قازاقستاندا ماۋسىمدىق تۇماۋعا قارسى تەگىن ۆاكتسيناتسيا ناۋقانى باستالدى. ول ءۇشىن ۆاكتسينانىڭ 2,1 ملن دوزاسى ساتىپ الىندى، دەپ حابارلايدى دەنساۋلىق ساقتاۋ مينيسترلىگىنىڭ ءباسپاسوز قىزمەتى.

«قازاقستاندا ماۋسىمدىق تۇماۋعا قارسى ەكپە سالۋ ناۋقانى باستالادى. حالىقتى تەگىن ۆاكتسيناتسيالاۋ ءۇشىن ۆاكتسينانىڭ 2,1 ملن دوزاسى ساتىپ الىندى. العاشقى 564 مىڭ دوزا ەلگە جەتكىزىلىپ، وڭىرلەرگە كەزەڭ-كەزەڭىمەن جىبەرىلىپ جاتىر»، - دەلىنگەن جۇماداعى حابارلامادا.

ۆاكتسينا الماتى، تۇركىستان جانە جەتىسۋ وبلىستارىنا، سونداي-اق الماتى مەن شىمكەنت قالالارىنا جەتكىزىلگەنى اتاپ وتىلەدى. قالعان وڭىرلەرگە جەتكىزۋ 5 قازانعا دەيىن جوسپارلانعان. ۆاكتسينا تۇسكەن ايماقتاردا مەديتسينالىق ۇيىمدار حالىقتى ەگۋدى باستاپ كەتتى.

«ناۋقاندى وتكىزۋ ءۇشىن رەسەيدە وندىرىلگەن «گريپپول®️» ۆاكتسيناسى ساتىپ الىندى. ونىڭ شتاممدىق قۇرامى دۇنيەجۇزىلىك دەنساۋلىق ساقتاۋ ۇيىمىنىڭ الداعى ەپيدەميالىق ماۋسىمعا ارنالعان ۇسىنىمدارىنا سايكەس كەلەدى»، - دەلىنگەن حابارلامادا.

ءبىرىنشى كەزەڭدە تەگىن ۆاكتسيناتسيانى تۇماۋعا جانە ونىڭ اسقىنۋلارىنا بارىنشا بەيىم حالىق توپتارى الادى. ولارعا مەديتسينا قىزمەتكەرلەرى، ديسپانسەرلىك ەسەپتە تۇرعان بالالار، جەتىم بالالار مەن اتا-اناسىنىڭ قامقورلىعىنسىز قالعان بالالار، مەديكو-الەۋمەتتىك مەكەمەلەردىڭ قىزمەت الۋشىلارى مەن قىزمەتكەرلەرى، سونداي-اق ەپيدەميولوگيالىق كورسەتكىشتەر بويىنشا جۇقتىرۋ قاۋپى جوعارى ادامدار جاتادى.

وڭىرلەرگە ۆاكتسيناتسيانى ۋاقىتىلى باستاۋ جانە ماقساتتى توپتار ءۇشىن ونىڭ قولجەتىمدىلىگىن قامتاماسىز ەتۋ تاپسىرىلدى.

«قازان ايى سىرقاتتانۋشىلىقتىڭ ماۋسىمدىق وسۋىنە دەيىن ۆاكتسيناتسيا جاساۋ ءۇشىن ەڭ وڭتايلى كەزەڭ بولىپ تابىلادى. ەكپەدەن كەيىن اعزاعا يممۋندىق قورعانىستى قالىپتاستىرۋ ءۇشىن ۋاقىت قاجەت. ۆاكتسيناتسيا تۇماۋمەن اۋىرۋ قاۋپىن، ەڭ باستىسى، ونىڭ اۋىر ءوتۋى مەن اسقىنۋ ىقتيمالدىعىن تومەندەتۋگە كومەكتەسەدى»، - دەپ تولىقتىردى دەنساۋلىق ساقتاۋ مينيسترلىگىنەن.

ماقساتتى توپتاعى ازاماتتارعا ۆاكتسيناتسيا تۋرالى اقپاراتتى ناقتىلاۋ ءۇشىن تىركەلگەن جەرى بويىنشا مەديتسينالىق ۇيىمدارعا حابارلاسۋ ۇسىنىلادى.

Abai.kz