قازاقستان رەسپۋبليكاسىنىڭ پرەزيدەنتى نۇرسۇلتان نازارباەۆ XII ەۋرازيالىق مەديا فورۋم قاتىسۋشىلارىنا قۇتتىقتاۋ جولدادى.
«XII ەۋرازيالىق مەديا فورۋمنىڭ قاتىسۋشىلارى مەن قوناقتارىنا شىن جۇرەكتەن ىستىق ىقىلاسىمدى بىلدىرەمىن. بۇگىنگى كونفەرەنتسيانىڭ اشىلۋىنا بايلانىستى مەنىڭ شىنايى قۇتتىقتاۋىمدى قابىل الىڭىزدار!
وسى جىلدار ىشىندە فورۋم حالىقارالىق تۇرعىدان كەڭىنەن تانىلدى، جەدەل وزگەرىپ جاتقان الەمنىڭ ەڭ وزەكتى پروبلەمالارىن تالقىلاپ، ولاردى شەشۋدىڭ جاڭا تاسىلدەرىن ازىرلەۋدىڭ مويىندالعان الاڭىنا  اينالدى.
ونىڭ جۇمىسىنا 12 جىلدا الەمنىڭ 60 ەلىنەن 5 مىڭنان استام ساراپشى، ساياساتكەر، جۋرناليست جانە قوعام قايراتكەرلەرى قاتىستى، فورۋم جۇمىسىن 500-دەن استام قازاقستاندىق جانە شەتەلدىك باق جاريالاپ-كورسەتەدى.
بيىل مەنىڭ ەۋرازيالىق ەكونوميكالىق وداق جونىندەگى يدەيانى ۇسىنعانىما 20 جىل تولدى.
مەديا-فورۋم ەۋرازيا حالىقتارىنىڭ جاقىنداسۋى مەن جان-جاقتى ىنتىماقتاسۋىنىڭ بەلسەندى باستاماشىسى رەتىندە تانىلعان  استانادا ءوتۋىنىڭ ەرەكشە سيمۆولدىق ءمانى بار. بىزدەردى تەرەڭ تاريحي جانە ۇلتتىق-مادەني بايلانىستار مەن اۋقىمدى ىسكەرلىك قارىم-قاتىناستار بىرىكتىرەدى.
ەۋرازيالىق ينتەگراتسيا ۇدەرىسى بۇگىندە دامۋدىڭ مۇلدە جاڭا كەزەڭىنە شىقتى. ەۋرازيالىق ەكونوميكالىق وداق قۇرۋ تۋرالى تاريحي شارتقا 2014 جىلى مامىردا ءدال وسى جەردە، استانادا قول قويۋ جوسپارلانۋدا.
ەۋرازيالىق مەديا فورۋمنىڭ ەلدەر مەن قۇرلىقتار اراسىنداعى سەنىم احۋالىن قالىپتاستىرۋداعى، ۇلتارالىق تاتۋلىق پەن كەلىسىمدى ساقتاۋداعى ايرىقشا ءرولى مەن ميسسياسىن اتاپ وتكىم كەلەدى.
بۇگىنگى فورۋم كۇردەلى حالىقارالىق-ساياسي جاعداي تۇسىندا ءوتىپ وتىر.
سوڭعى ايلارداعى كوپتەگەن وقيعالار ەتنوسارالىق تاتۋلىقتى ساقتاۋدىڭ ماڭىزدىلىعىن تاعى دا كورسەتىپ بەردى.
بۇل ۇدەرىسكە قازاقستان ءوزىنىڭ بەيبىتشىلىك پەن بىرلىكتى قامتاماسىز ەتۋ جونىندەگى وڭ تاجىريبەلەرىنە سۇيەنە وتىرىپ، لايىقتى ۇلەسىن قوسىپ كەلەدى.
ءبىزدىڭ ەلىمىزدە 100-دەن استام ۇلت ءومىر سۇرۋدە.  ەلدەگى مىزعىماس قۇندىلىقتار جانە مەملەكەتتىك ساياساتتىڭ باستى باسىمدىقتارى بولىپ سانالاتىن تاتۋلىق پەن تۇراقتىلىقتىڭ ارقاسىندا ءبىز «قازاقستان - 2030» ستراتەگياسىن مەرزىمىنەن بۇرىن ورىندادىق.
ەلدە بۇگىندە قازاقستاننىڭ 2050 جىلعا دەيىنگى دامۋىنىڭ ستراتەگياسى قىزۋ جۇزەگە اسىرىلۋدا. ۇلتارالىق جانە كونفەسسياارالىق كەلىسىمدى نىعايتۋ، تاتۋلىق، بىرلىك تۇراقتىلىق ونىڭ نەگىزگى باسىمدىقتارى بولىپ سانالادى.
كەلەسى 2015 جىل قازاقستان حالقى اسسامبلەياسىنىڭ جىلى بولىپ جاريالاندى، استانادا قازاقستان حالقىنىڭ فورۋمى وتەتىن بولدى.
سونداي-اق، 2015 جىلى ءبىزدىڭ ەلىمىزدىڭ استاناسىندا الەمدىك  جانە ءداستۇرلى دىندەر كوشباسشىلارىنىڭ 5-ءشى سەزى وتەدى.
مەديا فورۋم اياسىنداعى سىندارلى سۇحباتتار ءوزارا تۇسىنىستىك پەن سەنىمدى ودان ءارى نىعايتۋعا سەپتىگىن تيگىزەدى دەپ سەنەمىن.
سىزدەردىڭ جۇمىستارىڭىزعا جەمىس جانە بارشاڭىزعا تابىس تىلەيمىن!»، - دەلىنگەن قۇتتىقتاۋدا قازتاگ.

"ايقىن" گازەتى