قۇرىلتاي دەپۋتاتى كەندەباي ادامبەك تۇنگى ۋاقىتتاعى كوشەلەردەگى زاڭسىز جارىستار مەن تۇرعىن ۇيلەر ماڭىنداعى شۋ ماسەلەسىن كوتەردى. ىشكى ىستەر مينيسترلىگى دەپۋتاتتىڭ شۋ دەڭگەيىنىڭ رۇقسات ەتىلگەن شەكتەن اسۋىن اۆتوماتتى تۇردە تىركەيتىن اكۋستيكالىق كامەرالاردى ەنگىزۋ بويىنشا پيلوتتىق جوبانى ىسكە قوسۋ تۋرالى ۇسىنىسىنا قولداۋ ءبىلدىردى.

23 قىركۇيەكتە جاريالانعان دەپۋتاتتىق ساۋالعا ازاماتتاردىڭ وتىنىشتەرى نەگىز بولدى. قالالاردىڭ ورتالىق كوشەلەرىندە موتوتسيكلدەر مەن تيۋنينگ جاسالعان اۆتوكولىكتەردىڭ جۇرگىزۋشىلەرى رۇقسات ەتىلمەگەن جارىستار ۇيىمداستىرىپ، پيروتەحنيكا قولدانىپ، تۇرعىن ۇيلەردىڭ ماڭىندا ادەيى قاتتى شۋ شىعارادى. مۇنداي قۇقىق بۇزۋشىلىقتار سيرەك تىركەلەدى. كوپ جاعدايدا شارا تۇرعىنداردىڭ شاعىمىنان كەيىن عانا قابىلدانادى. ال تۇنگى ۋاقىتتا تىنىشتىقتى بۇزعانى ءۇشىن ايىپپۇل مولشەرى 5 اەك نەمەسە 21 625 تەڭگەنى قۇرايدى.

– بۇل ماسەلە جول قوزعالىسى ەرەجەسىن بۇزۋ شەڭبەرىنەن شىعىپ، قوعامدىق قاۋىپسىزدىككە قاتىستى ماسەلەگە اينالدى. سونىمەن قاتار ازاماتتاردىڭ تىنىعۋىنا، تۇنگى تىنىشتىعىنا تەرىس اسەر كەلتىرەدى. الايدا قۇقىق بۇزۋشىلار كوپ جاعدايدا جاۋاپكەرشىلىكتەن تىس قالىپ جاتادى، – دەدى كەندەباي ادامبەك.

دەپۋتات اكۋستيكالىق قۇرىلعىلار مەن شۋ ولشەگىشتەردى فوتو جانە بەينەتىركەۋ جۇيەسىنە بىرىكتىرۋ بويىنشا پيلوتتىق جوبانى ىسكە قوسۋدى، پاترۋلدىك پوليتسيا مەن ۋچاسكەلىك ينسپەكتورلاردان بىرلەسكەن ەكيپاجدار قۇرۋدى، زاڭسىز تەحنيكالىق وزگەرىستەر تولىق جويىلعانعا دەيىن قۇقىق بۇزۋشىنىڭ كولىگىن ارنايى تۇراققا قويۋدى، تۇنگى تىنىشتىقتى بۇزعانى ءۇشىن جازانى قايتا قاراۋدى جانە مۇنداي قۇقىق بۇزۋشىلىقتاردى ۇساق بۇزاقىلىق رەتىندە سارالاۋ ءتارتىبىن ازىرلەۋدى ۇسىندى.

ىشكى ىستەر مينيسترلىگى رەسمي جاۋابىندا دەپۋتاتتىڭ نەگىزگى ۇسىنىسىنا قولداۋ ءبىلدىردى.

– مينيسترلىك شۋدىڭ شەكتى دەڭگەيدەن اسىپ كەتۋىن اۆتوماتتى تۇردە انىقتاۋ ءۇشىن فوتو جانە بەينەتىركەۋ جۇيەسىنە يننوۆاتسيالىق اكۋستيكالىق كامەرالار مەن شۋ دەڭگەيىن ولشەيتىن قۇرالداردى بىرىكتىرۋ بويىنشا پيلوتتىق جوبانى ىسكە قوسۋدى قولدايدى، – دەلىنگەن ىشكى ىستەر ءمينيسترى ەرجان سادەنوۆتىڭ جاۋابىندا.

ۆەدومستۆو اقش، گەرمانيا جانە فرانتسيانىڭ تاجىريبەسىن زەردەلەپ جاتىر. مۇددەلى مەملەكەتتىك ورگاندارمەن بىرلەسىپ، اكىمشىلىك قۇقىق بۇزۋشىلىق تۋرالى كودەكستى جاڭارتۋ اياسىندا تۇنگى تىنىشتىقتى بۇزعانى ءۇشىن جاۋاپكەرشىلىكتىڭ مولشەرلەس بولۋىن قامتاماسىز ەتۋ، زاڭسىز تەحنيكالىق وزگەرىستەر جويىلعانعا دەيىن اۆتوكولىكتەردى ارنايى تۇراقتاردا ۇستاۋ ءتارتىبى، سونداي-اق جولدارداعى قۇقىق بۇزۋشىلىقتاردى سارالاۋ تاسىلدەرى پىسىقتالۋدا.

ءىىم دەرەكتەرىنە سايكەس، جىل باسىنان بەرى تۇنگى تىنىشتىقتى بۇزۋدىڭ 22,2 مىڭ جانە تىكەلەي اعىندى ءارى قاتتى شۋ شىعاراتىن جۇيەلەرى بار زاڭسىز قايتا جابدىقتالعان اۆتوكولىكتەردى باسقارۋدىڭ 24 مىڭ فاكتىسىنىڭ جولى كەسىلدى. رەسپۋبليكا اۋماعىندا «تۇنگى قالا» جەدەل-پروفيلاكتيكالىق ءىس-شاراسى وتكىزىلىپ جاتىر.

پيلوتتىق جوبانى ىسكە اسىرۋ جانە زاڭناماعا وزگەرىستەر ەنگىزۋ ماسەلەلەرى دەپۋتاتتىڭ باقىلاۋىندا.

Abai.kz