«قازاقستان قىتاي ازاماتتارىنا جالعا جەر بەردى» دەگەن تاقىرىپپەن قازتاگ اقپاراتتىق اگەنتتىگىنىڭ رەسمي سايتىندا اقپارات جارىق كوردى. 

اقپارات اگەنتتىگىنىڭ مالىمەتىنە سۇيەنسەك، قر پرەمەر-ءمينيسترىنىڭ ءبىرىنشى  ورىنباسارى باقىتجان ساعىنتاەۆ ورتالىق كوممۋنيكاتسيالار قىزمەتى ورتالىعىندا وتكىزگەن بريفينگىندە وسى ماسەلە جايىندا حابارلاعان. 

«جەر ۋچاسكەلەرى تەك قىتاي حالىق رەسپۋبليكاسى ازاماتتارىنا عانا ەمەس، رەسەي ازاماتتارىنا دا، وزگە مەملەكەتتىڭ ازاماتتارىنا دا ءبولىنىپ وتىر. دەمەك، بۇل جەردە ەشقانداي پروبلەمانى كورىپ وتىرعان جوقپىز»، – دەگەن باقىتجان ساعىنتاەۆ مىرزا قازاقستان رەسپۋبليكاسىنىڭ جەر كودەكسى بويىنشا شەتەل ازاماتتارىنا نەمەسە شەتەل كومپانيالارىنا جەر تەلىمدەرىن جالعا بەرۋگە تىيىم سالىنباعاندىعىن اتاپ ءوتتى. 

«ەكىنشى ماسەلە، جەردى شەتەل ازاماتىنا جەكە مەنشىككە بەرۋ. جەر كودەكسى بويىنشا – شەتەل ازاماتىنا جەر تەلىمدەرى تەك ون جىلعا عانا جالعا بەرىلەدى. ولاردىڭ جەكەمەنشىگىنە جەر ساتىلمايدى. سول سەبەپتى دە، ماسەلەن، اقمولا وبلىسىندا، شىعىس قازاقستان وبلىستارىندا ءبىز جەر تەلىمدەرىن اۋىلشارۋاشىلىعى ماقساتىندا پايدالانۋعا بولدىك. ولار قاشان بەرىلگەنىن، قانشا گەكتار جەر بولىنگەنىن ءبىز بىلەمىز»، –  دەگەن ول. 

ەستەرىڭىزدە بولسا، وسىدان ءبىر-ەكى جىل بۇرىن قىتايعا جەر تەلىمدەرىن اۋىلشارۋاشىلىعى ماقساتىندا پايدالانۋ ءۇشىن 1 ميلليون گەكتاردىڭ جالعا بەرىلەتىنى جايلى اقپارات تاراعان بولاتىن. الايدا، بۇل قازاق ازاماتتارى تاراپىنان قاتتى قارسىلىققا ۇشىرادى. ءسويتىپ، قازاق ۇكىمەتى بۇل اقپاراتتى جوققا شىعارۋعا ءماجبۇر بولعان. ماسەلەنىڭ ءىزى سۋىعانداي بولعانىمەن، بيىل اقپان ايىندا ەلباسىنىڭ قاتىسۋىمەن وتكەن ۇكىمەتتىڭ كەڭەيتىلگەن وتىرىسىندا ەلباسى شەتەلدىكتەرگە جەردىڭ جالعا بەرىلەتىندىگى جايىندا تاعى قايتالادى.

«قازاقستاندا جۇمىس كۇشi جەتiسپەيدi, قىتاي قاپتاپ كەتەدi دەيدi. مىڭ شاقىرىم قۇبىر تارتتىق، وزبەكستاننان بەرi قاراي مۇناي قۇبىرىن سالدىق. مىڭ قىتاي بiر جىلدا سالدى. قۇبىردى سالىپ بiتiرگەن سوڭ بiرi قالماي كەتتi. نەدەن شوشيتىنى بار؟! بiر جىلدىڭ iشiندە مىڭ شاقىرىم قۇبىردى كiم سالادى، ايتىڭدارشى؟! بۇل ماسەلەنi شەشۋ ءۇشiن نە قاجەت؟ زاڭنامانى وزگەرتۋ كەرەك پە، ۇكiمەتتiڭ شەشiمi قاجەت پە؟ وسىنى شەشەيiك. جەردi جالعا بەرۋدi 10 جىل دەپ بەلگiلەدiك. باتىستا 9 جىلدان باستاپ ەلۋ، ءجۇز جىلعا بەرەدi. ون جىل دەگەنگە كiم كەلەدi? بۇل جالعا بەرۋ عوي، نەسiنە قورقامىز؟ نەگە جەردi دۇرىس پايدالانبايمىز؟ بiزدەن ارابتار جەر سۇراپ ءجۇر. قىتايلار دا “جالعا جەر بەرiڭدەر، ءونiم وندiرەيiك” دەيدi. ايتپاقشى، مىنا كورشi قىتايدا ناشار جاعدايدىڭ وزiندە گەكتارىنا 30 تسەنتنەر ءونiم الادى. بiز ولاردان كەمبiز بە؟» – دەگەن ەدi ن.نازارباەۆ.

بۇل مالىمدەمەگە حالىق قاتتى نارازىلىق تانىتا قويماعان بولاتىن. ەندى، مىنە، جەردىڭ جالعا بەرىلىپ ۇلگەرگەندىگى جايىندا اقپارات تاراتىلىپ وتىر. 

ەسەنگۇل كاپقىزى