قازاقستان مۇنايدى تەك ءوندىرىپ، شيكىزات كۇيىندە ساتۋ تاۋەلدىلىگىن ازايتپاق!

قازاقستان مۇناي وڭدەۋ سالاسىن دامىتۋدىڭ 2025–2040 جىلدارعا ارنالعان تۇجىرىمداماسى اياسىندا مۇناي وڭدەۋ كولەمىن جىلىنا 18 ميلليوننان 39 ميلليون تونناعا دەيىن ارتتىرۋدى كوزدەپ وتىر. بۇل تۋرالى «ورتالىق ازيا مەن كاسپيدىڭ مۇناي-گاز حيمياسى جانە مۇناي وڭدەۋى – 2026» جىل سايىنعى سامميتىندە ەنەرگەتيكا مينيسترلىگىنىڭ وكىلدەرى مالىمدەدى.

جاڭا تۇجىرىمداما مۇناي ءوندىرۋ مەن ونى وڭدەۋ اراقاتىناسىن 5:1 كورسەتكىشىنەن (شيكىزاتتىڭ بەستەن ءبىر بولىگى عانا وڭدەلەدى) 2,5:1 دەڭگەيىنە دەيىن تومەندەتۋگە باعىتتالعان. جوبانى ىسكە اسىرۋ ءۇشىن 15-تەن 19 ميلليارد دوللارعا دەيىن ينۆەستيتسيا تارتۋ جوسپارلانىپ وتىر. ناتيجەسىندە جاڭا جۇمىس ورىندارى اشىلىپ، سالانىڭ عىلىمي-تەحنيكالىق بازاسى نىعايادى، سونداي-اق مۇناي جانە مۇناي-حيميا ونىمدەرىنىڭ ەكسپورتىن ۇلعايتۋعا مۇمكىندىك تۋادى.

Abai.kz