Ақтөбе облысында орналасқан Дөң тау-кен байыту комбинатына қарасты Қазақстан тәуелсіздігінің 10 жылдығы атындағы шахтада кезекті қайғылы оқиға орын алды.

29 қазанда шахтада жұмыс істеп жатқан кенші алған ауыр жарақаттарынан көз жұмды. Бұл — аталған өндіріс орнында соңғы тоғыз күн ішінде тіркелген екінші адам өлімі.

Адам өліміне алып келген жазатайым оқиға туралы комбинатқа иелік ететін, ERG құрамына кіретін «Қазхром» трансұлттық компаниясы хабарлады. Ресми мәліметтерге сәйкес, кен жұмысшысы вагондарды тіркеу процесі барысында ауыр жарақат алған. Ол жедел түрде Хромтау аудандық ауруханасына жеткізілгенімен, дәрігерлердің күш салуына қарамастан, оның өмірін арашалап қалу мүмкін болмады.

«Қазхром» компаниясының өкілдері қаза тапқан кеншінің отбасына қажетті көмек көрсетілетінін мәлімдеді. Ал қайғылы оқиғаның нақты себептері мен мән-жайын анықтау мақсатында Ақтөбе облыстық Еңбек инспекциясы департаменті өкілдерінің қатысуымен арнайы комиссия құрылды.

Айта кетерлігі, осыдан тоғыз күн бұрын, яғни 20 қазанда аталған комбинатта дәл осындай оқиға орын алған еді. Ол кезде тау жыныстарының опырылуынан қорғайтын сақтандырғыш бекітпелерді орнату кезінде тас үстіне құлап, тағы бір кенші қаза тапқан болатын. Ол уақытта да кәсіпорын басшылығы тексеру жұмыстарын жүргізуге және марқұмның жақындарына қолдау білдіруге уәде берген.

Дөң тау-кен байыту комбинаты — Люксембургте тіркелген, Қазақстандағы ең ірі тау-кен корпорацияларының бірі болып табылатын Eurasian Resources Group (ERG) құрамындағы «Қазхром» компаниясының негізгі активтерінің бірі.

ERG корпорациясының негізін кезінде Александр Машкевич, Патох Шодиев және Әлиджан Ибрагимов қалаған болатын. Машкевич қайтыс болғаннан кейін компанияның ортақ иелері арасында бизнесті басқару құқығы үшін ұзаққа созылған сот процестері өтті. Нәтижесінде сот дауы Ибрагимовтер отбасының пайдасына шешіліп, корпорацияны басқару тізгіні 39 жастағы Шухрат Ибрагимовке өтті.

Дегенмен, 2026 жылдың мамыр айында корпорацияның акционерлік құрамында елеулі өзгерістер орын алды. Кәсіпкер Шахмұрат Мүтәліпке тиесілі Nature Energy Solutions Ltd. компаниясы Шодиев пен Машкевичтің мұрагерлеріне тиесілі ERG акцияларының 39,3 пайыздық үлесін сатып алды.

Отандық бизнес ортада танымал Шахмұрат Мүтәліп Integra Construction KZ құрылыс тобына иелік етеді. Сонымен қатар ол Қазақстан бокс федерациясының президенті және «Атамекен» Ұлттық кәсіпкерлер палатасының Құрылыс комитетін басқарады. Қазіргі уақытта кәсіпкер өз активтерін кеңейту мақсатында швейцариялық Glencore компаниясынан «Қазмырыш» өндірістік кешенінің 70 пайыз үлесін сатып алу бойынша келіссөздер жүргізіп жатыр.

Abai.kz