رەسەي قازاقستان شەكاراسىنا زىمىران كەشەندەرىن ورنالاستىرماق
رەسەي قازاقستانمەن اراداعى شەكاراعا "يسكاندەر" زىمىران كەشەندەرىن ورنالاستىرادى دەپ حابارلايدى "يزۆەستيا".
رەسەيدىڭ ارنايى قۇرىلىس فەدەرالدىق اگەنتتىگى 2014 جىلدىڭ سوڭىنا قاراي قازاقستانمەن اراداعى شەكارادان 100 شاقىرىمعا "يسكاندەر-م" زىمىران كەشەندەرى قويماسىن سالۋدى جوسپارلاپ وتىر. قاجەت بولعان جاعدايدا قر ۇكىمەتىمەن اراداعى ۋاعدالاستىققا سايكەس، جەدەل-تاكتيكالىق زىمىرانداردى قازاقستان اۋماعىنا جىلدام جىلجىتۋعا بولادى - بۇل ۇجىمدىق قاۋىپسىزدىك تۋرالى شارت ۇيىمىنىڭ قۇجاتتارىندا قاراستىرىلعان.
رەسەي قورعانىس مينيسترلىگىنىڭ اقپاراتىنا سايكەس، ورىنبور وبلىسى توتسكوە-2 سەلوسىنداعى "يسكاندەرلەرگە" ارنالعان الاڭدى دايىنداۋ جىلدىڭ سوڭىنا دەيىن اياقتالادى. ارنايى قۇرىلىس اگەنتتىگى قويمانى دايىنداۋ جونىندەگى جۇمىستار تۋرالى اقپاراتتى راستادى، بىراق جاي-جاپسارىن ايتۋدان باس تارتتى. 2014 جىلدىڭ جەلتوقسانىندا توتسكوە-2 ەلدى مەكەنىندەگى زىمىران بريگاداسى "يسكاندەر-م" جاڭا كەشەندەرىن قابىلداۋعا دايىن بولادى. بۇل ءبولىم 2012 جىلدىڭ كۇزىندە ورىنبور تۇبىندەگى كامەنكا ەلدى مەكەنىنەن كوشىرىلىپ اكەلگەن.
ايتا كەتەيىك، رەسەي قارۋلى كۇشتەرىنىڭ زىمىران بريگاداسىندا 12 ىسكە قوسۋ كەشەنى بار. "يسكاندەر-م" كەشەندەرىنىڭ ارەكەت ەتۋ قاشىقتىعى - 500 شاقىرىمعا دەيىن، ر-500 قاناتتى زىمىراندارى ءۇشىن بۇل كورسەتكىش 2000 شاقىرىمعا جەتۋى مۇمكىن. توتسكوە-2 مەكەنىندەگى كەشەندەر قازاقستاننىڭ وڭتۇستىك جانە وڭتۇستىك-شىعىسىنا دەيىن اتىپ تۇسىرە الادى. ساراپشىلاردىڭ پىكىرىنشە، قازىرگى زامانعى زىمىران كەشەندەرى بۇرىنعى كەڭەستىك رەسپۋبليكالاردى ورتالىق ازياداعى بولۋى مۇمكىن قاۋىپتەردەن قورعاۋعا مۇمكىندىك بەرەدى.
وسى جايتقا بايلانىستى تۇسىنىكتەمە بەرگەن Moscow Defence Brief جۋرنالىنىڭ باس رەداكتورى ۆاسيلي كاشين اقش-تىڭ اۋعانستاننان اسكەرىن شىعارا باستاۋىنا بايلانىستى ورتالىق ازيانىڭ مەيلىنشە قاۋىپ-قاتەرلى باعىت سانالىپ وتىرعانىن ايتتى. ونىڭ پىكىرىنشە، امەريكالىقتاردىڭ كەتۋى قىرعىزستان مەن وزبەكستاندا احۋالدىڭ تۇراقسىزدانۋىنا اكەلىپ سوعۋى مۇمكىن. "مۇنداي جاعدايدا رەسەيدىڭ ورتالىق اسكەري وكرۋگىنىڭ جاساقتارى جىلدام جىلجۋعا جانە قازاقستانعا شەكارانى قورعاۋعا كومەكتەسۋگە دايىن بولۋى ءتيىس. قازاقستاننىڭ ءوز كۇشتەرى ونشا كوپ ەمەس", - دەدى كاشين.
ستراتەگيالىق باعالار ينستيتۋتىنىڭ پرەزيدەنتى الەكساندر كونوۆالوۆ اۋعانستاندى راديكال يسلامنىڭ تولقىنى شارپۋى مۇمكىن دەپ ەسەپتەيدى. "بۇل ىقپال ەل شەكاراسىنان تىس اۋماقتارعا، ەڭ الدىمەن، ورتالىق ازيانىڭ پوستكەڭەستىك رەسپۋبليكالارىنا تارالاتىن بولادى. قازاقستان مەن ءبىزدىڭ مۇددەلەرىمىز ۇقساس. يسلاميستەر بانداسىمەن سالىستىرعاندا، تەحنيكا، سونىڭ ىشىندە، "يسكاندەرلەر" ەسەبىنەن ءبىزدىڭ ۇلكەن ارتىقشىلىعىمىز بولادى", - دەيدى ساراپشى.
