وسىمەن 12-ءنشى رەت ءوتىپ جاتقان ەۋرازيالىق مەديافورۋم بۇگىن استانادا ءوز جۇمىسىن باستادى. الەمنىڭ ءار تۇكپىرىنەن جينالعان ساياساتتانۋشىلار، تانىمال تۇلعالار جانە باق سالاسىنىڭ مايتالماندارى قازىرگى زامانعى وزەكتى ماسەلەلەردى تالقىلاماق. قانداي تىلدە دەيسىز بە؟ ورىس جانە اعىلشىن تىلدەرىندە. مىنە، قاراڭىز، ەۋرازيالىق مەديافورۋمنىڭ رەسمي سايتى ورىس جانە اعىلشىن تىلدەرىندە عانا سويلەپ تۇر. ال، وسى فورۋمعا 12 جىل بويى تورىنەن ورىن بەرىپ، اسىن الدىنا توسىپ، سالىق تولەۋشىلەردىڭ قالتاسىنان تۇسكەن بيۋدجەتتىڭ قىرۋار اقشاسىن شىعىنداعان مەملەكەتتىڭ ءتىلى – قازاق ءتىلى كورىپ بەرەيىن دەسەڭىز دە جوق.

بۇل نە سوندا؟ دۇنيەنىڭ ءتورت تارابىنان جينالعان بەدەلدى ادامداردىڭ الدىندا ءتىلدى مەنسىنبەۋ ارقىلى مەملەكەتتىڭ ءيميدجىن اياقاستى ەتىپ، ءبۇتىن ۇلتتى ۇياتقا قالدىرۋ ما؟ الدە تۋعان اناسىن تويعا ەرتىپ بارۋعا ارلاناتىن ساناسىزدىق پەن جەتەسىزدىكتىڭ اسقان ۇلگىسى مە؟

كەرەك دەسەڭىز، فورۋمنىڭ قازاق ءتىلىن قاعاجۋدا قالدىرۋى 65 پايىز مەملەكەت قۇرۋشى حالىقتىڭ – قازاقتىڭ تىلدىك قۇقىن تابانعا سالۋ جانە ونىڭ فورۋم جۇمىسىنان حاباردار بولۋ، سويلەگەن سوزدەردەردى تىڭداۋ قۇقىنان ايىرۋ. تۇتاس حالىقتىڭ تىلدىك جانە اقپارات الۋ مەن تۇتىنۋ قۇقىن بۇزۋ – حالىقارالىق نورمالار مەن قۇقىقتاردىڭ كەز كەلگەنىنە ورەسكەل قايشى بولاتىنىن شەتەلدەن كەلگەن فورۋم قوناقتارىنىڭ ءاربىرى وتە جاقسى بىلەدى.

اتاۋىنىڭ ءوزى قوعامنىڭ قاتتى قارسىلىعىنا تاپ بولىپ وتىرعان «ەۋرازيالىق» دەپ باستالاتىن فورۋمدا قازىرگى زامانعى وزەكتى ماسەلەلەردى ورىس تىلىندە تالقىلاساڭىزدار، ماسكەۋدىڭ تورىنە بارىپ وتكىزگەندەرىڭىز ءجون. سەبەبى، ءبىزدىڭ ەلدە ءوزىمىزدىڭ وزەكتى ماسەلەلەرىمىز شاش-ەتەكتەن. «ەۋرازيالىق» تا، ورىس ءتىلى دە رەسەيدىڭ قازىرگى ساياسي ۇستانىمىنا تاپتىرمايتىن ءتاسىل. ال، قازاقستانعا مەملەكەتتىڭ قارجىسىنا وتكىزە وتىرىپ، مەملەكەت ءتىلدى مەنسىنبەيتىن فورۋمنىڭ كوك تيىنعا كەرەگى جوق. مەملەكەتتىڭ ءتىلىن مەنسىنبەي، جەرىگەندەردىڭ جينالىسىنا كەلگەن قوناقتار دا بەتىڭە ايتپاسا دا جانىنان ءتۇڭىلىپ كەتەتىن شىعار. كۇلكى مەن ۇياتقا قالىپ، ماسقارا مەن داراقىلىقتىڭ ۇلگىسىن كورسەتەتىن فورۋمدارىڭىز، قازاق تىلىنە مىنبەرىن بەرمەسە، وندا قازاقتىڭ دا وعان تۇكىرگەنى بار...

Abai.kz