سونىمەن، وتكەن اپتا وزگەرىسكە تولى بولدى: ك.ءماسىموۆ ويلاماعان جەردەن ۇكىمەت باسشىسى بولىپ، ەكىنشى مارتە كەلدى. ادىلبەك جاقسىبەكوۆ مەمحاتشى، سەرىك احمەتوۆ قورعانىس ءمينيسترى. تاعىسىن تاعىلار...

ساناسىنا ساۋلە تۇسىرگەن اللانىڭ ءامىرى مە، حالىقتىڭ قاھارى ما، ايتەۋ سەرىك احمەتوۆ №248 قاۋلى قابىلداپ، بۇدان بىلايعى جەردە شەتەلدەن كەلەتىن قانداستارىمىزدى قونىستاندىرۋعا ارنالعان جەتى وبلىستى بەلگىلەپ كەتتى.

ال، ەڭ ۇلكەن وزگەرىستى جاساعان كىسى – ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا.

وسىدان ەكى اپتا بۇرىن «قازاقستانسكايا پراۆدا» گازەتىندە /29 مارتا 2014, № 61 (27682)/ شىققان «يزمەنەنى پراۆيلا راسسەلەنيا ەتنيچەسكيح كازاحوۆ» اتتى ماقالا ەستەرىڭىزدە بولار. سونى وقىپ، «اللا قالاسا سەڭ قوزعالدى!» دەپ، بۇكىل الاش جۇرتى الاقايلاعان بولاتىن. الىستان كەلگەن اعايىن اۋدارماشى ىزدەپ سابىلدى. كەيىن بىلدىك قوي، شىنىمەن دە قانداستارعا قاتىستى ايتا قالسىن وزگەرىس بار ەكەن مۇندا. تاۋەلسىزدىكتەن بەرگى قازاق كوشىنىڭ شەرىك عاسىرعا جالعاسقان تاريحىندا بولماعان، ەشبىر ءمينيستردىڭ باتىلى جەتىپ جاساي الماعان وزگەرىس بۇل. قۇداي وڭىنا باستايىن دەسە، وپ-وڭاي ەكەن عوي، بۇل – وسى كوشى-قون سالاسىن باسقارعان قانشاما دانىشپاننىڭ بىرەۋىنىڭ تانازارىن كىرمەگەن، اقىلى جەتپەگەن رەفورما بولدى. تەرەششەنكودەن بەرى قانشا ادام ۇكىمەت باسىنا كەلدى، بىردە - بىرەۋى قول سالىپ اتقارماعان شارۋانى شىناشاقتاي تاماش قىز ءبىر-اق كۇندە بۇرق ەتكىزدى. نە دەگەن كورەگەندىك، نە دەگەن بىلىكتىلىك، نە دەگەن باتىلدىق!!! امال قانشا، پرەمەر - مينيستر ەتىپ ك.ءماسىموۆتى ەمەس، وسى ت.دۇيسەنوۆانى كويۋ كەرەك ەدى ەلباسى!

سوندا نە وزگەرىس جاساپتى دەيسىز عوي؟ بۇرىن شەتەلدەن كوشىپ كەلگەن قانداستارىمىز، كەلە سالىپ، تۇراقتى تىركەۋگە تۇرۋ ءۇشىن ەڭ الدىمەن «ورالمان كۋالىگىن» الۋعا جۇگىرەتىن. ءبىراز قاعازدىڭ بەتىن تولتىرىپ، ءبىر اپتا توسىپ، ازەر الاتىن. ەندى راحات. اۋەلى تۇراقتى تىركەۋگە تۇرىپ، ىقتيارحات الۋى كەرەك، ىقتيارحات العان سوڭ بەس كۇننىڭ ىشىندە ورالمان مارتەبەسى بەرىلەتىن بولىپتى. وزگەرىستىڭ كوكەسى دەپ وسىنى ايت!

نە كۇلەرىڭدى، نە جىلارىڭدى بىلمەيسىڭ! قازاق كوشى كەشە عانا پايدا بولسا ءبىر ءسارى، تابانى كۇرەكتەي 23 جىل بولدى عوي جالعاسقالى. قۇداي-اۋ، سودان بەرى قازاقستان بيلىگى گرامم تاجىريبە جيناماعانى ما سوندا؟؟! ورالماندارعا بەرىلەتىن كۆوتا باياعىدا توقتاعان. شىنى كەرەك، ەندى وسى «ورالمان كۋالىگى», «ورالمان مارتەبەسى» دەگەننىڭ تۇككە كەرەگى قالماي قالدى. قايتا، قانداستارىمىزدى تۇرعىلىقتى ەلدەن الىستاتاتىن، وعاش كورسەتەتىن اتاۋعا اينالدى. جەكە باسىن كۋالاندىراتىن قۇجاتىندا قازاق دەگەن جازۋ بولسا، سول جەتپەي مە؟! ودان ارتىق سىزگە قانداي مارتەبە، كۋالىك كەرەك!؟

قازىر الىستان كەلىپ جاتقان اعايىندى ازاپقا سالىپ سورلاتىپ وتىرعان ەكى قۇجات بار.

سونىڭ ءبىرىنشىسى – س.احمەتوۆتىڭ №111 قاۋلىسىنا ساي شەتەل ەلشىلىكتەرى بەرەتىن «سپراۆكا». ەكىنشىسى – وسى «ورالمان كۋالىگى».

مىسالى، قازاقستانعا تۇراقتى تىركەۋگە تۇرۋ ءۇشىن مەيلى قورعالجىنعا قونىستان، مەيلى قىزىلجارعا تۇراقتا – ءبارىبىر، قىتاي ەلشىلىگىنەن «سپراۆكا» الۋعا نە الماتىعا، نە استاناعا بارۋىڭ شارت. وتاعاسىمەن بىرگە، وبتاسىنىڭ كامەلەتتىك جاسقا تولعان مۇشەلەرى تۇگەلىمەن. قازاقستاننىڭ قاي تۇكپىرىنەن بولسىن، كارتەيگەن شال-كەمپىرگە دەيىن تەك ءوزى كەلۋى كەرەك. ەلشىلىك اپتانىڭ ءۇش كۇنىندە تەك تۇسكە دەيىن عانا قابىلدايدى. ءبىر ءتاۋىرى تاڭەرتەڭ وتكىزگەن قۇجاتىڭ تۇستەن كەيىن ساعان 15:00 - دە دايىن بولادى.

«ورالمان كۋالىگىن» الۋ دا ودان ءبىر كەم سوعىپ تۇرعان جوق. اۋىلعا كەلىپ قونىستانعان وبلىس ورتالىعىنا اپارىپ قۇجات وتكىزەدى. بەس كۇننەن سوڭ، قايتا بارىپ الاسىڭ. سونى، ەلدى الىسقا سابىلتپاي، نەگە اۋداننان-اق بەرە سالمايتىنىنا تاڭ قالام!

قىسقاسى، جەتى وبلىس قانشا جەردەن ەسىگىن ايقارا اشىپ تۇرعانىمەن، وسى ەكى قۇجاتتىڭ كوزىن جوعالتپاي، ۇلتى قازاق ازاماتتارعا جەڭىلدەتىلگەن تارتىپپەن كەلە سالعاندا بىردەن ازاماتتىق بەرمەي تىنىشتىق جوق! قالعانىنىڭ ءبارى بوس ءسوز، دالباسا تىرلىك!

بىراق، قالاي دا وزگەرىستىڭ بولىپ تۇرعانى جاقسى. اللا وزگەرىسسىز قالعاننان ساقتاسىن!

ءشارىپحان قايسار

abai.kz