بيىلعى توعىز ايدا بيزنەسكە بەرىلگەن نەسيە بىردەن 19,6 پايىزعا ارتىپ، 15,8 تريلليون تەڭگەگە جەتتى، دەپ حابارلايدى Ertenmedia.kz.

ءا دەگەندە، ەلدە ىسكەرلىك بەلسەندىلىك ويانعانداي اسەر قالدىرادى. الايدا قارجىگەرلەر قاۋىمداستىعىنىڭ سوڭعى تالداۋىنا ۇڭىلسەڭىز، تاڭعالارلىق پارادوكسكە كۋا بولاسىز.

نارىقتاعى «ءوسىم» جاڭا كاسىپورىن ەسەبىنەن ەمەس، بۇرىننان كرەديت الىپ كەلگەن كوزتانىس ءارى ءىرى قارىز الۋشىلاردىڭ بانكتى قايتا-قايتا جاعالاۋىنان تۋىنداپ وتىر ەكەن. بانكتەر ءسىز بەن ءبىز سەكىلدى كاسىپ باستاعىسى كەلەتىن قاۋىمعا ەسىك اشۋدان گورى، ەسكى كليەنتتەرىنە ءليميتتى ەسەلەپ ارتتىرىپ جاتىر.

شىن مانىندە، بەرىلگەن قىرۋار قارجىنىڭ 85 پايىزى نەبارى ءۇش-اق سالانىڭ اۋزىنا تۇسكەن:

• ونەركاسىپ سەكتورى – ءوسىمنىڭ 42%-ى;
• ساۋدا سالاسى – 31%-ى;
• قۇرىلىس سەكتورى – 12%-ى.

بۇل نەنى بىلدىرەدى؟

كومپانيالار زاۋىت-فابريكا اشىپ، ءوندىرىس قۋاتىن كەڭەيتىپ جاتقان جوق. اينالىم قاراجاتىن تولىقتىرۋ، ياعني كۇندەلىكتى شىعىنىن جاۋىپ، جۇمىسىن توقتاتپاۋ ءۇشىن قىسقا مەرزىمدى نەسيەنى ءجيى-ءجيى الىپ، تەز-تەز وتەۋگە كوشكەن.

ەڭ قاۋىپتى سيگنال – ساۋدا سالاسىنان كەلىپ تۇر. مۇندا ۋاقىتىلى تولەنبەگەن، پروبلەمالىق قارىز كولەمى بىردەن 85,4 ميلليارد تەڭگەگە جەتىپ، جالپى ۇلەسى 3,8-دەن 5,8 پايىزعا دەيىن ىرشىپ كەتكەن. حالىقپەن تىكەلەي بايلانىستى سالانىڭ قارىزعا بەلشەدەن باتۋى ىشكى سۇرانىس پەن تولەم قابىلەتىنىڭ سىر بەرە باستاعانىن اڭعارتادى.

تۋراسىن ايتقاندا، بانكتەر قاۋىپسىز جولدى تاڭداپ العان. تانىس-ءبىلىس بولىپ كەتكەن ءىرى كومپانيالارعا ميللياردتاردى قايتا-قايتا اينالدىرىپ بەرۋدە. ناقتى ەكونوميكانى العا سۇيرەيتىن ستارتاپتار مەن جاڭا باستامالار ءۇشىن بۇلاردىڭ ەسىگى ءالى دە تارس جابىق.

Abai.kz