20 كوكەك كۇنى «بالقاراعاي» دەمالىس ماڭايى استانانىڭ قىم-قۋىت تىرلىگىنەن قاجىعان ءبىرشاما جۇرتتى ءبىر ساتكە الاستاپ،  ءتۇتىننىڭ ورنىنا جىلقى يىسىمەن، كولىك شۋىنىڭ ورنىنا كىسىنەگەن ايعىر داۋىسىمەن داۋا بولدى. قىستان قىمتىرىلعان جۇرتشىلىق ۇلتتىق سپورت قاۋىمداستىعىنىڭ ۇيىمداستىرۋىمەن ناۋرىز مەرەكەسىن مەيرامدادى، ۇلتتىق سپورت ماسەلەسىن تالقىلادى.

الدىمەن تاڭعى 9-دا سەمينار-كەڭەسكە جينالىپ، «ۇلتتىق ات سپورتى ويىندارىنىڭ تەوريالىق جانە مەتوديكالىق ءمانى» دەگەن تاقىرىپتا بىرقاتار سپورت ماماندارى مەن عالىمدارعا ءسوز بەرىپ، سپورتتى عىلىمي كوزبەن قاراۋدى،تالداۋدى كۇن تارتىبىنە قويدى.

تاعىلىمدامانى ۇلتتىق سپورت قاۋىمداستىعىنىڭ پرەزيدەنتى بەكبولات تىلەۋحان جۇرگىزىپ، قر سپورت جانە دەنە شىنىقتىرۋ ءىسى جونىندەگى اگەنتتىك توراعاسى تاستانبەك قۇتجانۇلى ەسەنتاەۆ باستان اياق قاتىسىپ، شارانى باقىلادى ءارى قورىتتى.

سەميناردا ءسوز العان عالىمدار ناقتى عىلىمي ءۋاج ايتتى دەۋ قيىنداۋ، بىرەۋى تاريحقا ۇڭىلسە، ءبىرى كوپتىڭ ورتاسىنداعى تالقىعا اينالعان جايتتاردى تالعاجاۋ ەتتى. ارالارىندا ماسەلەنى اشىپ، شەشۋ جولدارىن ۇسىنعاندارى دا تابىلدى.

شارادان كوڭىلدى سەلت ەتكىزگەن سپورت ءجۋرناليسى، الماتى سپورت-ينتەرناتىنىڭ ديرەكتورى قىدىربەك رىسبەك «ۇلتتىق سپورتتى عىلىمعا بەت بۇرماي ءبارى بوس ءسوز» دەگەندەي پايىمىن كەلتىرىپ، بۇل ءۇشىن ۇلتتىق سپورت ويىندارىنىڭ عىلىمي-زەرتتەۋ ورتالىعى كەرەكتىگىن باسشىلارعا تۋرالاي ايتتى.

شارانىڭ جاڭالىعى ەكەۋ دەگىمىز كەلەدى: ءبىرى - بايانولگەي ماڭعولى باتكىرەلدىڭ جامبى اتۋدان باستى باپكەر بولىپ كەلگەندىگى; ەكىنشىسى- تەرى يلەۋشى كاسىپكەر ماكسيم تەرنوۆتىڭ كوكپار سەركەسىنىڭ ورنىنا «مۋلياج» جاساۋعا كىرىسكەندىگى.  دەگەنمەن، سەميناردا ەمەس، قالتارىستا ماڭعولعا قاراعاندا ماجارلىق قىپشاقتاردىڭ جامبى اتۋدان الدەقايدا ىلگەرى كەتكەندىگى جانە بۇل سپورتتا تەحنيكا مەن تەحنولوگيالىق ماسەلەلەردى شەشۋدە ولارمەن كوپ نارسە تىندىرۋعا بولاتىندىعىن ەسكەرۋ قاجەتتىگى ايتىلعانىن جاسىرا المايمىز. ال، كوكپاردىڭ جاساندى سەركەسىن جاساۋعا تاپسىرىس بەرىلگەن كاسىپكەر بارىنشا تىرىسقان، الايدا جاۋاپسىز ساۋال ءالى كوپ. ماكسيمنىڭ ايتۋىنشا، الماتى وبلىسىندا جارتى جىلدان بەرى بىلعارى «تەرىلى» قىلسىز «سەركەمەن» كوكپار تارتۋدا كورىنەدى. ونىڭ يلەنگەنى سونداي كادىمگى سەركەگە ۇقساپ كەتتى دەيدى.  الايدا، مۇنى زەرتتەپ، زەردەلەپ، سىناقتان وتكەندىگى جايىندا تالداۋ ەشكىمنىڭ اۋىزىنان شىققان جوق. ال، ءجۇندى سەركە، تەڭكيگەن ىسەككە كوبىرەك ۇقسايدى... قىسقاسى، بۇل ماسەلە ءالى دە جۇيەسىز قولعا الىنۋدا سەكىلدى...

جامبى اتۋ سپورتىنىڭ قولعا الىنۋى قۋانتادى، الايدا بىزدە كادەسىيعا جارايتىنى بولماسا، ناعىز اتىسقا ارنالعان ساداق تا، جەبە دە جوق بولىپ شىقتى. كەيبىر مامانداردىڭ ايتۋىنشا بۇعان وڭتۇستىك كارەيلەر توسەلىپ العان قۇسايدى.

قالاي بولعاندا دا، وڭشەڭ ۇلتشىل قاۋىم جينالعان مەرەكە ەرەكشە ءوتتى. جۇرت ءبىر سەرپىلدى. دەگەنمەن، ءبىز ءۇشىن باستىسى – ۇلتتىق سپورتتىڭ دايەكتى تۇردە دامۋى.

اباي-اقپارات