جاقىندا «اباي» پورتالىندا قوستاناي قالاسىنىڭ 135 جىلدىق تويىنداعى ۇلتىمىزعا جات قىلىقتاردىڭ ورىن العاندىعى تۋرالى جازىلعان ەدى. ۇلتتىق سالت-داستۇرلەرىمىز بەن قادىر-قاسيەتتەرىمىزدىڭ اياققا تاپتالىپ جاتقانىن كورۋ بىزگە ۇيرەنشىكتى جاعداي بولىپ قالعان سياقتى. سونداي جاعداي ءبىزدىڭ ستەپنوگورسك قالامىزدا دا ورىن الىپ وتىر. قىركۇيەك ايىنىڭ 12-13 كۇندەرى ستەپنوگورسك قالاسىنىڭ 50 جىلدىق مەرەيتويى تويلانادى. وسىعان وراي قالادا قىزۋ دايىندىق جۇمىستارى جۇرگىزىلۋدە. قالانىڭ كوپتەن بەرى جوندەۋ كورمەگەن جولدارى جوندەلىپ، قالامىزدىڭ كوركى كىرىپ قالدى.

الايدا كوڭىلگە كىربىڭ ۇيالاتىپ، ۇلتتىق قۇندىلىعىمىزعا كەرى اسەرىن تيگىزەتىن جاعى، قالا شەتىندەگى ساياباقتا «ەتنوقالاشىق» دەگەن اتپەن ءۇش ءۇي سالانىپ جاتىر. بۇل جوبانىڭ ءمانى ساياساتپەن ۇشتاستىرىلىپ، كەدەن وداعى جانە ەۆرازيالىق وداق نەگىزىندە ورىس، بەلارۋس جانە قازاقتىڭ ۇيلەرىن سالۋ جوسپارلانعان كورىنەدى. ايتپاقشى بولعانىم ۇيلەردىڭ سالىنۋىندا ەمەس كوركىندە بولىپ وتىر. ورىستىڭ ءۇيى اعاشتان ءارى ءزاۋلىم، ءارى كورىكتى ەتىپ تەرەزەلەرى شىنىدان زاماناۋي تۇردە سالىنعان. بەلارۋستىكى دە ادەمى ەتىپ سالىنىپ سىرتى اقتالعان جانە قابىرعاسىنا اتەشتىڭ سۋرەتى سالىنىپ، ادامدى ەرىكسىز وزىنە تارتادى.

ال قازاقتىڭ ءۇيى ءتورت بۇرىشتى، الاسا ەتىپ تاستان قاشالعان، تەرەزەسى كىشكەنە، شىنى ورنىنا كلەنكامەن قاپتالعان، توبەسى بالشىقپەن سىلانىپ، قىستاقتارداعى مال قامايتىن قىسقى قورانىڭ ءدال ءوزىن جاساپ قويىپتى. توي كۇنى ءدۇيىم جۇرت سول قالاشىققا بارىپ ەتنومادەنيەتىمىزدى تاماشالاعاندا اناۋ ءزاۋلىم ۇيلەردىڭ جانىنداعى مال قورانى كورىپ قانداي ويدا بولادى ەكەن.

قازاق ەجەلدەن مالدان ايىرماشىلىعى جوق، مادەنيەتتەن كەندە قالعان حالىق دەپ ۇستىمىزدەن كۇلمەي مە؟ وسىعان ورەسى جەتپەگەن قالا اكىمشىلىگى مەن ىشكى ساياسات بولىمىندەگىلەردىڭ ناداندىعى قانىڭدى قايناتادى. قارنىڭنىڭ اشقانىنا ەمەس، قادىرىمىزدىڭ قاشقانىنا وكىنەسىڭ. ۇلت جاناشىرلارىمىز دەپ جۇرگەن ازاماتتار مەن قوعامدىق بىرلەستىكتەر وسى باسسىزدىققا ءۇن قوسۋلارىڭىزدى سۇرايمىن. سەبەبى، ءبىزدىڭ قالا اكىمشىلىگىنە مۇنى ايتقانمەن ءوزىڭدى ايىپتاعاننان باسقا ەش ناتيجە شىقپاسىنا سەنىمدىمىن.

Abai.kz