بۇگىن شىمكەنت قالاسى اباي اۋداندىق سوتى 2012 جىلى جەلتوقسان ايىندا بولعان ۇشاق اپاتىنا قاتىستى قوزعالعان قىلمىستىق ىسكە ۇكىم شىعاردى. «ازاتتىق راديوسىنىڭ» حابارلاۋىنشا «ان-72» اسكەري ۇشاعىنىڭ اپاتىنا قاتىستى «قازاەروناۆيگاتسيا» كومپانياسىنىڭ شىمكەنتتەگى فيليالىنىڭ ديسپەتچەرى قانات اقىلبەكوۆ ايىپتى دەپ تانىلىپ، 6 جىلعا سوتتالدى.   قانات اقىلبەكوۆ قىلمىستىق كودەكستىڭ «ابايسىزدا ەكى، نە ودان دا كوپ ادامنىڭ ولىمىنە سوقتىرعان اۋە كولiگi قوزعالىسى قاۋiپسiزدiگi ەرەجەلەرiن بۇزۋ» بابى بويىنشا ايىپتى دەپ تانىلعان. سوت زالىندا قاماۋعا الىنعان اقىلبەكوۆ جازاسىن قونىستاندىرۋ كولونياسىندا وتەيتىن بولدى. سونىمەن بىرگە سوت وعان 3 جىل اۋە ديسپەتچەرى قىزمەتىن اتقارۋعا تىيىم سالدى. 2013 جىلدىڭ جەلتوقسان ايىنان باستاپ ءۇي قاماۋىندا بولعان ايىپتالۋشى قانات اقىلبەكوۆ وزىنە تاعىلعان ايىپپەن مۇلدە كەلىسپەيدى. اپات الدىندا «ەكيپاج مۇشەلەرىنىڭ قونۋىنا نۇسقامانى دۇرىس بەرمەگەنى سالدارىنان كوپ ادام قازاعا ۇشىراۋىنا سەبەپ بولدى» دەپ ايىپتالعان ول «ەكيپاج نۇسقاۋلىقتى دۇرىس ورىندامادى» دەپ سانايدى. ەستەرىڭىزدە بولسا 2012 جىلى 25 جەلتوقساندا شىمكەنت ماڭىندا شەكارا قىزمەتىنىڭ «ان-72» اسكەري ۇشاعى اپاتقا ۇشىراپ، بورتىنداعى 27 ادامنىڭ ءبارى قازا تاپقان ەدى. ولاردىڭ 20-سى – اسكەري قىزمەتكەر، جەتەۋى – ەكيپاج مۇشەلەرى بولاتىن. قازا تاپقانداردىڭ اراسىندا قازاقستان شەكارا قىزمەتىنىڭ ديرەكتورى تۇرعانبەك ستامبەكوۆ تە بولعان.

اباي-اقپارات