دينا تولەكوۆا. 20 جىل بۇرىن ول جاس ەدى. مەن ودان دا جاس ەدىم

1994 جىلدىڭ ءساۋىر ايى... ۇيدەن شىقتىم. باعىتىم - تالدىقورعان وبلىستىق تەلەراديوكومپانياسى. ء"وزىم زاڭگەرمىن. مەنەن ءتىلشى قايدان شىقسىن؟ كەشە ۇيگە كەلگەن اعامنىڭ جولداسى "تەلەۆيدەنيەگە بارىپ، باعىڭدى سىناپ كور، باس رەداكتورىمەن سويلەسىپ قويدىم" دەگەنگە، كەلىسىمىمدى بەرە سالعانىم قاي ساسقانىم؟ جەرگىلىكتى گازەتكە اناۋ-مىناۋ دۇنيەلەرىمدى جاريالاپ تۇرعانىم بولماسا، شىن جۋرناليست بولۋ قايدا ماعان؟ قازىر الگى رەداكتور كابينەتىنەن قۋىپ شىقسا قايتەم؟ ءوزىم بىرەۋ بىردەڭە دەي قالسا، بەتىم قىزارىپ كەتۋشى ەدى. ەگەر جۇمىسقا الىپ جاتسا، ۇيالماي-قىزارماي تەلەۆيزوردان قالاي شىقپاقپىن؟ مەنەن تەلەجۋرناليست شىعۋ قايدا؟ ءاي، مەن دە، قولىمنان كەلمەيتىن دۇنيەگە كىرىسىپ "- دەپ سان مىڭ ويعا باتىپ، ءدىر-ءدىر ەتىپ كەلە جاتقانىم كەشە سياقتى ەدى... سودان بەرى اتتاي 20 جىل وتە شىعىپتى. ودان بەرى كوپ وزگەرىپپىن... مىنەزىم، بولمىسىم، ومىرلىك كوزقاراسىم، ءتىپتى جان-دۇنيەم دە مۇلدەم بولەك. ءيا، ءيا... مەنى ءومىر وزگەرتىپتى. ءبىر رەت پوستقا استارلاپ بىلاي دەپ جازعانىم ەسىمدە: "20 جىل بۇرىن ول جاس ەدى. مەن ودان دا جاس ەدىم. ول ماعان "ايت، ايتا ءتۇس" دەيتىن. ول كەزدە مەنىڭ ايتارىم از بولاتىن. 20 جىل وتكەسىن، مەنىڭ ايتارىم كوبەيدى. مەن ايتا ءتۇستىم. ول اۋزىمدى جابا ءتۇستى. مەن قابا ءتۇستىم. ول ماعان قارا كۇيە جاعا ءتۇستى دەپ". بۇعان باسقاداي پىكىر قوسۋ ارتىق شىعار...
وزگە ءۇشىن ەمەس ارينە، ءوزىم ءۇشىن ەڭبەك جولىمداعى 20 جىلىم ايتۋلى داتا. وزىڭە-ءوزىڭ ەسەپ بەرەتىن كەزەڭ. شىنىمدى ايتسام، ءوزىم شىققان بەلگىلى ءبىر بەلەستى اسا كەرەمەت كوڭىل-كۇيدە قارسى العام جوق: "نەمەنەگە جۋرناليستيكانى تاڭدادىم. تۇك بىتىرگەم جوق. وسى جىلداردا مىڭ-ميلليون جاڭالىق ءتۇزىپ، ساراپتاما جاساعان شىعارمىن. ال سونىڭ ىرگەلىسى قايسىسى؟ زايا كەتكەن ۋاقىتىم-اي",- دەگەندەي ويلاردىڭ جاڭبىرىنىڭ استىندا قالدىم. ال ەندى كەشەلى بەرى مەنىڭ تاعدىرىما الاڭداۋشىلىق ءبىلدىرىپ جاتقان سان مىڭ اعايىندى كورىپ، رايىمنان قايتتىم. پاتشا كوڭىل كورەرمەندەرىمنىڭ ىستىق ىقىلاسىنان، ءىلتيپاتىنان ارتىق نە بار؟ سەتىنەمەگەن سەنىمدەرى شە؟ بۇل - ءبىر ساتتىك ەفير ءۇشىن كۇن ۇيىقتاماي، ءتۇن ۇيىقتاماي، كەيدە اسىرىپ ايتىپ، ەندى بىردە جاسىرىپ ايتىپ، تەك سىزدەرگە شىنايى اقپاردى جەتكىزۋگە شاما-شارقىمشا بارىمدى سالعان مەنىڭ جانە وسى قىزمەتتە مەنىمەن جۇرگەن بارشا ۇجىمنىڭ ەڭبەگىنىڭ اقتالعانى دەپ بىلەم... زۋ ەتىپ وتە شىقانىمەن ەفير كوپ ويلاعانداي وڭاي دۇنيە ەمەس. ول اسقان جاۋاپكەرشىلىك. ول ءتوزىم. ول جانكەشتى ەڭبەك. سول ءبىر 1-2 مينۋتتىق نەمەسە جارتى ساعاتتىق سيۋجەتتىڭ ارتىندا سانداعان ادامنىڭ سان كۇندىك ماڭداي تەرى مەن ەڭبەگى بار... ايتپاعىم، قازاقتىڭ ءبىر قارا قىزىنا الاڭداپ قانا قويماي، جىلى سوزدەرىڭىزبەن قۋات بەرگەن سىزدەرگە مىڭ العىس!

Facebook.com جەكە پاراقاشاسىنان الىندى

ABAI.KZ