پرەزيدەنت ن.نازارباەۆ مادەنيەت ءمينيسترى ارىستانبەك ءمۇحاماديۇلىن قابىلدادى. بۇل تۋرالى اقوردانىڭ ءباسپاسوز قىزمەتى حابارلايدى.

«كەزدەسۋ بارىسىندا ۇلتتىق مۇراجايدى اشۋ ماسەلەلەرى، ەحرو-2017 حالىقارالىق كورمەسىنە دايىندىقتىڭ مادەني اسپەكتىلەرى، سونداي-اق  مينيسترلىكتىڭ قىزمەتىنىڭ باستى باعىتتارى تالقىلاندى. 

مەملەكەت باسشىسى رەسپۋبليكادا 8 مىڭ جەرگىلىكتى جانە 39 رەسپۋبليكالىق مادەنيەت مەكەمەسى جۇمىس ىستەيتىنىن، ولاردىڭ ءرولى كۇننەن-كۇنگە ۇلعايىپ كەلە جاتقانىن اتاپ ءوتتى. 

– سوڭعى 10 جىلدا تەاترعا كەلۋشىلەر سانى – 50 پايىزعا، مۋزەيگە كەلۋشىلەر –25 پايىزعا، كىتاپحاناعا كەلۋشىلەر – 40 پايىزعا، كونتسەرت زالدارىنا كەلۋشىلەر – 100 پايىزعا، كينوتەاترعا كەلۋشىلەر سانى 400 پايىزعا كوبەيدى. مۇنىڭ ءبارى حالىقتىڭ ءال-اۋقاتىنىڭ ارتقانىن جانە مادەنيەتكە، بىلىمگە دەگەن ىنتانىڭ وسكەنىن بىلدىرەدى. سوعان بايلانىستى وسى سالاداعى كادرلاردى ساپالى دايارلاۋ، قىزمەتتىڭ بىرىڭعاي تاجىريبەلەرىن ازىرلەۋ ماسەلەسىن قاراستىرعان ءجون. ءار وبلىستا مەملەكەت قارجىلاندىراتىن 2 تەاتردان بار. بۇگىندە حالىق اراسىندا ولاردىڭ قانداي جۇمىس جۇرگىزەتىنىنە، مادەني سالماعى مەن قىزمەتىنىڭ ساپاسى قانشالىقتى ەكەندىگىنە كوبىرەك كوڭىل اۋدارعان ءجون، – دەدى نۇرسۇلتان نازارباەۆ.

قازاقستان پرەزيدەنتى جۇمىسى كۇشەيتىلۋگە ءتيىس بىرقاتار باعىتتارعا توقتالدى.

– ازاماتتىق قوعاممەن ىنتىماقتاسۋ، مەملەكەتتىك ءتىل ۇيرەتەتىن اككرەديتتەلگەن ورتالىقتار جەلىسىن قۇرۋدى جالعاستىرۋ قاجەت. الەۋمەتتىك تاپسىرىستار اياسىندا بارلىق شىعارماشىلىق وداقتارمەن، قازاقستان حالقى اسسامبلەياسىمەن، دۇنيەجۇزى قازاقتارىنىڭ قاۋىمداستىعىمەن، «بولاشاق» باعدارلاماسىمەن جۇمىستى جانداندىرۋ كەرەك. الەۋمەتتىك ماڭىزى بار ادەبيەتتەرگە كەلسەك، حالىققا قىزىقتى، مازمۇنى ساپالى شىعارمالاردى شىعارۋعا نازار اۋدارۋ قاجەت. ءبىز – جازۋشىلارعا شىعارمالارىن باسىپ شىعارۋى ءۇشىن قاراجات ءبولىپ وتىرعان جالعىز مەملەكەتپىز. شىعارمالار ەلدىڭ ىشىندە دە، سىرتىندا دا ءبىزدىڭ مادەنيەتىمىزدىڭ ءرولىن ارتتىرۋعا باعىتتالۋى ءتيىس، – دەدى مەملەكەت باسشىسى.

ا.مۇحامەديۇلى مەملەكەت باسشىسىنىڭ قازاقستان حالقىنا جولداۋىندا بەرىلگەن تاپسىرمالارىنىڭ ىسكە اسىرىلۋى، سونىڭ ىشىندە مادەني ساياسات جانە حالىقارالىق جۇيەمەن ىقپالداستىعىنىڭ ۇزاقمەرزىمدى تۇجىرىمداماسىنىڭ ازىرلەنۋ بارىسى تۋرالى باياندادى.

بۇعان قوسا، مينيستر تىلدەردى دامىتۋ جانە ولاردىڭ قىزمەتى جونىندەگى مەملەكەتتىك باعدارلامانىڭ ىسكە اسىرىلۋى تۋرالى مالىمدەدى.

مادەنيەت ءمينيسترى ۆەدومستۆو الدىنا قويىلعان مىندەتتەردىڭ ءبىرى قوعامىمىزدىڭ رۋحاني دامۋى ەكەنىن اتاپ ءوتتى. قازاقستاندا قازىردىڭ وزىندە  شەبەرلىكتىڭ بيىك دەڭگەيىن كورسەتىپ جۇرگەن «استانا وپەرا» وپەرا جانە بالەت تەاترى، ۇيعىر، كورەي جانە نەمىس تەاترلارى، باسقا دا مادەني مەكەمەلەر بار. وسى ورايدا نەگىزگى مىندەت – ولاردى حالىقارالىق دەڭگەيگە شىعارۋ.

كەزدەسۋ قورىتىندىسىندا مەملەكەت باسشىسى قارالعان ماسەلەلەر بويىنشا بىرقاتار ناقتى تاپسىرمالار بەردى»، - دەلىنگەن اقوردانىڭ ءباسپاسوز قىزمەتى تاراتقان حابارلامادا.

ال، كتك ارناسىنىڭ حابارلاۋىنشا، مينيستر اتانعاننان بەرى پرەزيدەنتتىڭ قابىلداۋىنا ءبىرىنشى رەت بارعان ا.مۇحامەديۇلى قاتتى ساسقان كورىنەدى.

اباي-اقپارات