپ قالۋ كەرەك ەدى...

ەرەكەڭ – مۋزىكانىڭ بارلىق جانرىندا جازعان قازىرگى ەڭ الدىڭعى قاتارداعىكومپوزيتورىمىز عوي. پ.ي.چايكوۆسكي اتىنداعى كوللەدجدە ءبىر ىستەدىك، سول كەزدە دومبىراشىلار كىلەڭ ورىستىڭ، باتىستىڭ شىعارمالارىن ورىنداۋشى ەدى. ەرمۇرات وسى كوللەدجگە كەلە سالا دومبىرا مەن فورتەپيانوعا ارناپ كوپتەگەن شىعارمالار جازدى. «مايرا»، «تۇرىك الەمى»، «ماۋسىمجان»، «ءشامشى جداستان» سپەكىلدى تۋىندىلارى سول كەزدە تۋىپ، دومبىراشىلاردىڭ كۇنى بۇگىنگە دەيىن ءسۇيىپ ورىندايتىن شىعارمالارىنا اينالدى.

شىن مانىندە، ەرمۇرات ۇسەنوۆ – اتاقتى نۇرعيسانىڭ تىكەلەي شاكىرتى، ۇلتتىق مۋزىكانى بويىنا تەرەڭ سىڭىرگەن جانە شاكىرتتەرىنە دە سول قاسيەتتى سىڭىرە بىلگەن ۇلاعاتتى ۇستاز!

بۇل كۇندە باتىستىڭعازا مۋزىكاسى بىزدەگى، قالا بەردى، دۇنيەجۇزىندەگى جاسوسپىرىمدەردىڭ ساناسىن ۋلاپ جاتىر. ەلىمىزدەگى ۇلتتىق وركەسترلەر، ءتول اسپاپتارىمىز – دومبىرا، قوبىز، ءداستۇرلى ءان ونەرىمىز وسى جات ۇردىسكە قارسى شاما-شارقىنشا قىزمەت ەتىپ كەلەدى. وسى ۇردىسكە سالماقتى ۇلەس قوسىپ جۇرگەن كومپوزيتورلارىمىز ساۋساقپەن سانارلىق قانا. ە.ۇسەنوۆتىڭ كۇردەلى جانرداعى «كەنەسارى – اق سەمسەر»، «رەكۆيەم»، «جەلتوقسان جاڭعىرىعى»، «بابالار اماناتى»، «قورقىت-قوبىز داستانى»، ت.ب. سيمفونيالىق كانتاتالارى – ۇلتتىق كومپوزيتسيا سالاسىنا قوسىلعان ايتارلىقتاي جەتىستىك سانالادى.

ە.ۇسەنوۆتىڭ شىعارمالارى بىزدەگى بىزدەگى ونەر ۇجىمدارىنىڭ عانا ەمەس،، سونىمەن بىرگە رەسەيدىڭ بىرقاتار وبلىستارىنداعى، قىتايدىڭ ءۇرىمشى، قۇلجا قالالارىنىڭ ونەر ۇجىمدارىنىڭ رەپەرتۋارىنان بەرىك ورىن العان. اۆتورلىق كەشتەرى ەلىمىزدىڭ ۇلكەن قالالارىندا، وبلىس ورتالىقتارىندا ءوتتى.

سەرگەي تسحە، پ.ي.چايكوۆسكي اتىنداعى مۋزىكالىق كوللەدجىنىڭ ءىىى كۋرس ستۋدەنتى:

– ەرمۋرات ۋسەنوۆ – پەداگوگ، كوتورىي وتكرىل دليا مەنيا كومپوزيتسيۋ. ۋچاس ۆ ەگو كلاسسە مى يزۋچالي گارمونيۋ، فورمۋ، ينسترۋمەنتوۆەدەنيە ي ينسترۋمەنتوۆكە. كاجدوە ناشە نوۆوە سوچينەنيە پودۆەرگاەتسيا پودروبنومۋ اناليزۋ ي ۆ كونتسە گودا يسپولنياەتسيا نا كلاسسنوم كونتسەرتە.

ۋچەبە ۋ ەرمۋراتا ۋسەنوۆە سيلنو پوۆليالو نا موە مىشلەنيە كاك مۋزىكانتا ۆ تسەلوم، چتو پوموگاەت منە نە تولكو پري سوچينەني مۋزىكي، نو ي پري ەيو يسپولنەني.

باۋىرجان اقتاي، مادەنيەت سالاسىنىڭ ۇزدىگى، «سارمات» فولكلورلىق ءانسامبلىنىڭ جەتەكشىسى:

– ارامىزدا جۇرگەن ءتىرى تاريحتى كورگىڭىز كەلسە – ەرمۇرات اعامىزعا قاراڭىز. تىلەنديەۆتىڭ شاكىرتى، قازاق مۋزىكا ونەرىنىڭ تالاي بۋىنىنا باعىت-باعدار بەرگەن، ەلىمىزدەگى وركەسترلەر مەن انسامبلدەردىڭ قالىپتاسۋىنا  ولشەۋسىز ۇلەس قوستان ۇلكەن تۇلعا. بۇگىندە اعامىزدىڭ شاكىرتتەرى الىس-جاقىن شەتەلدەردە ءبىلىمىن جالعاستىرىپ، ونەر جولىندا جەمىستى ەڭبەك ەتىپ ءجۇر. اراسىندا وپەرا، بالەت جازىپ، قازاق مۋزىكاسىنىڭ كوكجيەگىن كەڭەيتىپ جۇرگەن تالانتتار كوپ.

مەنىڭ دە كومپوزيتور رەتىندە قالىپتاسۋىمدا ەرمۇرات اعامىزدىڭ ورنى بولەك. اعانىڭ اقىلى، تالعامى مەن تالاپشىلدىعى ماعان ءاردايىم ۇلكەن مەكتەپ بولدى. جاڭا شىعارما جازسام، ەڭ الدىمەن اعاعا تىڭداتۋعا اسىعامىن. ويتكەنى ول كىسىنىڭ ءبىر اۋىز ءسوزى – مەن ءۇشىن ساباق، باعىت! وسىنداي ۇلكەن ازاماتتىڭ ورتامىزدا جۇرگەنى – ءبىز ءۇشىن ۇلكەن باقىت!

ءتىرى تاريحتى قادىرلەۋ – وتكەندى عانا ەمەس، ونەردىڭ بۇگىنىن دە باعالاۋ!

بايعارا سادۋاقاسوۆ، قر مادەنيەت قايراتكەرى، «التىن قوبىز» سىيلىعىنىڭ يەگەرى:

– مۋزىكا ونەرى الەمىنە ۇلاعاتتى ۇستازىمىز ەرمۇرات ۇسەنوۆ اعامىزبەن كوزىمىزدى اشتىق. ەرمۇرات اعانى قازاق ونەرىنە اللانىڭ بەرگەن سىيى دەسەم ارتىق ايتقاندىق بولماس. قازاق وركەسترلەرىنە، سيمفونيالىق وركەسترلەرگە، فولكلورلىق انسامبلدەرگە قانشاما قۇندى شىعارمالار جازعان كومپوزيتوردىڭ ءبىلىمى مەن بىلىكتىلىگى قازاق ەلىندەگى بارلىق ونەرپازدارعا ايان. حورعا، دومبىرا، پريما-قوبىز، قىلقوبىز اسپاپتارىنا ارنالعان تۋىندىلارى ءبىر توبە. رەسپۋبليكالىق ورىنداۋشىلار كونكۋرستارىندا اعانىڭ شىعارمالارى مىندەتتى تۇردە ورىندالادى. ەرمۇرات اعانىڭ شىعارمالارى ورتا ارناۋلى وقۋ ورىندارىنىڭ باعدارلامالارىنا ارناۋلى تۇردە ەنگىزىلگەن. قانداي ونەر ۇجىمدارىنا باس سۇعا قالساڭىز، اعايدىڭ شىعارمالارى ورىندالىپ جاتادى. رەسپۋبليكالىق، حالىقارالىق كونكۋرستارعا اعانى توراعا رەتىندە شاقىرىپ جاتادى.

قازىرگى تاڭدا مۋزىكا سالاسىنا ەرمۇرات اعانىڭ ۇستازدىعى، ءبىلىم-تاجىريبەسى اۋاداي قاجەت!

اعانىڭ دانساۋلىعى جاراپ تۇرعاندا ودان الىپ قالارىمىز كوپ.

ءسوزىمنىڭ اياعىندا ايتارىم، ەرمۇرات اعانىڭ حالقىنا بەرەرى ءالى دە كوپ، سوندىقتان ول كىسىنى قۇرمەتتەپ، شاكىرت تاربيەلەۋىنە ىقپال جاساۋ كەرەك، قۇرمەتتى وقۋ ورنىنىڭ تىزگىنىن ۇستاعان باسشىلار!

مىنە، ەلىمىزدىڭ قانشاما ايتۋلى ونەر يەلەرى وزدەرىنىڭ پىكىرلەرىن ءبىلدىرىپ جاتىر. بۇل – ەرمۇرات ۇسەنوۆتىڭ قازاق مۋزىكا ونەرىنە سىڭىرگەن زور ەڭبەگىن باعالاۋ، سىيلاۋ ءھام قۇرمەتتەۋ! ەندەشە وسىنداي ءبىلىم-بىلىگى، تاجىريبەسى مول تالانتتى ونەرپازدى شەتكە قاعۋعا بولا ما؟ ۇلتقا قىزمەت ەتكەن، حالقىنىڭ ونەرىنە، مادەنيەتىنە ۇشان-تەڭىز ەڭبەك سىڭىرگەن تۇلعانىڭ قادىرىنە جەتپەۋ ازاماتتىعىمىزعا سىن ەمەس پە؟ باسشى بولۋ – بىرەۋدى جۇمىستان شىعارىپ، بىرەۋدى الىپ تاستاۋ ەمەس، بەلگىلى ءبىر سالاعا وتە قاجەت بىلىكتى ماماندارمەن جۇمىس ىستەۋدى ءبىلۋ بولسا كەرەك!

كومپوزيتور-ۇستازدى شەتكە قاققاننان ۇتىلاتىن ۇلتتىق ونەر عانا، وسىنى ۇمىتپاعانىمىز ءجون.

احمەت جۇماعاليۇلى

Abai.kz