قازاقستان رەسپۋبليكاسىنىڭ بوكستان سپورت شەبەرى باۋىرجان ءاليدىڭ قوس مايدانى

قازاق بوكسىنىڭ تاريحى — تەك شارشى الاڭداعى تارتىستارمەن عانا ەمەس، سول دودالاردا نامىس جىرتقان ءبىرتۋار تۇلعالاردىڭ مىنەزىمەن ورىلگەن شەجىرە. بۇگىندە وسى داڭقتى جولدى لايىقتى جالعاپ، سپورت پەن مەملەكەتتىك قىزمەتتىڭ جاۋاپكەرشىلىگىن تەڭ ۇستاپ جۇرگەن جاس بۋىن ءوسىپ كەلەدى.

سولاردىڭ بىرەگەيى — بوكستان حالىقارالىق ارەنادا ەل نامىسىن قورعاپ، سونىمەن بىرگە قۇقىق قورعاۋ سالاسىنىڭ بولاشاق وفيتسەرى اتانۋعا دايىندالىپ جۇرگەن قازاقستان رەسپۋبليكاسىنىڭ بوكستان سپورت شەبەرى باۋىرجان ءالي ادىلبەكۇلى.

باۋىرجان — بۇگىندە جاستار اراسىنداعى ازيا چەمپيوناتىنىڭ قولا جۇلدەگەرى، كادەتتەر مەن جاستار اراسىنداعى قازاقستاننىڭ ەكى دۇركىن كۋبوگىنىڭ يەگەرى. ونىڭ سپورتتىق مانسابىنداعى ايتۋلى بەلەستەردىڭ ءبىرى — وسكەمەندە وتكەن حالىقارالىق تۋرنيردەگى جارقىن جەڭىسى. وسى جەڭىسىنەن كەيىن جاس بىلعارى قولعاپ شەبەرى كاسىپقوي جانە اۋەسقوي بوكسشىلاردىڭ الەمدىك تانىمال «BoxRec» رەيتينگىندە ءوز سالماق دارەجەسى بويىنشا الگوريتمگە سايكەس ۇزدىك وندىققا (9-ورىنعا) ەنىپ، قازاق بوكسىنىڭ الەۋەتىن تاعى ءبىر دالەلدەدى.

بۇل جەتىستىكتىڭ وتاندىق سپورت تاريحىندا ورنى ەرەكشە جانە بۇل — بىرەگەي پرەتسەدەنت. سەبەبى، كۇندەلىكتى ۋاقىتى تەك جاتتىعۋمەن وتەتىن قاراپايىم ازاماتتىق سپورتشىلاردىڭ ءوزى باعىندىرا المايتىن حالىقارالىق BoxRec رەيتينگىنىڭ 9-ورىنىنا باۋىرجان قاتال اسكەري رەجيمدە ءجۇرىپ قول جەتكىزدى. ول — قازاقستان رەسپۋبليكاسى ءىىم بارىسبەك بەيسەنوۆ اتىنداعى قاراعاندى اكادەمياسىنىڭ 4-كۋرس كۋرسانتى، پوليتسيا سەرجانى.

ۇلتتىق ءتارتىپ پەن سپورتتى سەرىك ەتكەن قازاقستان رەسپۋبليكاسىنىڭ بوكستان سپورت شەبەرى كۇندەلىكتى كازارمالىق جانە اسكەري ءتارتىپتىڭ قاتال تالاپتارىنا باعىنا ءجۇرىپ، شارشى الاڭداعى جويقىن دايىندىقتارىن ءبىر ساتكە دە توقتاتقان ەمەس. اكادەميا قابىرعاسىنداعى تەمىردەي ءتارتىپ ونىڭ سپورتتاعى مىنەزىن شىڭداي تۇسسە، سپورتتاعى قايسارلىعى قىزمەتتە قىراعى بولۋعا سەپتىگىن تيگىزۋدە. ىشكى ىستەر ورگانىنىڭ بولاشاق وفيتسەرى رەتىندە ول مەملەكەتتىڭ قاۋىپسىزدىگى مەن ەل ىشىندەگى زاڭدىلىقتى قورعاۋدى باستى پارىزى سانايدى.

الەمدىك رەيتينگتە توپ جارىپ، ازيا دوداسىندا كوك بايراقتى جەلبىرەتكەن باۋىرجان ءاليدىڭ بۇل جەتىستىكتەرى — ۇلكەن ەڭبەك پەن قاجىرلىلىقتىڭ جەمىسى. سپورت پەن ءتارتىپتى تەڭ ۇستاعان سەرجانتتىڭ الداعى باعىندىرار بەلەستەرى بۇدان دا بيىك بولاتىنىنا كامىل سەنەمىز. قازاق ەلىنىڭ نامىسىن قورعايتىن وسىنداي قايسار ۇلدار باردا، كوك تۋىمىز تۇعىرىنان تۇسپەك ەمەس.

جامبىل وبلىسىنىڭ بوكس فەدەراتسياسى

Abai.kz