«استانا تازالىق» جشس-ءنىڭ وندىرىستىك بازاسىندا 2026-2027 جىلدارداعى قىسقى ماۋسىمعا دايىندىق اياسىندا ارنايى تەحنيكالاردىڭ دايىندىعى تەكسەرىلدى.

ءىس-شاراعا استانا قالاسى اكىمىنىڭ ورىنباسارى، قالالىق كوممۋنالدىق شارۋاشىلىق باسقارماسىنىڭ باسشىسى جانە كاسىپورىن قىزمەتكەرلەرى قاتىستى. قاتىسۋشىلارعا قىسقى كەزەڭدە قالا اۋماقتارىن تازالاۋعا ارنالعان تەحنيكا تانىستىرىلىپ، جۇمىستاردى ۇيىمداستىرۋ ءتارتىبى تۋرالى باياندالدى.

قىسقى ماۋسىمعا كاسىپورىننىڭ 354 بىرلىك ارنايى تەحنيكاسى ساقاداي ساي تۇر. تەحنيكا سارىارقا، نۇرا، سارايشىق، الماتى جانە ەسىل اۋداندارى بويىنشا بولىنگەن. كاسىپورىننىڭ قىزمەت كورسەتۋ اۋماعىنا جالپى كولەمى 13 ملن شارشى مەتردەن اساتىن 143 كوشە كىرەدى. قالانى تازالاۋ ءۇشىن 18 مارشرۋت جاساقتالعان. قاجەت بولعان جاعدايدا قوسىمشا 530 بىرلىككە دەيىن ارنايى تەحنيكا تارتۋعا مۇمكىندىك بار. قىسقى كەزەڭدە ەلوردانى قاردان تازالاۋ جۇمىستارىنا 700-دەن استام جۇمىسشى جۇمىلدىرىلادى.

«استانا قالاسى اكىمدىگىنىڭ قولداۋىمەن بيىل كاسىپورىننىڭ ماتەريالدىق-تەحنيكالىق بازاسىن جاڭارتۋ اياسىندا 2,9 ملرد تەڭگەگە 23 بىرلىك ارنايى تەحنيكا ساتىپ الۋ جۇمىستارى جۇرگىزىلدى. الداعى جىلدارى تاعى 70 بىرلىك تەحنيكا ساتىپ الۋ جوسپارلانىپ وتىر. وندىرىستىك بازالاردى اباتتاندىرۋ جانە قىزمەتكەرلەرگە قولايلى ەڭبەك جاعدايىن جاساۋ باعىتىنداعى جۇمىستار دا جاسالعان. بۇگىن ارنايى تەحنيكانىڭ قىسقى ماۋسىمعا دايىندىعىن كوردىك. كاسىپورىن الداعى مىندەتتەردى ورىنداۋعا دايىن دەپ سەنىممەن ايتۋعا بولادى»، - دەپ اتاپ ءوتتى استانا قالاسى اكىمىنىڭ ورىنباسارى ەرسىن وتەباەۆ.

«قىسقى كەزەڭدە ەڭ باستىسى - تەحنيكانىڭ دايىندىعى مەن جۇمىستىڭ ناقتى ۇيىمداستىرىلۋى. بۇگىنگى كۇنى ءار اۋدانعا بەلگىلى ءبىر اۋماقتار مەن تەحنيكا بەكىتىلگەن. ءبىز جالپى كولەمى 13 ملن شارشى مەتردەن اساتىن 143 كوشەنى تازالاۋدى قامتاماسىز ەتۋىمىز كەرەك. بۇل، اسىرەسە، قالىڭ قار جاۋعان كەزەڭدە وتە ۇلكەن جۇمىس كولەمى. وتكەن قىسقى ماۋسىمنىڭ قورىتىندىسى جۇمىسىمىزدىڭ جەدەلدىگى ارتىپ، تۇرعىنداردان تۇسەتىن شاعىمدار سانى ازايعانىن كورسەتتى. بۇل - بارلىق بولىمشەنىڭ ۇيلەسىمدى جۇمىسىنىڭ ناتيجەسى. الداعى قىسقى ماۋسىمدا دا تاۋلىك بويى جۇمىس ىستەپ، اۋا رايىنىڭ وزگەرۋىنە جانە تۇرعىنداردىڭ وتىنىشتەرىنە جەدەل ارەكەت ەتەمىز»، - دەدى «استانا تازالىق» جشس باس ديرەكتورى البەرت ەساليەۆ.

كاسىپورىننىڭ تەحنيكاسى قىسقى جاعدايدا جۇمىس ىستەۋگە دايىن، ال قىزمەتكەرلەردىڭ جۇمىسى الداعى جۇكتەمەنى ەسكەرە وتىرىپ ۇيىمداستىرىلعان. سونداي-اق كوكتايعاققا قارسى ماتەريالدار قورى ازىرلەنىپ، 7 177 توننا تەحنيكالىق تۇز بەن 413 توننا رەاگەنت دايىندالدى.

ءىس-شارا سوڭىندا رەسپۋبليكا كۇنىنە وراي كاسىپورىن قىزمەتكەرلەرىن ماراپاتتاۋ ءراسىمى ءوتتى. قىزمەتكەرلەرگە ادال ەڭبەگى جانە ەلوردا تازالىعىن قامتاماسىز ەتۋگە قوسقان ۇلەسى ءۇشىن ماراپاتتار مەن العىس حاتتار تابىستالدى.

قىسقى ماۋسىمدا قالانىڭ تازا ءارى قاۋىپسىز بولۋى ەڭ الدىمەن كوممۋنالدىق قىزمەت ماماندارىنىڭ ەڭبەگىنە بايلانىستى. قار جاۋىپ، اياز كۇشەيگەن كەزدە دە ولار ەلوردا كوشەلەرىن ۋاقتىلى تازالاپ، تۇرعىنداردىڭ قالىپتى قوزعالىسىن قامتاماسىز ەتۋ ءۇشىن جۇمىس ىستەيدى.

Abai.kz