جامبىل وبلىسىندا اۋىر جول اپاتىنان كەيىن بىرنەشە اپتا كومادا جاتقان ەر ادام ەسىن جيدى. قازىر ول سويلەپ، جاقىندارىن تانيدى. 

ناۋقاستىڭ جاعدايى تۋرالى ءماجىلىستىڭ بۇرىنعى دەپۋتاتى باقىتجان بازاربەك مالىمدەدى. ول تاراز قالالىق كوپبەيىندى اۋرۋحاناسىنىڭ الدىندا تۇسىرىلگەن ءستوريستى ءبولىستى. 

— نۇرجىگىت تاراز قالالىق كوپبەيىندى اۋرۋحاناسىنان 31 كۇننەن كەيىن شىعارىلدى. ول سوڭعى ءۇش كۇندە اۋرۋحانادان شىعاتىن ءساتتى تاعاتسىزدانا كۇتكەن، — دەپ جازدى باقىتجان بازاربەك.

ەكس-دەپۋتات نۇرجىگىتتىڭ قازىرگى جاعدايى تۋرالى ايتىپ، ونىڭ كەلگەن ادامداردى تانيتىنىن، سويلەيتىنىن جەتكىزدى.

سونىمەن قاتار ول نۇرجىگىتتىڭ ەسىن جيعان ءساتىن دە باياندادى. رەانيماتولوگ عامزات مۇساەۆقا ول ءوزىن جاقسى سەزىنەتىنىن، الايدا قولى مەن باسى اۋىراتىنىن ايتقان.
دارىگەر ناۋقاستىڭ سۇراقتاردى ءتۇسىنىپ، دۇرىس جاۋاپ بەرىپ وتىرعانىنا كوز جەتكىزگەن سوڭ، باقىتجان بازاربەككە حابارلاسقان.

باقىتجان بازاربەك جۇبايى ادەلمەن بىرگە تاكسيدە كەلە جاتقاندا، دارىگەر وعان: «باكە، ءسۇيىنشى! نۇرجىگىت وياندى!» — دەپ ايتقان. بۇل جاڭالىقتى ەستىگەندە، ول كوز جاسىنا ەرىك بەرگەن.

ەكس-دەپۋتات جازباسىندا قۇلان مەن تارازداعى مەديتسينا ماماندارىنا العىس بىلدىرگەن. ونىڭ ايتۋىنشا، دارىگەرلەر مەن مەدبيكەلەر نۇرجىگىتتىڭ جاعدايىن كۇنى بويى باقىلاپ، وبلىس ورتالىعىنىڭ ماماندارى اۋداندىق اۋرۋحاناعا تۇراقتى بارىپ تۇرعان.

اقزات جيەنالينا

دەرەككوزى: قازاقپارات

Abai.kz