كەشە عانا «قىتاي ساقالعا جول جاپتى» اتتى ماقالا شىعاردىق...

سوندا قۇندى جازباسىن قالدىرعان «اعىلشىن ءتىلى مۇعالىمى جاننا» دەپ قول قويعان اۆتورعا ىزدەۋ سالعان ەدىك. بىراق، تاپپاعان سوڭ، ماتەريالدىڭ  وزەكتىلىگىنە بايلانىستى جۇمباق قىز جاننانىڭ جازباسىن ماقالادا سو قالپىندا جاريالادىق. ماقالا قىزۋ وقىلىپ جاتىر.

سۋرەت: Abai.kz سكرينى.

سودان ءبىرشاما ۋاقىتتان سوڭ، «اعا، سالەمەتسىز بە؟ جاننا مەن بولامىن» دەپ جازعان سالەمدەمە كەلدى، ىزدەگەن قىزىمىز تابىلدى. قاراساق، ول الماتىدا « Alem Centre Arai» جشس باس ديرەكتورى، بالالاردى اعىلشىن تىلىنە ۇيرەتۋ مەكتەبىنىڭ جەتەكشىسى ءارى ۇستازى  جاننا ەسەنالى بولىپ شىقتى.

قىز تابىلعان سوڭ، ودان سايتىمىزدىڭ وقىرماندارىنا ءوزىن تانىستىرۋدى وتىندىك. جاننا تومەندەگى جازباسىن جىبەرىپتى، نازارلارىڭىزعا ۇسىنامىز:

مەن 15 جىل بويى الماتىدا تىلدەر ۇيرەتەتىن وقۋ ورتالىعىن باسقارىپ كەلەمىن  ءارى  وسىندا  اعىلشىن  تىلىنەن جانە  شەتەلدىكتەرگە  قازاق تىلىنەن  ساباق  بەرەمىن.

بۇل  مەنىڭ ماڭداي تەرىممەن قۇرعان جەكە كاسىبىم، ماعان سەنىپ جۇمىس ىستەپ جاتقان قانشاما وقىتۋشىنىڭ قۇتتى شاڭىراعى.

​شىنىمدى ايتايىن، وسى جىلدار ىشىندە تۇيگەنىم وتە كوپ. ءتىل ۇيرەتۋشى مامان ىزدەپ، حابارلاندىرۋ بەرگەندە اڭگىمەلەسۋگە (سوبەسەدوۆانيە) نەبىر ادامدار كەلەدى. بىراق ەسىكتى اشىپ، ىشكە ارابتىڭ قارا تۇمشاسىن جامىلىپ، حيدجابپەن كىرىپ كەلگەندەردى كورگەندە، كوزقاراسىم كىلت وزگەرەدى.

امانداسىپ، ءجون سۇراسقان سوڭ: «رەنجىمەڭىز، مىناداي كىرمە كيىممەن، بوگدە يدەولوگيالىق اتريبۋتپەن ءسىزدى جۇمىسقا الا المايمىن»، - دەپ بىردەن شىعارىپ سالامىن. كەيىن ءتىپتى  حابارلاندىرۋدىڭ وزىنە ناقتىلاپ جازاتىن بولدىم: «ورانىپ، تۇمشالانىپ جۇرگەندەر مازامدى الماسىن!»

​سوندا مەن مۇنى نە ءۇشىن ايتىپ وتىرمىن؟

​مەنىڭ ورتالىعىم  ارابتىڭ ورتاعاسىرلىق دوگمالارىن نەمەسە سەكتانتتىق تۇسىنىكتەردى تاڭايىن دەپ وتىرعان مەدرەسە ەمەس. ول  عىلىم مەن ءبىلىمنىڭ، وركەنيەتتىڭ وشاعى.

ءتىل ۇيرەنۋگە سەنىم ارتىپ كەلگەن ءاربىر وسكەلەڭ ۇرپاقتىڭ، ءاربىر ازاماتتىڭ قاۋىپسىزدىگى مەن سانا تازالىعى ءۇشىن مەن ەڭ الدىمەن ءوزىمنىڭ ار-وجدانىم مەن ابىرويىمنىڭ الدىندا باسپەن جاۋاپ بەرەمىن!

ماعان سەنىپ تاپسىرىلعان وزگەنىڭ ورىمدەي بالاسىنا وقىتۋشىلارىمنىڭ ساپالى ساباق ەمەس، بوگدە اعىمنىڭ ۋاعىزىن ايتىپ، ساناسىن ۋلاۋىنا، بولاشاعىنا بالتا شابۋىنا ەشقاشان جول بەرمەيمىن! ءبىلىم ورداسىنىڭ كيەلى تابالدىرىعىن ءدىني ۇگىت-ناسيحاتتىڭ الاڭىنا اينالدىرۋعا قۇقىعىم دا، مورالدىق حاقىم دا جوق.

بىزگە عىلىمدى، زاماناۋي تەحنولوگيانى، الەمدىك تىلدەردى مەڭگەرگەن، ساناسى اشىق، وركەنيەتتى ماماندار كەرەك. جاستاردىڭ ساناسىن كىشكەنتايىنان كىرمە دوگمالارمەن ۋلاپ، «ورانباساڭ كۇناھارسىڭ» دەگەن قورقىنىشپەن ءوسىرۋ  ەلدىڭ بولاشاعىنا جاسالعان شابۋىل.

كاسىپ يەسى  جانە  وقىتۋشى رەتىندە دە،  قازاقستان رەسپۋبليكاسىنىڭ پاتريوت ازاماتى رەتىندە دە ايتارىم جالعىز: ءبىزدىڭ جولىمىز  ارابتانۋ ەمەس، ءبىلىم، عىلىم جانە ەگەمەندىك!

اتا زاڭىمىز ۇستەم، تاۋەلسىزدىگىمىز تۇعىرلى بولسىن!

​سىزدەرگە قۇرمەتپەن: جاننا ەسەنالى

ماقالانى دايىنداعان ءابدىراشيت باكىرۇلى

Abai.kz