ورالدا جىلۋ ماۋسىمى باستالار تۇستا «جايىقجىلۋقۋات» اق گازدان اجىراتىلدى. ارادا ءبىر كۇن وتكەن سوڭ جەرگىلىكتى اكىمدىك بيۋدجەتتەن قارجى ءبولۋ تۋرالى شەشىم قابىلدادى.

باتىس قازاقستان وبلىسىنىڭ ورال قالاسىندا كەزەكتى جىلۋ بەرۋ ماۋسىمىنا دايىندىق جۇرگىزىلدى. «جايىقجىلۋقۋات» اق 13 قىركۇيەكتەن باستاپ نەگىزگى جابدىقتاردى جوسپارلى تۇردە توقتاتىپ، جوندەۋ، پروفيلاكتيكالىق جانە دياگنوستيكالىق جۇمىستاردى اتقاردى، سونداي-اق جابدىقتاردى سىناقتان وتكىزدى. قايتا ىسكە قوسۋ 21 قىركۇيەككە جوسپارلانعان بولاتىن.

جىلۋ-ەلەكتر ورتالىعىنداعى بارلىق قاجەتتى جۇمىستار 16 قىركۇيەكتە اياقتالدى. كاسىپورىندى قايتا ىسكە قوسۋعا دايىندىق كەزىندە تابيعي گاز جەتكىزۋشى الدىنداعى بەرەشەكتى وتەۋ ماسەلەسى تۋىندادى.

بۇگىنگى تاڭدا «جايىقجىلۋقۋات» اق-نىڭ «QAZAQGAZ Aimaq» اق الدىنداعى تابيعي گاز بويىنشا قارىزى 3,542 ميلليارد تەڭگەنى قۇرايدى. ونىڭ 1 ميلليارد تەڭگەسىن جەرگىلىكتى بيۋدجەت قاراجاتى ەسەبىنەن وتەۋ جوسپارلانىپ وتىر. قالعان بەرەشەك سوماسى بويىنشا كەزەڭ-كەزەڭىمەن وتەۋ كەستەسى ازىرلەنەدى.

«17 قىركۇيەك ساعات 09:00-دەگى جاعداي بويىنشا ورال جەو-سىنا تابيعي گاز بەرۋ قايتا باستالدى. قازىرگى ۋاقىتتا جابدىقتاردى ىسكە قوسۋ جۇمىستارى جۇرگىزىلۋدە. بۇگىن ساعات 17:00-گە دەيىن تۇتىنۋشىلار ىستىق سۋمەن قامتاماسىز ەتىلەدى»، — دەپ حابارلادى ورال قالاسى اكىمىنىڭ ءباسپاسوز قىزمەتى.

بقو ەنەرگەتيكا جانە تۇرعىن ءۇي-كوممۋنالدىق شارۋاشىلىق باسقارماسىنىڭ حابارلاۋىنشا، «جايىقجىلۋقۋات» اق-نىڭ «QAZAQGAZ Aimaq» اق الدىنداعى 1 ميلليارد تەڭگە قارىزى ەرتەڭگە دەيىن وتەلەدى. قارجى جەرگىلىكتى بيۋدجەتتەن اۋدارىلادى.

ءوز كەزەگىندە «QazaqGaz Aimaq» اق بۇگىن گاز بەرۋ قايتا قالپىنا كەلتىرىلگەنىن، ال قارىزدى وتەۋ ماسەلەسى بويىنشا كەلىسسوزدەر ءجۇرىپ جاتقانىن حابارلادى.

ايتا كەتەيىك، ەلىمىزدە جىلۋ بەرۋ ماۋسىمى باستالىپ كەتتى. سونىڭ ىشىندە پاۆلودار قالاسىنىڭ الەۋمەتتىك نىساندارىنا جىلۋ بەرىلدى.

Abai.kz