اقتوبە وبلىسىندا ورنالاسقان ءدوڭ تاۋ-كەن بايىتۋ كومبيناتىنا قاراستى قازاقستان تاۋەلسىزدىگىنىڭ 10 جىلدىعى اتىنداعى شاحتادا كەزەكتى قايعىلى وقيعا ورىن الدى.

29 قازاندا شاحتادا جۇمىس ىستەپ جاتقان كەنشى العان اۋىر جاراقاتتارىنان كوز جۇمدى. بۇل — اتالعان ءوندىرىس ورنىندا سوڭعى توعىز كۇن ىشىندە تىركەلگەن ەكىنشى ادام ءولىمى.

ادام ولىمىنە الىپ كەلگەن جازاتايىم وقيعا تۋرالى كومبيناتقا يەلىك ەتەتىن، ERG قۇرامىنا كىرەتىن «قازحروم» ترانسۇلتتىق كومپانياسى حابارلادى. رەسمي مالىمەتتەرگە سايكەس، كەن جۇمىسشىسى ۆاگونداردى تىركەۋ پروتسەسى بارىسىندا اۋىر جاراقات العان. ول جەدەل تۇردە حرومتاۋ اۋداندىق اۋرۋحاناسىنا جەتكىزىلگەنىمەن، دارىگەرلەردىڭ كۇش سالۋىنا قاراماستان، ونىڭ ءومىرىن اراشالاپ قالۋ مۇمكىن بولمادى.

«قازحروم» كومپانياسىنىڭ وكىلدەرى قازا تاپقان كەنشىنىڭ وتباسىنا قاجەتتى كومەك كورسەتىلەتىنىن مالىمدەدى. ال قايعىلى وقيعانىڭ ناقتى سەبەپتەرى مەن ءمان-جايىن انىقتاۋ ماقساتىندا اقتوبە وبلىستىق ەڭبەك ينسپەكتسياسى دەپارتامەنتى وكىلدەرىنىڭ قاتىسۋىمەن ارنايى كوميسسيا قۇرىلدى.

ايتا كەتەرلىگى، وسىدان توعىز كۇن بۇرىن، ياعني 20 قازاندا اتالعان كومبيناتتا ءدال وسىنداي وقيعا ورىن العان ەدى. ول كەزدە تاۋ جىنىستارىنىڭ وپىرىلۋىنان قورعايتىن ساقتاندىرعىش بەكىتپەلەردى ورناتۋ كەزىندە تاس ۇستىنە قۇلاپ، تاعى ءبىر كەنشى قازا تاپقان بولاتىن. ول ۋاقىتتا دا كاسىپورىن باسشىلىعى تەكسەرۋ جۇمىستارىن جۇرگىزۋگە جانە مارقۇمنىڭ جاقىندارىنا قولداۋ بىلدىرۋگە ۋادە بەرگەن.

ءدوڭ تاۋ-كەن بايىتۋ كومبيناتى — ليۋكسەمبۋرگتە تىركەلگەن، قازاقستانداعى ەڭ ءىرى تاۋ-كەن كورپوراتسيالارىنىڭ ءبىرى بولىپ تابىلاتىن Eurasian Resources Group (ERG) قۇرامىنداعى «قازحروم» كومپانياسىنىڭ نەگىزگى اكتيۆتەرىنىڭ ءبىرى.

ERG كورپوراتسياسىنىڭ نەگىزىن كەزىندە الەكساندر ماشكەۆيچ، پاتوح شوديەۆ جانە ءاليدجان يبراگيموۆ قالاعان بولاتىن. ماشكەۆيچ قايتىس بولعاننان كەيىن كومپانيانىڭ ورتاق يەلەرى اراسىندا بيزنەستى باسقارۋ قۇقىعى ءۇشىن ۇزاققا سوزىلعان سوت پروتسەستەرى ءوتتى. ناتيجەسىندە سوت داۋى يبراگيموۆتەر وتباسىنىڭ پايداسىنا شەشىلىپ، كورپوراتسيانى باسقارۋ تىزگىنى 39 جاستاعى شۋحرات يبراگيموۆكە ءوتتى.

دەگەنمەن، 2026 جىلدىڭ مامىر ايىندا كورپوراتسيانىڭ اكتسيونەرلىك قۇرامىندا ەلەۋلى وزگەرىستەر ورىن الدى. كاسىپكەر شاحمۇرات مۇتالىپكە تيەسىلى Nature Energy Solutions Ltd. كومپانياسى شوديەۆ پەن ماشكەۆيچتىڭ مۇراگەرلەرىنە تيەسىلى ERG اكتسيالارىنىڭ 39,3 پايىزدىق ۇلەسىن ساتىپ الدى.

وتاندىق بيزنەس ورتادا تانىمال شاحمۇرات ءمۇتالىپ Integra Construction KZ قۇرىلىس توبىنا يەلىك ەتەدى. سونىمەن قاتار ول قازاقستان بوكس فەدەراتسياسىنىڭ پرەزيدەنتى جانە «اتامەكەن» ۇلتتىق كاسىپكەرلەر پالاتاسىنىڭ قۇرىلىس كوميتەتىن باسقارادى. قازىرگى ۋاقىتتا كاسىپكەر ءوز اكتيۆتەرىن كەڭەيتۋ ماقساتىندا شۆەيتساريالىق Glencore كومپانياسىنان «قازمىرىش» وندىرىستىك كەشەنىنىڭ 70 پايىز ۇلەسىن ساتىپ الۋ بويىنشا كەلىسسوزدەر جۇرگىزىپ جاتىر.

Abai.kz