كەشە ۋكراينا پرەزيدەنتىنىڭ مىندەتىن اتقارۋشى الەكساندر تۋرچينوۆ رەسەيشىل سەپاراتيستەرگە 14 ءساۋىر كۇنى تاڭعى ساعات 9-عا (كيەۆ ۋاقىتىمەن) دەيىن ەلدىڭ شىعىسىنداعى بىرنەشە قالادا باسىپ العان ميليتسيا بولىمدەرى مەن ۇكىمەت عيماراتتارىن بوساتىپ، قارۋلارىن تاپسىرۋ تۋرالى ەسكەرتۋ جاساعان. تۋرچينوۆ ەگەر قارۋلارىن تاستاماسا سەپاراتيستەرگە قارسى ارميانىڭ قاتىسۋىمەن "اۋقىمدى انتيتەررورلىق وپەراتسيا باستالاتىنىن" جاريالاعان.

بۇگىن نيۋ-يوركتە بۇۇ قاۋىپسىزدىك كەڭەسى رەسەيدىڭ ۇسىنىسىمەن ۋكرايناداعى شيەلەنىستى جاعدايدى تالقىلاۋ ءۇشىن توتەنشە جيىن وتكىزدى دەپ حابارلايدى «ازاتتىق» راديوسىنىڭ سايتى. رەسەيدىڭ بۇۇ-داعى وكىلى ۆيتالي چۋركين قاۋىپسىزدىك كەڭەسىنىڭ توتەنشە جيىنىندا تۋرچينوۆتىڭ بۇل تالابىنا:"كيەۆ ۋكراينانىڭ شىعىسىندا كۇش قولدانۋدى توقتاتىپ، شىنايى ديالوگ باستاۋى ءتيىس" دەپ «الاڭداۋشىلىق» بىلدىرگەن ەكەن. ال اقش-تىڭ بۇۇ-داعى وكىلى سامانتا پاۋەرس ۋكرايناداعى شيەلەنىستى "قولدان جاسالعان جانە وندا رەسەيدىڭ قولتاڭباسى ايقىن كورىنەدى" دەپ مالىمدەدى.

ءدال قازىرگى ۋاقىتتا شىعىس ۋكراينادا قانداي جاعداي بولىپ جاتقانىنان حابارسىزبىز. دەگەنمەن پۋتيندىك رەسەيدىڭ ايتاقتاۋىمەن ءبىرتۇتاس ۋكراينانىڭ ىرگەسىن قازۋشىلار ءادىل جازاسىن الارى انىق. ەگەر الداعى ۋاقىتتا ۋكراينا توپىراعىندا ءومىر سۇرەمىن دەۋشىلەر شەكارادا ساپ تۇزەپ تۇرعان ورىس اسكەلەرىنە سەنبەگەنى ءجون شىعار. ويتكەنى ەڭ سوڭىندا ول جەردە ورىستىڭ بۇلىكشىلەرى ەمەس، قاراپايىم ۋكرايندەر قالادى...

اباي-اقپارات