رەسەي ۋكرايناعا باسىپ كىرۋى مۇمكىن
اقش بارلاۋ قىزمەتى رەسەيدىڭ ۋكرايناعا باسىپ كىرۋى ىقتيمال دەپ سانايدى. بۇل تۋرالى ارنايى قىزمەتتەردىڭ CNN جۋرناليستەرىنە ءمالىم بولعان بايانداماسىندا ايتىلادى. اقش پرەزيدەنتى اكىمشىلىگىنىڭ وكىلدەرى سوڭعى ءۇش-ءتورت كۇن ىشىندە "ۇرەيلى نىشاندار" بايقالعانىن انونيم تۇردە حابارلاعان.
امەريكالىق شەنەۋنىكتەردىڭ پىكىرىنشە، قازىر رەسەيلىك جاساقتاردىڭ ارەكەتى بولىمشەلەرىنىڭ سانى مەن قارۋلانۋى جاعىنان رف ارمياسىنىڭ گرۋزيا مەن شەشەنستانداعى سوعىس الدىنداعى جاعدايىن ەسكە تۇسىرەدى. اقش پرەزيدەنتى اكىمشىلىگىنىڭ وكىلدەرى رەسەي اسكەرىنىڭ حاركوۆ، لۋگانسك، دونەتسك باعىتىنا قاراي ويىسۋى مۇمكىن ەكەنىن ايتادى. قازىر رەسەيلىك جاساقتار روستوۆ، كۋرسك، بەلگورود قالالارى ماڭىنا ورنالاسقان. اقش-تىڭ مالىمەتىنشە، ولاردىڭ ۇزىن سانى - 30 مىڭ ادام. امەريكالىق اسكەريلەر بۇل وقۋ-جاتتىعۋعا قاجەتتى ادامدار سانىنان "الدەقايدا كوپ" دەپ ەسەپتەيدى.
اقش وكىلدەرىنىڭ مالىمەتىنشە، رەسەي جاساقتارى قۇرامىنا موتورلاندىرىلعان قۇرامالار، اۋە قورعانىسى كۇشتەرى، اتاپ ايتقاندا، رەسەيدىڭ وزگە ايماقتارىنداعى جاساقتارعا قاراعاندا اناعۇرلىم ۇتقىر كولىك اۆياتسياسى كىرەدى. سونىمەن بىرگە، امەريكالىق تاراپتىڭ پىكىرىنشە، جاساقتاردىڭ شەكارالاس توپتارى كۇشەيتىلىپ جاتىر جانە قازىر قۇرامىنا اۋەگە قارسى قورعانىس كۇشتەرىن قوسىپ العان. بارلىق بولىمشەلەر ۇرىس ارەكەتتەرىنە دايىن جاعدايدا.
كۇش قۇرىلىمدارى وكىلدەرى اقش كونگرەسىن رەسەيدىڭ ۋكرايناعا باسىپ كىرۋ مۇمكىندىگى تۋرالى حاباردار ەتكەن. سونىڭ ناتيجەسىندە رەسپۋبليكاشىلدار پارتياسىنىڭ وكىلدەرى اقش پرەزيدەنتىنە حات جولداپ، الاڭداۋشىلىق ءبىلدىردى. امەريكالىق دەپۋتاتتاردىڭ حاتىنا قاراعاندا، ولار رەسەيلىك اسكەرلەر پريدنەستروۆەگە دە جىلجىپ، بالتىق جاعالاۋى اۋماعىن باسىپ الۋى مۇمكىن. گەنەرال فيليپ بريدلاۆ رەسەيلىك جاساقتاردىڭ مولدوۆاعا باسىپ كىرۋگە جەتكىلىكتى ەكەنىن رەسمي تۇردە مالىمدەدى. بۇعان دەيىن اقش پرەزيدەنتى باراك وباما رەسەيگە باتىستا بىرىككەن مايدان بار ەكەنىن ەسكەرتكەن بولاتىن.
