اقبەرەن ەلگەزەك. جوق، مەن جەڭىلمەپپىن. مەن جەڭگەن ەكەنمىن
بۇگىن ءبىر جىگىتتەر تۋرالى ءارتۇرلى اڭگىمە ەستىپ، ءارى كۇرسىندىم ءارى قۋاندىم. كۇرسىنگەنىم - ولاردى اياعانىم، قۋانعانىم - ءوزىمنىڭ قاتتى وزگەرگەندىگىمدى سەزگەنىمنەن ەدى. ۋنيۆەرسيتەت بىتىرە سالىسىمەن 10 جىلعا جۋىق مەملەكەتتىك قىزمەتتە ىستەدىم. قولىمنان ەشتەڭە كەلمەسە دە، قۇزىرەتىمدە ءبارىن وزگەرتۋگە مۇمكىندىك بەرەتىن ۇلكەن تەتىكتەر بولماسا دا، قازاق مەملەكەتىنىڭ بولاشاعىنا، باسشىلىقتىڭ دۇرىس ساياساتىنا ولەردەي سەنىپ، بەلسەندى جۇمىس ىستەيتىنمىن. ءتىپتى، جۇمىستان ەلدەن كەش شىعىپ، ەرتە كەلەتىنمىن. كوپ وقىپ، باسشىلىققا ەڭ كوپ ۇسىنىس بەرگىش تە ءبىز ەدىك. "پىسىق" تا، "مانساپقور" دا اتانعانبىز. العاشىندا جۇرەگىڭ اۋىراتىن، ارتىنشا ميىعىمىزدان كۇلىپ، جۇرە بەرۋگە دە داعدىلاندىق. سەبەبى، جۇمىس ىستەگەن ادامنىڭ عانا ارتىنان كۇڭكىل ءسوز ەرەتىنىن ەرتە تۇسىنگەن ەدىك. اۋىلدان اتتانعاندا، ۇلى ارماندارمەن شىققان ەدىم. تاۋەلسىز ەلىمنىڭ جارقىن بولاشاعىنا سەنگەن اڭعال جۇرەگىم مەن بالاڭ تانىمنىڭ ارقاسىندا ەشتەڭەنى ەلەمەي، كوپ دۇنيەنى بايقاماي جۇرەتىنمىن. جىلدار ءوتتى، ءومىر وزگەردى. ءومىر وزگەرگەن جوق ەكەن. سانا، كوزقاراس وزگەرىپتى. سانا وزگەرگەن سوڭ، سيىسپاۋ ورىن الدى، شەتتەتىلۋ مەن الەۋمەتتىك جەڭىلىستەر ءداۋىرى باستالدى. اللاعا سانسىز ءتاۋبا، سىنۋعا تاياپ قالعاندا، ىشكى رۋحىمىز بەك سەرپىلىپ، ەڭسەمىزدى تىكتەپ جىبەرەتىن. بۇگىن ەندى زامان دا، قوعام دا باسقا. ال، ءبىزدى باسقارىپ وتىرمىز دەپ ەسەپتەيتىن الگى جىگىتتەر شىن مانىندە ەشتەڭەنى بايقاماي، ون جىل بويى سول دەڭگەيدە، سول قالپىندا قالىپ قويىپتى. جوق، مەن جەڭىلمەپپىن. مەن جەڭگەن ەكەنمىن، جىگىتتەر! سەبەبى، مەن حالىقپەن بىرگە وزگەرىپپىن، ال، سەندەر كوشتەن قالىپ قويىپسىڭدار. اللا شەبەر عوي! ساعان نە قايىرلى، نە قايعىلى ەكەنىن جاراتقاننان ارتىق كىم بىلەدى؟ ءوزىڭ قايدا كەتىپ بارا جاتقانىندى ءوزىڭ دە بىلمەيسىڭ. ەندىگى بار ارمانىم، بار اسقاق مۇراتىم - قازاقتىڭ جوعىن جوقتاپ، بارىن كوبەيتۋ. بىزدە بۇلاي سويلەگەن "مەملەكەتتىك ساياساتقا قارسى", "حالىق جاۋى" دەپ تانىلاتىنىن دا جاقسى بىلەمىن. اسىلىندە، ولاي ەمەس قوي، مۇلدە! وتىرىپ اپ سىناۋ دا - كەرەمەت شارۋا ەمەس ەكەنىن ۇعىنامىن. حالىققا بىلگەن-تۇيگەنىن ايتقان ادامدى "جاۋ، سودىر، بۇلىكشىل" دەپ تانيتىن كىسىلەر قوعامنىڭ جەدەل دامۋى ءۇشىن پىكىر الۋاندىعىنىڭ قاجەتتىلىگىن، ۇسىنىس پەن ءادىل باعانىڭ كەرەكتىگىن بىلسە، ابزال بولارىن ەستەرىنە سالعىم كەلەدى. بۇگىنگى ءبىز قانداي بولعانىمىز ءجون، ەرتەڭگى ۇرپاق قانداي بولۋ كەرەك، مەملەكەتىمىزدىڭ كەمەلدەنۋى قاي جولمەن دامۋى ءتيىس دەگەن ماسەلەلەردى بىرلەسە قاراستىراتىن، بىرلەسە ىسكە اسىراتىن جولدا بولعىم كەلەدى. سەبەبى، مەن اقىن رەتىندە دە، ازامات رەتىندە دە وتانىمدى شەكسىز سۇيەمىن!
