مەملەكەت باسشىسى بۇۇ-نىڭ بۇرىنعى باس حاتشىسى پان گي مۋندى قابىلدادى.

پرەزيدەنت قاسىم-جومارت توقاەۆ سەۋلگە مەملەكەتتىك ساپارى اياسىندا بىرىككەن ۇلتتار ۇيىمىنىڭ 8-ءشى باس حاتشىسى، جاھاندىق جاسىل دامۋ ينستيتۋتىنىڭ (GGGI) توراعاسى پان گي مۋنمەن جۇزدەستى.

مەملەكەت باسشىسى دامۋشى ەلدەردىڭ «جاسىل ەكونوميكا» مودەلىنە كوشۋىنە قولداۋ بىلدىرەتىن GGGI قىزمەتىنىڭ ماڭىزىنا توقتالدى. ول الەۋمەتتىك تۇراقتىلىقتى، كليمات وزگەرىستەرىنە توزىمدىلىكتى جانە ەكونوميكالىق دامۋدى قامتاماسىز ەتۋگە باعىتتالعان.

پان گي مۋن قازاقستاننىڭ ورنىقتى دامۋ سالاسىنداعى تابىستارىن قۇپتاپ، دۇنيەجۇزىلىك كليمات كۇن ءتارتىبى اياسىندا ىنتىماقتاستىقتى جالعاستىرۋعا دايىن ەكەنىن مالىمدەدى.

سونىمەن قاتار قاسىم-جومارت توقاەۆ پەن پان گي مۋن بىرىككەن ۇلتتار ۇيىمىن رەفورمالاۋ جانە ونى قازىرگى زامان تالابىنا بەيىمدەۋ تۋرالى پىكىر الماستى.

Abai.kz