قازاقستاندا تاريحي اتامەكەنىنە ورالعان قازاقتاردىڭ رەسمي تۇردە «قانداس» مارتەبەسىن الۋى نەمەسە ەلدە تۇراقتى تۇرۋعا رۇقسات بەرەتىن ىقتيارحاتقا يە بولۋى ءۇشىن قازاق تىلىنەن ونلاين تەست تاپسىرۋ تالابى ەنگىزىلۋدە.

كوشى-قون الەۋەتىن باعالاۋ كەزەڭدەرىنىڭ ءبىرى سانالاتىن بۇل ەمتيحان ەكى بولىمنەن تۇرادى: تىڭدالىم جانە وقىلىم. ۇمىتكەرلەرگە 1 ساعات 10 مينۋت (70 مينۋت) ىشىندە 60 سۇراققا جاۋاپ بەرۋ جۇكتەلەدى. سىناقتان ءساتتى ءوتۋ ءۇشىن ءار ءبولىم بويىنشا كەمىندە 70% مەجەلىك بالل جيناۋ قاجەت.

مينيسترلىكتىڭ تۇسىندىرۋىنشە، بۇل تاپسىرمالار ءتىلدى تەرەڭ مەڭگەرۋدى ەمەس، ۇمىتكەردىڭ كۇندەلىكتى قارىم-قاتىناستا قازاقشا ەركىن سويلەسىپ، قاراپايىم ماتىندەردى ءتۇسىنۋ دەڭگەيىن تەكسەرۋگە باعىتتالعان. سونىمەن قاتار، جاۋاپتى مەكەمە تەست تاپسىرمالارىنىڭ «قيىن ەمەستىگىن» ايتىپ وتىر.

ەگەر ۇمىتكەر العاشقى مۇمكىندىكتە جەتكىلىكتى بالل جيناي الماسا، وعان 30 كۇنتىزبەلىك كۇن ىشىندە تاعى ەكى رەت قايتا تاپسىرۋعا مۇرسات بەرىلەدى. ءاربىر جاڭا تالپىنىس ءۇشىن بولەك تولەم جاسالۋى ءتيىس.

بۇل تىلدىك تەست بيىلعى اقپان ايىندا ىسكە قوسىلعان پيلوتتىق جوبا اياسىندا ەنگىزىلگەن. كوشى-قون الەۋەتىن كەشەندى باعالاۋ كەزىندە ءتىل بىلىمىنەن بولەك ۇمىتكەردىڭ ءبىلىمى، جۇمىس ءوتىلى (تاجىريبەسى) جانە وتباسى قۇرامى دا ەسكەرىلەدى.

Abai.kz