بەيبىت كۇندە ساربازدارىمىز سۋعا كەتتى. 14-ءىنىڭ دەنەسى تابىلدى. تاعى 3-ەۋى قۇتقارىلدى. بۇگىن جالپىۇلتتىق ازا تۇتۋ كۇنى جاريالاندى...

ۇكىمەتتىك كوميسسيا قۇرىلىپ، قىلمىستىق ءىس قوزعالدى دەسەك تە، قازا تاپقان ءاربىر ساربازدىڭ قارالى حابارى ءاربىرىمىزدىڭ قابىرعامىزدى قايىستىرىپ تاستاعانى راس...

***

2006 جىلى «حاماس-تىقتار» گازا سەكتورى اۋماعىنان قازىلعان جەراستى جولى ارقىلى ءۇش باعىتتان يزاريلگە شابۋىل جاسايدى. «حاماس-تىقتار» قولدا بار قارۋىن تۇگەل قولدانادى. تانككە قارسى سناريادتاردىڭ ءبىرى يزرايل تانكىنە ءدوپ ءتيىپ، ىشىندەگى جاس سارباز (كاپرال - بىزشە كىشى سەرجانت) قولدى بولادى. ول - گيلاد شاليت دەگەن جىگىت ەدى.

گيلاد تۇپ-تۋرا 5 جىل 4 اي «حاماس» تۇتقىنىندا بولعان. يزرايل 2011 جىلى وسى گيلادتى اۋقىمدى قۇن تولەپ (ايىرباس) قۇتقارىپ الدى. يزرايل 1 ساربازعا (گيلادقا) 1027 پالەستينالىق تۇتقىندى ايىرباس قىلعان. تاريحتا بۇل ايىرباس – «شاليت كەلىسىمى» دەپ جازىلىپ قالدى...

بۇل وقيعا يزرايل ءۇشىن ءاربىر ساربازدىڭ قۇنى دۇشپاننىڭ مىڭ تۇتقىنىنان جوعارى ەكەنىن كورسەتەدى.

***

«قىتاي ارمياسى كوپتىگىمەن جەڭەدى» دەپ ويلاعان ماوشا ەسەپ قىلار ءجونىمىز دە، جەرىمىز دە جوق. ءبىز ءۇشىن ءاربىر ساربازدىڭ ءومىرى - قىمبات. وتاندى قورعاۋ جولىندا جۇرگەن ءاربىر ازاماتتىڭ ءومىرى مەن دەنساۋلىعىن ساقتاۋ - مەملەكەتتىڭ، اسكەري باسشىلىقتىڭ جانە بۇكىل قوعامنىڭ باستى مىندەتى. بۇل كونستيتۋتسيامىزدا ناقتى جازىلعان.

مارقۇم بولعان باۋىرلاردىڭ وتباسى-جاقىندارىنا كوڭىل ايتامىز. بۇل جاعدايدىڭ سەبەبى انىقتالىپ، ادامي فاكتورعا جاۋاپتىلار جازالانادى دەپ سەنەمىز...

نۇرگەلدى ابدىعانيۇلى

Abai.kz