سوڭعى كۇندەرى ۋاشيڭتون مەن كيەۆ ايتىسى قىزا ءتۇستى. ترامپ زەلەنسكيگە شۇيلىگىپ، ۋكراينانىڭ پرەزيدەنتتىك سايلاۋ وتكىزۋى جايلى ءسوزدى قايتا قوزعاعان...

- ۋكرايندەرگە جاڭا، كەلىسسوز جاساي الاتىن ليدەر تاڭداۋى كەرەك. زەلەنسكيدە كوپ مارتە كەلىسىم جاساسۋ مۇمكىندىگى بولدى. بىراق ول، نەگەسى بەلگىسىز كەلىسىم جاساسپادى. ءبىز ولارعا "باسقاسىن ۇرساڭ دا، ديزەلگە تيىسپە" دەدىك. ال ول ديزەلدى توقتاۋسىز سوققىلادى. بۇلاي بولمايدى. باسقاسىن ۇرا بەر، بىراق ديزەلگە تيىسپە، - دەدى ترامپ.

بۇل ءسوزىن ترامپ كەيىن تاعى 2 مارتە قايتالاپ: ء"بىز ۋكرايناداعى پرەزيدەنت سايلاۋى دەگەن ماسەلەنى مايشاممەن قاراستىرامىز", - دەدى.

كيەۆتىڭ جاۋابى كوپ كۇتتىرمەدى. اۋەلى ۋكراينانىڭ ءسىم باسشىسى اندرەي سيبيگا ترامپتىڭ سوزىنە جاۋاپ بەردى:

- پرەزيدەنت زەلەنسكي ءبىزدىڭ ەلىمىزدى جاي كەزدە ەمەس، سوعىس ءجۇرىپ جاتقان قيىن كەزەڭدە باسقارىپ وتىر. بۇل سوعىس - تاۋەلسىزدىك ءۇشىن ءجۇرىپ جاتقان سوعىس. ەركىندىك پەن ابىروي ءۇشىن ءجۇرىپ جاتقان سوعىس! زەلەنسكي ۋكراينا حالقىنىڭ قولداۋىنا يە! ءبىزدىڭ ەلىمىزدى كىم باسقارۋى كەرەكتىگىن شەتەلدەگىلەر ەمەس، ۋكراينا حالقى ءوزى شەشەدى. ال ترامپتىڭ زەلەنسكي تۋرالى ايتقاندارى - زەلەنسكيدىڭ ءوز مىندەتىن لايىقتى اتقارىپ جاتقانىن كورسەتەدى، - دەدى.

ونان سوڭ زەلەنسكيدىڭ ءوزى دە ترامپقا جاۋاپ بەردى:

- پرەزيدەنت ترامپقا دەگەن بار قۇرمەتىممەن ايتايىن - قانداي دا ءبىر ليدەردى تاڭداۋ - ءبىزدىڭ حالقىمىزدىڭ، قوعامىمىزدىڭ ىشكى شارۋاسى. ءيا، ءبىز سوعىس جاعدايىندامىز. مۇنداي كەزدە سايلاۋ وتكىزۋ قيىننىڭ قيىنى. ءتىپتى، قاۋىپتى ءىس. بۇل ءبىزدىڭ كونستيتۋتسيامىزعا قايشى. بىزدە قازىر ءتىپتى، سايلاۋ وتكىزەتىن ءجوندى ينفراقۇرىلىم دا جوق. سوندىقتان، كىمدى قاشان سايلايتىنىن ۋكراينا حالقى ءوزى شەشىپ الادى. ال شىنىنا كەلگەندە ۋكراينا حالقى قازىر ۋكراينا پرەزيدەنتى ەمەس، رەسەي پرەزيدەنتى اۋىسقانىن قالاپ وتىر، - دەدى.

وسىدان سوڭ ترامپ ۋكراينا مەن رەسەي - قوس تاراپ ەنەرگەتيكالىق بىتىمگە كەلگەنىن حابارلاعان. ونىسىن نە كيەۆ، نە ماسكەۋ بىلمەيتىن بولىپ شىقتى. بىراق، قوس تاراپ تا ماقۇلعا كوندى.

ال Axios: “ترامپ ۇسىنعان ەنەرگەتيكالىق كەلىسىم ەڭ الدىمەن تاراپتاردىڭ ءموز-دەرىنە قاتىستى" ەكەنىن جازدى. وندا دا بۇل اڭگىمە ماياميدە از-كەم تالقىلانعان. تاراپتار تۇپكىلىكتى كەلىسىمگە كەلمەسە دە، اقش ءبىتىمدى جاريالاپ جىبەرگەن. كەيىن قوس تاراپ وعان كەتارىلىك كورسەتپەگەن.

CNN-ءنىڭ جازۋىنشا: پەنتاگون مەن اق ءۇي كيەۆكە ءبىرشاما تىزە باتىرىپ جىبەرگەن. وسى جەكسەنبىدە ۋكراينا مەن ەۋروپا ەلدەرىنە رەسمي ەسكەرتۋ جولداعان. اقش كيەۆتەن رەسەيلىك ءموز-دەردى اتقىلاماۋدى تالاپ ەتكەن. ۋكراينا بۇل تالاپتى ورىنداماسا، وندا اقش بارلاۋ اقپاراتىن بەرۋدى دەرەۋ توقتاتىپ، كيەۆكە قارۋ ساتپايتىنىن ايتقان. وسىدان سوڭ، كيەۆ كونگەن.

ال پرەزيدەنتتىك سايلاۋعا قاتىستى زەلەنسكي: "كورەيىك، ەگەر رەسەي مايداننىڭ بارلىق شەبىندە ءبىتىمدى 60 كۇن ساقتاي الاتىن بولسا، ۇرىستى توقتاتار بولسا پرەزيدەنتتىك سايلاۋ وتكىزۋگە بولادى. بىراق، ولار سول ءبىتىمدى ساقتاي قويۋىنا كۇمانىمىز كوپ", - دەگەن.

بۇگىن ماسكەۋدەن پەسكوۆ شىعىپ: "ەگەر ۋكراينا سايلاۋ وتكىزەمىز دەسە، ءبىز ۇرىستى 1 كۇنگە، سايلاۋ كۇنىنە توقتاتا تۇرامىز", - دەدى.

ال ەندى بۇعان ترامپ نە دەر ەكەن؟ ترامپ بارىنە كيەۆتى ايىپتاپ، "ماسكەۋ ءبىتىم قالاپ وتىر" دەگەن ەدى. پەسكوۆتىڭ، كرەملدىڭ مىنا سوزدەرى ءبىتىم قالاعان تاراپتىڭ سوزىنە مۇلدە ۇقسامايدى...

نۇرگەلدى ابدىعانيۇلى

Abai.kz