سارسەنبى, 18 قاراشا 2026
104 0 پىكىر 18 قاراشا, 2026 ساعات 21:25

كونستيتۋتسيالىق سوت جاڭا كونستيتۋتسيا جاعدايىندا كونستيتۋتسيالىق زاڭدىلىقتى قامتاماسىز ەتۋدىڭ نەگىزگى باعدارلارىن ايقىندادى

سۋرەت: baq.kz سايتىنان الىندى

كونستيتۋتسيالىق سوتتىڭ توراعاسى ەلۆيرا ازيموۆا قازاقستان رەسپۋبليكاسى قۇرىلتايىنىڭ وتىرىسىندا كونستيتۋتسيالىق زاڭدىلىقتىڭ جاي-كۇيى تۋرالى جىل سايىنعى جولداۋىن جاريالاپ، جاڭا كونستيتۋتسيا جاعدايىندا كونستيتۋتسيالىق باقىلاۋدىڭ قورىتىندىلارى مەن زاڭنامانى ودان ءارى جەتىلدىرۋدىڭ باسىم باعىتتارىن ۇسىندى.

قازاقستان رەسپۋبليكاسى تاۋەلسىزدىگىنىڭ 35 جىلدىعى اتاپ وتىلەتىن جىلى جاڭا كونستيتۋتسيانىڭ قابىلدانۋى قازاقستاندىق مەملەكەتتىلىكتىڭ دامۋىنداعى ماڭىزدى كەزەڭ بولدى.

جاڭا كونستيتۋتسيالىق قاعيداتتار مەن قۇندىلىقتار زاڭنامانى جۇيەلى تۇردە جاڭارتۋدى، قۇقىقتىق ولقىلىقتاردى جويۋدى جانە كونستيتۋتسيالىق-قۇقىقتىق تاۋەكەلدەردىڭ الدىن الۋدى تالاپ ەتەدى. وسىعان بايلانىستى كونستيتۋتسيالىق سوتتىڭ قۇقىقتىق ۇستانىمدارى وزەكتى بولىپ تابىلادى جانە زاڭ جوبالارىن ازىرلەۋ كەزەڭىندە ەسكەرىلۋگە ءتيىس.

كونستيتۋتسيالىق سوت جۇمىسىن باستاعاننان بەرى 18 مىڭنان استام ءوتىنىش ءتۇستى. ءوتىنىش بەرۋشىلەردىڭ شامامەن 99%-ىن ازاماتتار قۇرادى. نورماتيۆتىك قاۋلىلاردىڭ 70%-ى ىسكە اسىرىلدى. قۇقىقتىق ۇستانىمداردىڭ ءىس جۇزىندە قولدانىلۋى سوت اكتىلەرىنىڭ قايتا قارالۋىمەن جانە 1 000-نان استام سوت اكتىسىندە كونستيتۋتسيالىق سوتتىڭ نورماتيۆتىك قاۋلىلارىنا سىلتەمە جاسالۋىمەن راستالادى.

پروكۋرورلىق قاداعالاۋ جانە دەن قويۋ شارالارىنىڭ ناتيجەسىندە 1 000-نان استام ازاماتتىڭ قۇقىقتارى قالپىنا كەلتىرىلدى. زاڭسىز وندىرىلگەن قاراجات پەن زەينەتاقى تولەمدەرى بويىنشا بەرەشەك ەسەبىنەن 40 ميلليون تەڭگەدەن استام قاراجات قايتارىلدى.

جولداۋدا ادام قۇقىقتارىن ءتيىمدى قورعاۋدىڭ شارتى رەتىندە زاڭنامانىڭ ساپاسىنا، قۇقىقتىق ايقىندىق، شەكتەۋلەردىڭ مولشەرلەستىگى جانە قۇقىقتىق رەتتەۋدىڭ بولجامدىلىعى تالاپتارىنا، سونداي-اق مەملەكەتتىك باسقارۋدى تسيفرلاندىرۋ جانە جاساندى ينتەللەكتىنى قولدانۋ كەزىندە كونستيتۋتسيالىق كەپىلدىكتەردى قامتاماسىز ەتۋ ماسەلەلەرىنە ەرەكشە نازار اۋدارىلدى. زاڭنامادا جانە قوعامدىق ومىردە «زاڭ مەن ءتارتىپ» قاعيداتى جانە «ادال ازامات» تۇجىرىمداماسىن ۇستانۋدىڭ ماڭىزدىلىعى اتاپ ءوتىلدى.

ەلۆيرا ازيموۆا قۇرىلتاي دەپۋتاتتارىنا زاڭ شىعارۋ قىزمەتىنىڭ كونستيتۋتسيالىق نەگىزدەرىن نىعايتۋ جونىندەگى كونستيتۋتسيالىق سوتتىڭ ۇسىنىمدارىن جەتكىزدى.

كونستيتۋتسيالىق سوتتىڭ توراعاسى بۇل جۇمىستىڭ باستى ناتيجەسى قابىلدانعان اكتىلەردىڭ سانىمەن ەمەس، كونستيتۋتسيانىڭ ۇستەمدىگىن قامتاماسىز ەتۋمەن، ازاماتتاردىڭ قۇقىقتارىنىڭ ءىس جۇزىندە قورعالۋىمەن جانە قوعامنىڭ مەملەكەتكە دەگەن سەنىمىنىڭ ارتۋىمەن ولشەنەتىنىن اتاپ ءوتتى.

Abai.kz

0 پىكىر