بەيسەنبى, 19 قاراشا 2026
جاڭالىقتار 114 0 پىكىر 19 قاراشا, 2026 ساعات 19:24

قازاقستان حالىق كەڭەسىنىڭ باستاماسىمەن پاۆلوداردا قازاقستان كاسىپوداق وكىلدەرىمەن كەزدەسۋ ءوتتى

سۋرەت: قر حالىق كەڭەسىنىڭ ءباسپاسوز قىزمەتىنەن الىندى

قازاقستان حالىق كەڭەسىنىڭ باستاماسىمەن جانە پاۆلودار وبلىسى اكىمدىگىنىڭ قولداۋىمەن وڭىردە قازاقستاننىڭ كاسىپوداق قوزعالىسى وكىلدەرىمەن كەزدەسۋ ءوتتى. ءبىر الاڭدا حالىق كەڭەسىنىڭ مۇشەلەرى، كاسىپوداقتار فەدەراتسياسىنىڭ وكىلدەرى مەن ەڭبەك ۇجىمدارىنىڭ مۇشەلەرى باس قوسىپ، ەلىمىزدىڭ ءتۇرلى سالالارى مەن وڭىرلەرىندەگى ەڭبەك ادامدارى ءۇشىن ماڭىزدى ماسەلەلەردى تالقىلادى. كەزدەسۋ بارىسىندا الەۋمەتتىك-ەڭبەك ساياساتىنىڭ نەگىزگى باعىتتارى، جۇمىسكەرلەردىڭ قۇقىقتارىن قورعاۋ جانە ەڭبەك قاتىناستارىن دامىتۋ ماسەلەلەرى كەڭىنەن تالقىلاندى. ءىس-شارا قورىتىندىسى بويىنشا كاسىپوداقتار حالىق كەڭەسىنە ەڭبەك ادامدارىنىڭ مۇددەلەرىن قورعاۋعا جانە رەسپۋبليكالىق دەڭگەيدەگى جۇيەلى شەشىمدەر ازىرلەۋگە باعىتتالعان 25 باستاما ۇسىندى.

كەزدەسۋ حالىق كەڭەسىنىڭ ءوڭىر تۇرعىندارىمەن جانە كاسىبي بىرلەستىكتەرمەن اشىق ءارى تىكەلەي ديالوگ ورناتۋ باعىتىنداعى جۇمىسىنىڭ جالعاسى بولدى. وسىنداي كەزدەسۋلەر ەڭبەك ۇجىمدارىنىڭ ۇسىنىس-پىكىرلەرىن تىڭداپ، ولاردىڭ وزەكتى ماسەلەلەرىن جان-جاقتى زەردەلەۋگە جانە الداعى ۋاقىتتا ءتيىستى شەشىمدەر قابىلداۋ ءۇشىن ناقتى ۇسىنىستار قالىپتاستىرۋعا جول اشادى.

بۇل ديالوگتىڭ كەڭ اۋقىمدى بولۋى، ەڭ الدىمەن، كاسىپوداق قوزعالىسىنىڭ قانشالىقتى كەڭ قامتىلۋىنا بايلانىستى. قازاقستان رەسپۋبليكاسى كاسىپوداقتار فەدەراتسياسىنىڭ قۇرامىندا 2 ميلليونعا جۋىق ادامدى بىرىكتىرەتىن 24 سالالىق كاسىپوداق پەن 17 مىڭعا جۋىق باستاۋىش كاسىپوداق ۇيىمى بار. كاسىپوداقتاردىڭ وسىنداي كەڭ ءارى تارماقتالعان جەلىسى ءتۇرلى سالا قىزمەتكەرلەرىنىڭ تالاپ-تىلەكتەرىن جۇيەلەۋگە، ولاردى ەڭبەك ۇجىمدارى دەڭگەيىندە تالقىلاۋعا جانە جالپىۇلتتىق ماڭىزى بار ماسەلەلەردى بىرلەسكەن الاڭداردا كوتەرۋگە مۇمكىندىك بەرەدى.

قاتىسۋشىلار الدىندا ءسوز سويلەگەن ەرلان قوشانوۆ مەملەكەت باسشىسىنىڭ ساياساتىندا ادال ەڭبەكتىڭ قادىرىن ارتتىرۋ مەن ەڭبەك ادامىنا دەگەن قۇرمەتتى نىعايتۋعا ايرىقشا ءمان بەرىلەتىنىن اتاپ ءوتتى. «جاۋاپتى ادام – ادال ەڭبەك – لايىقتى جەتىستىك» قاعيداتى مەملەكەت، بيزنەس جانە قوعام قىزمەتىندە مىزعىماس باعدارعا اينالىپ، ولاردىڭ قابىلدايتىن ناقتى شەشىمدەرى مەن جۇزەگە اسىراتىن ءىس-ارەكەتتەرىنەن كورىنىس تابۋى ءتيىس. بۇل رەتتە جۇمىس بەرۋشىلەردىڭ ۇستانىمىمەن قاتار، ەڭبەك ادامدارىنىڭ ءوز پىكىرلەرى مەن ۇسىنىستارىن دا ەسكەرۋ ماڭىزدى.

«مەملەكەت باسشىسىنىڭ باستاماسىمەن قۇرىلعان قازاقستان حالىق كەڭەسىنىڭ باستى ماقساتى – ازاماتتاردىڭ ءۇنىن ەستۋگە، ولاردى تولعاندىرعان ماسەلەلەردىڭ شەشىمىن تابۋعا مۇمكىندىك بەرۋ. ەلىمىزدىڭ تاريحىندا العاش رەت ءتۇرلى الەۋمەتتىك توپتاردىڭ، كاسىبي قاۋىمداستىقتار مەن ەڭبەك ۇجىمدارىنىڭ وكىلدەرى ءبىر كونستيتۋتسيالىق ورگانعا بىرىكتىرىلىپ وتىر», – دەپ اتاپ ءوتتى ەرلان قوشانوۆ.

ءوز كەزەگىندە، پاۆلودار وبلىسىنىڭ اكىمى اسايىن بايحانوۆ ەڭبەك ۇجىمدارىن قولداۋ، جۇمىسشى ماماندىقتارىن دامىتۋ جانە كاسىپوداقتارمەن ىنتىماقتاستىق ورناتۋ باعىتىنداعى وڭىرلىك تاجىريبەمەن ءبولىستى.

كەزدەسۋ بارىسىندا الەۋمەتتىك ارىپتەستىكتى دامىتۋ، ەڭبەك قۇقىقتارىن قورعاۋ، كاسىبي بىلىكتىلىكتى ارتتىرۋ، جاستارعا كاسىپتىك باعدار بەرۋ جانە ولاردى جۇمىسپەن قامتۋ، سونداي-اق ەڭبەك ادامدارىنىڭ ءوز مۇددەلەرىنە قاتىستى شەشىمدەردى تالقىلاۋعا قاتىسۋ مۇمكىندىگىن كەڭەيتۋ ماسەلەلەرى قارالدى. قاتىسۋشىلار ەڭبەك ۇجىمدارى، كاسىپوداقتار، جۇمىس بەرۋشىلەر مەن مەملەكەتتىك ورگاندار اراسىنداعى تۇراقتى ءارى اشىق كەرى بايلانىستىڭ ماڭىزدىلىعىن اتاپ ءوتتى. مۇنداي ءوزارا ءىس-ارەكەت جەكەلەگەن وتىنىشتەردى قاراۋمەن شەكتەلمەي، تاراپتار اراسىنداعى بايلانىستى جەتىلدىرۋگە باعىتتالعان جۇيەلى ۇسىنىستار ازىرلەۋگە مۇمكىندىك بەرەدى.

«كاسىپوداقتار فەدەراتسياسى مەن قازاقستان حالىق كەڭەسى – ءمانى جاعىنان حالىقتىق ينستيتۋتتار. ءبىزدى ورتاق قۇندىلىق – ادام، ونىڭ مۇددەسى مەن ەل بولاشاعى بىرىكتىرەدى. حالىق كەڭەسى قوعامنىڭ ءارتۇرلى توپتارىنا جالپىۇلتتىق ماسەلەلەردى تالقىلاۋعا قاتىسۋعا مۇمكىندىك بەرەدى. بۇل ديالوگتا كۇن سايىن قازاقستاننىڭ دامۋىنا ۇلەس قوسىپ جۇرگەن ەڭبەك ادامدارىنىڭ ءۇنى سالماقتى ەستىلۋى ماڭىزدى», – دەءدى قازاقستان رەسپۋبليكاسى كاسىپوداقتار فەدەراتسياسىنىڭ توراعاسى ساتىبالدى داۋلەتالين.

جيىندا جۇمىسشى ماماندىقتارىن قولداۋ جانە ەكونوميكانىڭ جاڭا تالاپتارىنا ساي بىلىكتى كادرلار دايارلاۋ ماسەلەلەرىنە دە ەرەكشە نازار اۋدارىلدى. 2025 جىلى قازاقستاندا 1,1 مىڭنان استام كاسىپ ءتۇرىن، ونىڭ ىشىندە 600 جۇمىسشى ماماندىعىن قامتيتىن 132 كاسىپتىك ستاندارت ازىرلەنىپ، جاڭارتىلدى. بۇل وزگەرىستەر ەڭبەك نارىعىندا زاماناۋي بىلىكتىلىكتەرگە دەگەن سۇرانىستىڭ ارتىپ كەلە جاتقانىن كورسەتەدى. وسىعان بايلانىستى ءبىلىم بەرۋ ۇيىمدارى، كاسىپورىندار مەن كاسىبي بىرلەستىكتەر اراسىنداعى ءوزارا ءىس-قيمىلدى ۇيلەستىرۋ ماڭىزدى.

كەزدەسۋدىڭ نەگىزگى تاقىرىپتارىنىڭ ءبىرى – تسيفرلىق پلاتفورمالار ارقىلى جۇزەگە اساتىن جۇمىسپەن قامتۋ ماسەلەسى بولدى. وعان كولىك تاسىمالى، جەتكىزۋ قىزمەتتەرى جانە باسقا دا ونلاين-سەرۆيستەر ارقىلى جۇمىس ىستەۋ تۇرلەرى جاتادى. قازىرگى تاڭدا بۇل سالا ايتارلىقتاي باسىمدىققا يە. اتاپ ايتقاندا، 35 ينتەرنەت-پلاتفورما ارقىلى شامامەن 1 ميلليون ادام قىزمەت كورسەتەدى. وسى باعىتتىڭ دامۋى تسيفرلىق پلاتفورمالارمەن ءوزارا ءىس-قيمىل جاساۋدىڭ تۇسىنىكتى ءارى ناقتى ەرەجەلەرىن قالىپتاستىرۋدى، الەۋمەتتىك كەپىلدىكتەردى قامتاماسىز ەتۋدى جانە وسىنداي سەرۆيستەر ارقىلى تابىس تاباتىن ازاماتتاردىڭ قۇقىقتارى مەن مۇددەلەرىن قورعاۋدى تالاپ ەتەدى.

بۇل تاقىرىپ مەملەكەت باسشىسى قاسىم-جومارت توقاەۆتىڭ «جاڭا تاريحي كەزەڭدەگى قازاقستاننىڭ وزەكتى مىندەتتەرى» اتتى جولداۋىندا ايقىندالعان مىندەتتەرمەن تىكەلەي بايلانىستى. پرەزيدەنت حالىقتىق تسيفرلىق ەكونوميكانى قالىپتاستىرۋ باعىتىن بەلگىلەپ، جىل سوڭىنا دەيىن تسيفرلىق جۇمىسپەن قامتۋدىڭ جەڭىلدەتىلگەن قۇقىقتىق رەجيمىن ازىرلەۋدى تاپسىرعان بولاتىن. وسىعان وراي، كەزدەسۋ بارىسىندا تسيفرلىق قىزمەتتەردىڭ دامۋى ەڭبەك ادامدارىنىڭ قۇقىقتارىن قورعاۋمەن جانە پلاتفورمالىق ەكونوميكاعا قاتىسۋشىلار ءۇشىن تۇسىنىكتى ءارى قولايلى ەڭبەك جاعدايلارىن قالىپتاستىرۋمەن قاتار ءجۇرۋى قاجەتتىگى تالقىلاندى.

كۇن تارتىبىندەگى وسى ماسەلەلەرمەن قاتار، اۆتوماتتاندىرۋ مەن جاساندى ينتەللەكتىنىڭ ەڭبەك ۇدەرىستەرىنە ىقپالى دا ءسوز بولدى. جاڭا تەحنولوگيالار قىزمەتكەرلەرگە قويىلاتىن بىلىكتىلىك تالاپتارىن وزگەرتىپ، جۇمىسقا ورنالاسۋدىڭ جاڭا مۇمكىندىكتەرىن اشۋمەن قاتار، ۋاقىتىلى وقىتۋ مەن قايتا دايارلاۋدىڭ ماڭىزىن ارتتىرىپ وتىر. وسى ورايدا كاسىپوداق ۇيىمدارى اتالعان وزگەرىستەردى تالقىلاۋعا بەلسەندى قاتىسىپ، تەحنولوگيالىق جاڭعىرۋ ۇدەرىسىنىڭ ادامي كاپيتالدى دامىتۋ جانە جۇمىسكەرلەردىڭ الەۋمەتتىك قورعالۋىن قامتاماسىز ەتۋ شارالارىمەن قاتار جۇرۋىنە ىقپال ەتە الادى.

كەزدەسۋ بارىسىندا «ەڭبەك داۋىسى» اتتى جۇمىس توبىن قۇرۋ تۋرالى ۇسىنىسقا دا ەرەكشە نازار اۋدارىلدى. بۇل توپ كاسىپوداقتار مەن ەڭبەك ۇجىمدارى كوتەرگەن ماسەلەلەردى مەملەكەتتىك ورگاندار مەن دەپۋتاتتاردىڭ قاتىسۋىمەن تالقىلاۋعا، سونداي-اق ولاردى شەشۋدىڭ ناقتى جولدارىن، سونىڭ ىشىندە زاڭنامالىق سيپاتتاعى ۇسىنىستاردى ازىرلەۋگە ارنالعان ورتاق الاڭ بولماق. ەرلان قوشانوۆ بۇل باستامانىڭ ماڭىزدىلىعىنا توقتالىپ, ونى كاسىپوداق وكىلدەرىمەن بىرلەسە وتىرىپ، جان-جاقتى ءارى ناقتى پىسىقتاۋ قاجەتتىگىن جەتكىزدى.

قازاقستان حالىق كەڭەسى كاسىپوداقتارمەن ىنتىماقتاستىقتى جەكەلەگەن كەزدەسۋلەرمەن شەكتەمەي، تۇراقتى ءارى جۇيەلى ديالوگ نەگىزىندە دامىتۋدى كوزدەيدى. كەڭەس كاسىپوداقتار، جۇمىس بەرۋشىلەر، ساراپشىلار مەن ءتيىستى مەملەكەتتىك ورگانداردىڭ قاتىسۋىمەن ورتاق ۇستانىمداردى قالىپتاستىرىپ، ءوزارا كەلىسىلگەن شەشىمدەر ازىرلەۋگە ارنالعان ماڭىزدى الاڭ بولىپ سانالادى.

كاسىپوداقتار تاراپىنان ۇسىنىلعان 25 باستاما مەن كەزدەسۋلەر بارىسىندا ايتىلعان وزگە دە ۇسىنىستار جۇيەلەنىپ، حالىق كەڭەسىنىڭ الداعى جۇمىسى اياسىندا جان-جاقتى قاراستىرىلاتىن بولادى.

ساپار بارىسىندا ەرلان قوشانوۆ باستاعان حالىق كەڭەسىنىڭ مۇشەلەرى، ونىڭ ىشىندە ۆەرا كيم، اسەت قىدىرمانوۆ, تولەگەن كۇنءادءىلوۆ, ليليا ستادنيكوۆا, نارينە ميكاەليان, تۇرسىنبەك ماقىشەۆ، نيكولاي ارسيۋتين, دميتري پاۆلەنكوجانە بوريس پولومارچۋك ازاماتتىق قوعام وكىلدەرىمەن، جاستار ۇيىمدارى جانە ەتنومادەني بىرلەستىكتەر مۇشەلەرىمەن كەزدەستى. اشىق پىكىر الماسۋ بارىسىندا قاتىسۋشىلار مەملەكەت باسشىسىنىڭ جولداۋىندا بەلگىلەنگەن مىندەتتەردى جۇزەگە اسىرۋدىڭ ناقتى قادامدارىن تالقىلاپ، قوعامدىق دامۋدىڭ وزەكتى ماسەلەلەرى بويىنشا ۇسىنىس-پىكىرلەرىن ورتاعا سالدى.

 Abai.kz

0 پىكىر