قازاقستان ۇلتتىق بانكى سوڭعى ءبىر جارىم جىلدا العاش رەت التىن ساتۋعا كىرىستى. رەزەرۆتەردەگى باعالى مەتالدىڭ ۇلەسى 78%-عا دەيىن وسكەن. ەندى رەتتەۋشى جىل سوڭىنا دەيىن بۇل كورسەتكىشتى 75%-عا دەيىن تومەندەتۋدى كوزدەپ وتىر.

التىن نە ءۇشىن ساتىلىپ جاتىر؟

ۇلتتىق بانك توراعاسىنىڭ ورىنباسارى ءاليا مولدابەكوۆا Bloomberg اگەنتتىگىنە بەرگەن سۇحباتىندا ينۆەستيتسيالىق ستراتەگيانىڭ وزگەرۋىنە اقش مەملەكەتتىك وبليگاتسيالارى كىرىستىلىگىنىڭ ءوسۋى سەبەپ بولعانىن ءتۇسىندىردى. الدىڭعى اپتادا اقش-تىڭ 10 جىلدىق قازىناشىلىق وبليگاتسيالارىنىڭ كىرىستىلىگى سوڭعى 24 جىلداعى ەڭ جوعارى دەڭگەيگە جەتتى.

«مۇنداي جوعارى كورسەتكىشتى كوپتەن بەرى كورگەن جوقپىز. بۇل دوللاردىڭ ينۆەستيتسيالىق قۇنىن ارتتىرىپ، التىنعا ينۆەستيتسيا سالۋدىڭ تيىمدىلىگىن تومەندەتەدى»، – دەدى ءا. مولدابەكوۆا.

ونىڭ ايتۋىنشا، قازىرگى جاعدايدا التىننىڭ ۇلەسى تىم جوعارى بولعاندىقتان، قازاقستاننىڭ رەزەرۆتەرى ءبىر عانا اكتيۆكە تاۋەلدى پورتفەلگە ۇقساپ بارادى.

«التىننىڭ مۇنداي جوعارى ۇلەسىمەن رەزەرۆتەرىمىز جالعىز اكتيۆتەن تۇراتىن پورتفەلگە ۇقساي باستايدى. ال ۆاليۋتالىق رەزەرۆتەر ەڭ الدىمەن وتىمدىلىگىن ساقتاۋى ءتيىس»، – دەپ اتاپ ءوتتى ۇلتتىق بانك توراعاسىنىڭ ورىنباسارى.

قازاقستاننىڭ التىن قورى قانشا؟

ۇلتتىق بانك ەلدە وندىرىلگەن التىننىڭ بارلىعىن ساتىپ الۋعا باسىم قۇقىققا يە. قازاقستان التىن ءوندىرۋ كولەمى بويىنشا الەمدە سەگىزىنشى ورىندا تۇر.

2025 جىلعى اقپاندا التىن ساتۋدى توقتاتقاننان كەيىن ەلدىڭ التىن قورى 386 تونناعا دەيىن ءوستى. قىركۇيەك ايىنىڭ سوڭىنداعى جاعداي بويىنشا قازاقستاننىڭ حالىقارالىق رەزەرۆتەرى 66,4 ملرد دوللاردى قۇرادى، ونىڭ 78%-ى التىن ۇلەسىنە تيەسىلى.

التىن ۇلەسىن قىسقارتۋدىڭ جارتىسى وپتسيونداردى ساتۋ ارقىلى، ال قالعان جارتىسى فيزيكالىق التىندى تىكەلەي ساتۋ ەسەبىنەن جۇزەگە اسىرىلادى.

سونىمەن قاتار ءا. مولدابەكوۆا التىننىڭ ءبىر ۋنتسياسى 4 مىڭ دوللاردان تومەندەسە، ونىڭ رەزەرۆتەردەگى ۇلەسى بەلگىلەنگەن ماقساتتى دەڭگەيگە وزدىگىنەن دە تومەندەۋى مۇمكىن ەكەنىن ايتتى.

التىن باعاسى قالاي وزگەرۋدە؟

اقپان ايىنىڭ سوڭىندا اقش پەن يران اراسىنداعى قاقتىعىس باستالعالى التىن باعاسى شامامەن 20%-عا ارزاندادى. تاياۋ شىعىستان ەنەرگيا رەسۋرستارىن جەتكىزۋدەگى ىركىلىستەر ينفلياتسيانى ۇدەتىپ، وبليگاتسيالاردىڭ كىرىستىلىگىن ارتتىردى. بۇل پايىزدىق تابىس اكەلمەيتىن التىننىڭ ينۆەستيتسيالىق تارتىمدىلىعىن تومەندەتتى.

قاڭتار ايىندا التىننىڭ ءبىر ۋنتسياسىنىڭ باعاسى رەكوردتىق 5 600 دوللارعا جەتكەن ەدى. قازىر ول شامامەن 4 172 دوللار دەڭگەيىندە ساۋدالانىپ جاتىر.

ماۋسىم ايىنان بەرى التىن باعاسى 4 000–4 300 دوللار ارالىعىندا تۇراقتالدى.

التىن ساتۋ شارالارىنا قاراماستان، ءاليا مولدابەكوۆا ونىڭ باعاسى الداعى ۋاقىتتا قايتا ءوسۋى مۇمكىن دەپ ەسەپتەيدى:

«نارىقتاعى بەلگىسىزدىك دەڭگەيى ءالى دە جوعارى. سوعان قاراماستان، التىن باعاسى ءسال دە بولسا وسەدى دەپ كۇتىپ وتىرمىز. سوندىقتان ۇزاق مەرزىمدى كەسىمدى جوسپارلار قۇرمايمىز. الدىمەن التىننىڭ رەزەرۆتەردەگى ۇلەسىن 75%-عا دەيىن تومەندەتىپ، ودان كەيىنگى نارىق كونيۋنكتۋراسىن باقىلايتىن بولامىز»، – دەدى ۇلتتىق بانك توراعاسىنىڭ ورىنباسارى.

Abai.kz