سارسەنبى, 18 قاراشا 2026
ديدار-عايىپ 122 0 پىكىر 18 قاراشا, 2026 ساعات 14:35

«قازاق ەلى سوڭعى حالىق اقىنىنان ايرىلدى!»

سۋرەت: qazaq1913.com سايتىنان الىندى.

قازاق ايتىسى قارا جامىلدى – قازاقستاننىڭ حالىق اقىنى ءاسيا بەركەنوۆا ءومىرىنىڭ 77 جاسىندا دۇنيەدەن ءوتتى…

ءاسيا بەركەنوۆا 1950 جىلعى 22 ساۋىردە قوستاناي وبلىسى اۋليەكول اۋدانىنا قاراستى سۇلۋكول اۋىلىندا دۇنيەگە كەلگەن.

اقىن حالىقارالىق دەڭگەيدەگى ءسوز سايىستارىندا دا ەل نامىسىن قورعادى. اتاپ ايتقاندا، موڭعوليا، قىتاي، وزبەكستان، قاراقالپاقستان، رەسەي جانە قازاقستان اقىندارى قاتىسقان حالىقارالىق ايتىستىڭ جۇلدەگەرى اتاندى.

ءاسيا بەركەنوۆا – قازاقستاننىڭ حالىق اقىنى، «قۇرمەت» جانە III دارەجەلى «بارىس» وردەندەرىنىڭ يەگەرى. ول ۇلتتىق ايتىس ونەرىنىڭ دامۋىنا ەلەۋلى ۇلەس قوسقان ءسوز شەبەرى.

ايتىس ونەرىندەگى ايتۋلى تۇلعانىڭ ءبىرى، باياعى ماناپ كوكەنوۆ، كوكەن شاكەەۆ، كوپباي وماروۆ، تاۋشەن ءابۋوۆالاردىڭ ءىزىن جالعاپ، وزىنەن كەيىنگى بىرنەشە بۋىن اقىندارعا ۇلگى بولا بىلگەن تۇلعا ەدى…

مارقۇمنىڭ تۋعان-تۋىس، بالا-شاعاسىنا كوڭىل ايتامىز…

جاناربەك ءاشىمجان:

«قازاقستاننىڭ حالىق اقىنى، اياۋلى اپامىز ءاسيا بەركەنوۆا 77 جاسقا قاراعان شاعىندا دۇنيەدەن ءوتتى. وكىنىشتى…

اللا ايگىلى تۇلعانىڭ يمانىن جولداس، الدىن پەيىش، ارتىن كەنىش قىلعاي. ءاسيا ايىپقىزىمەن اتامۇرا ونەرىمىزدىڭ ءبۇتىن ءبىر ءداۋىرى كەتىپ بارادى…

بارشا ارىپتەستەرىنە، اعايىن-تۋىستارىنا، شاكىرتتەرىنە، ارتىنداعى ەل-حالقىنا، اسىرەسە ءاسيا اپانى ءومىر-بويى الاقانىنا سالىپ وتكەن اڭامىزعا، قايعىرىپ كوڭىل ايتامىز. بار عۇمىرىن قازاقتىڭ ونەرى مەن مادەنيەتىنە ارناعان اسىل جاننىڭ بەينەسى جانىمىز باردا جادىمىزدا ساقتالادى. باقۇل بولىڭىز، اپا»، - دەپ جازدى.

ايبەك قاليەۆ:

«قازاق ەلى سوڭعى حالىق اقىنىنان ايرىلدى! جانىڭ جانناتتا بولسىن، جان اپا»، - دەپ جازدى.

مەيىربەك سۇلتانحان:

«جۇرتىمنىڭ جۇزىنە تىك قاراۋ ءۇشىن،

ايتەۋىر ۇياتىمدى قالعىتپادىم»، – دەپ جىرلاعان ءاسيا بەركەنوۆا اپامىز دا بۇل جالعاننان كوشىپتى. پاڭدىعىنا پاراسات پايىمى جاراسقان اياۋلى جان ەدى. ارامىزدا جۇرگەن جالعىز حالىق اقىنى ەدى اپامىز. اسەلحان قۇربىسى مەن سالتانات ءسىڭلىسىنىڭ ىزىنەن كەتە بارىپتى. قيمايمىز. بىراق امال قانشا»، - دەپ جازدى.

Abai.kz

0 پىكىر