ۇكىمەت باسشىسى كارىم ماسىموۆكە ءبىر تىقىر جۋىقتاپ قالعانعا ۇقسايدى: سوڭعى كەزدەرى اتقارۋشى بيلىكتىڭ بۇتاعىندا وتىرعان مينيسترلەردىڭ وتكەن جىلدا نە تىندىرعانىن سۇراپ ەسەپ الىپ ءجۇر. مىنە، تاياۋدا ول توتەنشە جاعدايلار مينيسترلىگىندە وتكەن كەڭەيتىلگەن القا ماجىلىسىنە باس سۇعىپ وسى ۆەدوموستۆونىڭ 2009 جىلعى جۇمىسىنىڭ قورىتىندىسى مەن الداعى 2010-2011 جىلدارعا ارنالعان ستراتەگيالىق جوسپارىمەن تانىستى. ءبىر قىزىعى، ادەتتە كۇتپەگەن جاعدايلارعا تولى قىزمەتىنە بايلانىستى «بەيمازا» بولىپ كورىنەتىن  ۆەدومستۆو باسشىسى ۆلاديمير بوجكو القادا ءوزىن تىم سالماقتى ۇستادى. تىپتەن وتكەن جىلعى جەتىستىكتەرىن جىپكە ءتىزىپ قانا قويماي، بولاشاققا قاتىستى باتىل «بولجام» دا جاساپ جىبەردى.

ۇكىمەت باسشىسى كارىم ماسىموۆكە ءبىر تىقىر جۋىقتاپ قالعانعا ۇقسايدى: سوڭعى كەزدەرى اتقارۋشى بيلىكتىڭ بۇتاعىندا وتىرعان مينيسترلەردىڭ وتكەن جىلدا نە تىندىرعانىن سۇراپ ەسەپ الىپ ءجۇر. مىنە، تاياۋدا ول توتەنشە جاعدايلار مينيسترلىگىندە وتكەن كەڭەيتىلگەن القا ماجىلىسىنە باس سۇعىپ وسى ۆەدوموستۆونىڭ 2009 جىلعى جۇمىسىنىڭ قورىتىندىسى مەن الداعى 2010-2011 جىلدارعا ارنالعان ستراتەگيالىق جوسپارىمەن تانىستى. ءبىر قىزىعى، ادەتتە كۇتپەگەن جاعدايلارعا تولى قىزمەتىنە بايلانىستى «بەيمازا» بولىپ كورىنەتىن  ۆەدومستۆو باسشىسى ۆلاديمير بوجكو القادا ءوزىن تىم سالماقتى ۇستادى. تىپتەن وتكەن جىلعى جەتىستىكتەرىن جىپكە ءتىزىپ قانا قويماي، بولاشاققا قاتىستى باتىل «بولجام» دا جاساپ جىبەردى.

«باقساق باقا ەكەن دەمەكشى»، ءمينيستردىڭ سالماقتاناتىن ءجونى بار ەكەن. ويتكەنى وتكەن جىلدى «تاۋ-تولاعاي» جەتىستىكتەرمەن شىعارىپ سالىپتى. ەڭ باستىسى مىڭداعان ادامنىڭ ءومىرىن ساقتاپ قالىپتى. ءوزىنىڭ ءسۇت ءپىسىرىم ۋاقىتقا سوزىلعان  بايانداماسىندا كەسەك-كەسەك دەرەكتەردى لاقىلداتىپ تۇرىپ، «وتكەن جىلى جەدەل قۇتقارۋ قىزمەتى اپاتتى جاعدايلاردان 7 مىڭ 950 ادامدى قۇتقارىپ العان»، - دەپ پرەمەر-مينيسترگە قارادى. «بۇنىڭ بارلىعى دا جەمىستى جۇمىستاردىڭ ناتيجەسى. وتكەن جىلى ۆەدومستۆوارالىق جەدەل ارەكەت ەتۋدى ارتتىرۋ ماقساتىندا 17 مىڭعا تارتا تاكتيكالىق-ارنايى جاتتىعۋلار، وقۋ-جاتتىعۋ دابىلدارى وتكىزىلدى. سونداي-اق، ەل اۋماعىندا «قازقۇتقارۋ-2009»، «ءوزارا بايلانىس - 2009»، «مۇناي - 2009»، «جەتىسۋ - 2009» اتتى ءتورت بىردەي حالىقارالىق جاتتىعۋ شارالارى ءوتتى. الەمنىڭ 30-دان استام ەلدەرىنىڭ وكىلدەرى اتسالىسقان بۇل شارالاردا قازاقستاننىڭ قۇتقارۋ كۇشتەرىنىڭ دايىندىعى جوعارى باعالاندى»، - دەپ اتاپ ءوتتى مينيستر.

جيىن بارىسىندا ءسوز سويلەگەن پرەمەر-مينيستر كارىم ءماسىموۆ تە توتەنشە جاعدايلار مينيسترلىگىنىڭ جۇمىسىنا جاقسى دەگەن باعا بەرىپ جاتتى. «مينيسترلىك پەن ونىڭ بولىمشەلەرى وزدەرىنە جۇكتەلگەن مىندەتتەردى تولىعىمەن ورىنداپ شىقتى. سول سەبەپتى مەن مينيسترلىكتىڭ اتقارعان جۇمىسىن وڭ باعالايمىن. 2009 جىلعى قارجىلىق قيىنشىلىقتارعا قاراماستان، مينيسترلىككە قاجەتتى جاعدايلاردىڭ بارلىعى جاسالدى. 2008-2009 جىلدارعا ارنالعان ماتەريالدىق-تەحنيكالىق جاراقتاندىرۋ  جەتكىلىكتى تۇردە ارتتىرىلدى»، - دەدى ۇكىمەت باسشىسى. جالپى تەحنوگەندىك سيپاتتاعى اپاتتاردىڭ بولۋ قاۋپىنە توقتالىپ وتكەن كارىم قاجىمقانۇلى توتەنشە جاعدايلار مينيسترلىگىنە كەز-كەلگەن جاعدايعا دايار بولۋ ءۇشىن ماتەريالدىق-تەحنيكالىق ازىرلىكتى ءجىتى قاداعالاۋدى ۇسىندى. «توتەنشە جاعدايلار مينيسترلىگىنىڭ الدىندا جاڭا ءارى ناقتى مىندەتتەر جۇكتەلەدى. بۇل - كوكساراي سۋ رەتتەگىشى نىسانىنىڭ قۇرىلىسىن اياقتاۋ جۇمىسىنا قاتىستى. قۇرىلىس نىسانى ەلىمىزدىڭ وڭتۇستىك وڭىرىندە ەنەرگەتيكالىق قاۋىپسىزدىكتى قامتاماسىز ەتۋگە سەپتىگىن تيگىزەدى»، - دەدى ك.ءماسىموۆ.

ايتىپ كەلمەيتىن اپاتتاردان ەلىمىز بەلگىلى مولشەردە زارداپ شەگىپ جاتادى. الايدا، وتكەن جىلى بۇنداي اپاتتى جاعدايلار دا از تىركەلىپتى. «بىلتىر بەيمەزگىل اپاتتى جاعدايلاردان مەرت بولعاندار سانى 2008 جىلمەن سالىستىرعاندا 7,5 پايىزعا از بولدى. بۇل جەردە اسىرەسە قاراعاندى (كەن ورىندارىندا جۇزدەگەن ادامنىڭ ءومىرىن جالماعان شاحتا جارىلىستارى بولىپ جاتسا دا. - اۆتور), باتىس قازاقستان جانە شىعىس قازاقستان وبلىستارىنداعى  توتەنشە جاعدايلار دەپارتامەنتى قىزمەتكەرلەرىنىڭ ەڭبەكتەرى ەرەكشە»، - دەدى ۆ.بوجكو.

ءبىر قىزىعى بايانداماسى وسى جەرگە كەلگەندە ءمينيستردىڭ قاباعى ءتۇيىلىپ كەتتى. تىپتەن كۇرسىنگەندەي دە بولدى. كەشىكپەي بۇل «كۇرسىنىستىڭ» دە سىرى اشىلدى. «كەرىسىنشە، استانا قالاسى مەن الماتى، اقتوبە جانە سولتۇستىك قازاقستان وبلىستارىنداعى توتەنشە جاعدايمەن كۇرەس جۇمىستارى وتە سىلبىر. ناتيجەسىندە اتالعان ايماقتاردا توتەنشە وقيعالار سانى ارتىپ وتىر»، - دەپ ءسوزىن قايتا ساباقتادى.

وسىلايشا «ەڭىرەتىپ» تۇرىپ ەسەپ بەرگەن بوجكو توتەنشە جاعدايلارمەن كۇرەستىڭ كۇرسىندىرەر تۇستارى كوپ ەكەنىن مويىنداپ تا وتىرعانداي كورىندى بىزگە.

بۇركىت نۇراسىل

استانا