اۋىر اتلەتيكادان اياقتالعان كورەيانىڭ گويانگ قالاسىنداعى الەم بىرىنشىلىگىندە قۇرامامىز بۇرىن-سوڭدى بولماعان جەتىستىككە جەتتى. بىراق، دەنى قىتاي مەن رەسەيدەن كوشىپ كەلگەن سپورتشىلار ەدى جۇلدەنى جيىپ بەرگەن. ال، وسىدان 5 جىل بۇرىنعى افينى وليمپياداسىندا ەل قورجىنىنا تۇڭعىش كۇمىس مەدالدى سالعان ءوز تۋمامىز، زىلتەمىرشى سەرگەي فيليمونوۆ ناپاقاسىن  رەسەيدىڭ  كەمەروۆو قالاسىندا كولىك ايداپ تاۋىپ ءجۇر.

اۋىر اتلەتيكادان اياقتالعان كورەيانىڭ گويانگ قالاسىنداعى الەم بىرىنشىلىگىندە قۇرامامىز بۇرىن-سوڭدى بولماعان جەتىستىككە جەتتى. بىراق، دەنى قىتاي مەن رەسەيدەن كوشىپ كەلگەن سپورتشىلار ەدى جۇلدەنى جيىپ بەرگەن. ال، وسىدان 5 جىل بۇرىنعى افينى وليمپياداسىندا ەل قورجىنىنا تۇڭعىش كۇمىس مەدالدى سالعان ءوز تۋمامىز، زىلتەمىرشى سەرگەي فيليمونوۆ ناپاقاسىن  رەسەيدىڭ  كەمەروۆو قالاسىندا كولىك ايداپ تاۋىپ ءجۇر.

ەلليندەر ەلىنىڭ استاناسىنداعى دودادا 77 كەلى سالماقتا باعىن سىناعان سەرگەي ويىننىڭ التىنشى كۇنىندە كۇمىستى جەڭىپ الدى. ءوز ومىرىندەگى ءۇشىنشى وليمپياداسىندا بيىكتەن كورىنگەن قازاق ەلىنىڭ اتلەتى - 1994 جىلدان بەرى قۇراما تىزگىنىن ۋىسىنان شىعارماعان الەكسەي ني ۇكىلەپ قوسقانداردىڭ ىشىندەگى ءۇمىتتى اقتاعان جالعىز سپورتشى ەدى. اتلانتادا 6-ورىن الىپ، سيدنەيدە قولاعا سىنىق سۇيەم جەتپەگەن سەرگەي افينىدا  تەك تۇرىكتىڭ جاس جۇلدىزى تاگير سانەردەن اسىپ تۇسە المادى. ەلگە كەلگەن سوڭ الەم رەكوردشىسى ولەگ پەرەپەچەنوۆتى ارتقا تاستاپ، وليمپيادانىڭ ەكى دۇركىن چەمپيونى دجان حۋگانعا دا شاڭ قاپتىرعان فيليمونوۆقا كورسەتىلگەن قۇرمەتتە شەك بولماپ ەدى.. ەلباسىنىڭ جارلىعىمەن «قۇرمەت» وردەنىنىڭ يەگەرى اتانىپ، سىي-سياپاتتان باس كوتەرە المادى. ارينە، وتە ورىندى! وليمپتە جۇلدە جەڭىپ الۋ كەز-كەلگەننىڭ ەنشىسىنە بۇيىرمايتىن باقىت. الەم كوز تىككەن باسەكەدە بايراعىمىزدى جەلبىرەتكەن جانعا قانداي قۇرمەت تە لايىق! ...كەنەت، كۇمىس جۇلدەگەردىڭ ومىرىندە قايعىلى وقيعا ورىن الدى. 2005 جىلدىڭ جازىندا «مەرسەدەس» اۆتوكولىگىنىڭ تىزگىنىندە بولعان سەرگەي فيليمونوۆ ابايسىزدا ادام قاعىپ كەتتى. ونىڭ ۇستىنە، ىشىمدىك ىشكەنى دە انىقتالدى. قارسى ماشينادان تۇسكەن جارىققا كوزى شاعىلىسقان ول الدىنداعى جاياۋ جۇرگىنشىنى بايقاماعانىن ايتادى. قايتىس بولعان جىگىتتىڭ وتباسى سەرگەيگە كەشىرىم بەرگەن، تيىسىنشە ول دا بۇكىل شىعىندى موينىمەن كوتەردى. وسىدان سوڭ ۇلتتىق قۇراماعا قابىلدانۋدىڭ قيىن ەكەنى ايدان انىق.. ال، الەكسەي ني ازاماتتىق جاساپ، دايىندىعىن جالعاستىرۋعا رۇقسات بەرگەنمەن، ەنۆەر تۇركەلەري شامادان تىس سالماقتى كوتەرۋدى مىندەتتەپ، ونسىز دا ءىستى بولعان جاندى اۋرەگە سالعان كورىنەدى. وتباسىنىڭ دا شىرقى بۇزىلىپ، ومىردەن باز كەشكەن فيليمونوۆ اقىرى رەسەيگە كەتىپ قالعان. مۇندا ول ءبىراز تۇزەلگەنگە ۇقسايدى، شارۋاسى شاتقاياقتاپ كەتكەن وتباسىن قالپىنا كەلتىرمەك نيەتتە ەكەن. ىشىمدىكتەن  بوي تارتقانىنا دا ءبىرتالاي ۋاقىت بولىپتى. مۇنىڭ بارىنە سوناۋ جازداعى وقيعا ساباق بولعانىن مويىنداعان الەت تۋعان جەرىنىڭ تۋىن ءالى دە بولسا كوتەرۋگە دايىن ەكەنىن ايتادى. تەك مۇمكىندىك بەرسە بولعانى...

ءبىز ادام ولىمىنە سەبەپكەر بولعان سەرگەي فيليمونوۆتى اقتاپ الۋدى ماقسات تۇتىپ وتىرعان جوقپىز. بار بولعانى ءبىر كەزدەرى باتىردان كەم قۇرمەتتەلمەگەن سپورتشىنىڭ قازىرگى ءحالىن جەتكىزدىك.  «سۇرىنبەيتىن تۇياق جوق». الدا كىمدى نە كۇتىپ تۇرعانىن بولجاۋ ءبىز بىتىرەتىن  ءىس ەمەس. ال، سەرگەيدىڭ باسىنداعى جاعداي كۇنى ەرتەڭ كەز-كەلگەنگە كەزدەسۋى مۇمكىن. بىراق، كەز-كەلگەن ادام وليمپيادادا توپ جارا المايدى عوي... كەشىرىم مەن قۇرمەتكە جەرلەستەرىمىزىدىڭ اراسىندا، مىنە، وسىنداي ادامدار عانا لايىق بولسا كەرەك دەپ تۇيىندەگىم كەلەدى ويىمدى.

اينا كەرىم، «اباي-اقپارات»