سۋرەتتە: تۇرسىنبەك ومىرزاقوۆ، دەپۋتات

وسى «ارناۋلى ەكونوميكالىق زونالار (اەز) قۇرامىز، ولار ەڭ جاڭا تەحنولوگيالاردى پايدالانىپ، جوعارىونىمدى، باسەكەلەستىككە قابىلەتتى تاۋارلار وندىرەتىن بولادى. ول جەرلەرگە ينۆەستيتسيا قۇيۋدىڭ جەڭىل جولدارى قاراستىرىلادى، جۇمىس ورىندارى كوبەيەدى ت.س.س.» دەگەن اڭگىمەلەر كوپ ايتىلدى. ءتىپتى، 10 اەز قۇرىلدى، ولاردى ءالى دە كوبەيتەمىز دەگەن سوزدەر دە شىقتى. باق ولاردى بارىنشا ناسيحاتتادى. شەنەۋنىكتەر شىرەنىپ تۇرىپ، قۇرىپ جاتىرمىز، قيراتىپ جاتىرمىز، ەرتەڭ قاتىرامىز دەپ تالاي ماقتاندى. قازىر سول نە بولدى؟

«ايداعانىڭ بەس ەشكى، ىسقىرىعىڭ جەر جارادى» دەگەندەي سول اەز-دەر سيىرقۇيىمشاقتانىپ بارىپ، جوعالعان ءتارىزدى. ارينە، ءجاي جوعالىپ قويعان جوق، وسى باعدارلاماعا بولىنگەن وكىمەتتىڭ بالەنباي ميلليارد تەڭگەسىن جۇتىپ بارىپ جوعالعان بولۋى كەرەك.

وكىمەتتىڭ ۇمىتىلا باستاعان وسىنداي باعدارلامالارىن ءماجىلىس دەپۋتاتى تۇرسىنبەك ومىرزاقوۆ (سۋرەتتە) قانا جالعىز جوقتاپ جۇرەدى. پالاتانىڭ سوڭعى پلەنارلىق وتىرىسىندا ول پرەمەر-مينيستر ك.ماسىموۆكە ساۋال جولداپ، وسى اەز-دەر ءجايىن سۇرادى. ولارعا بولىنگەن قاراجاتتىڭ قانشالىقتى اقتالعانىن بىلگىسى كەلەتىنىن ايتا كەلىپ، دەپۋتات جۇمىس جۇرمەي جاتسا قانداي كەدەرگىلەردىڭ بارىن جانە سونى ەڭسەرۋ ءۇشىن قانداي جوسپارلار جاسالىپ جاتىر دەگەن سەكىلدى ساۋالدار قويدى. بۇگىنگە دەيىن ينۆەستيتسيا تارتۋ، ارناۋلى ەكونوميكالىق زونالاردى دامىتۋ جانە ولاردىڭ ەكسپورتىن ىنتالاندىرۋ جونىندەگى 2010-2014 جىلدارعا ارنالعان باعدارلاما ءالى كۇشىندە. وعان قاجەتتى قاراجات بيۋدجەتتە قاراستىرىلعان. الايدا ەسەپ كوميتەتىنىڭ 2012 جىلعى (ودان جاڭاسى بولماعانى عوي) تەكسەرۋىنە قاراعاندا، اەز جۇمىسىنىڭ تيىمدىلىگى شامالى ەكەندىگى انىقتالىپتى. ءتىپتى اەز-گە بەرىلگەن كوپتەگەن ايماقتاردا وسى باعدارلامانى ىسكە اسىرۋدى كوزدەپ تىركەلگەندەر بارلىق جاڭادان تىركەلگەن كاسىپورىنداردىڭ 10-اق پايىزىن قۇراپتى. سوندا بيۋدجەتتە قاراستىرىلعان قاراجاتتى كىم يگەرمەكشى بولعان ءوزى؟ بىلتىرعى جىلعى قازان ايىندا ەلباسى ءوزىنىڭ سوزىندە اەز جۇمىسىن قاتتى سىناعان ەدى. سونىڭ ىشىندە مەملەكەت باسشىسى 30-عا جۋىق جوبانى ىسكە اسىرامىز دەگەن اتىراۋ وبلىسىنداعى اەز سونىڭ ۇشەۋىن عانا ىسكە اسىرعانىن، ال الماتى، پاۆلودار وبلىستارىنداعى اەز-دەر ءتىپتى بىردە-ءبىر جوبانى ىسكە اسىرا الماعانىن ايتتى، دەي كەلىپ دەپۋتات ت.ومىرزاقوۆ: ەندى سول ءتيىمسىز اەز-دەر جويىلا ما؟ قالعاندارىنىڭ جاقسى جۇمىس ىستەۋى ءۇشىن قاجەتتى زاڭ جوبالارى ازىرلەنە مە؟ جۇمىس ىستەگەن اەز-دەر نە جۇمىستار تىندىردى، قانداي جوبالاردى ىسكە اسىردى، ولاردان مەملەكەتتىك بيۋدجەتكە قانشا سالىق ءتۇستى دەگەن ءتارىزدى سۇراقتاردى قويدى.

اي، وسى سۇراقتارعا جاۋاپ بەرە الار ما ەكەن، وكىمەت. كوپ بولسا ءبىر سىرعىتپا جاۋاپ جازا سالاتىن شىعار، قاعاز دەگەن جارىقتىق ءبارىن دە كوتەرە بەرەدى عوي.

جاقسىلىق قۋاندىق، جۋرناليست