قازاقستاندا پاتريوت از با، ءبارى دە «پاتريوت». بىرەۋى سوزىمەن پاتريوت، بىرەۋى انشەيىن سىرت كوزگە پاتريوت، ەندى بىرەۋى اقشا بار جەردە عانا پاتريوت. ءتىپتى، كەيبىرى ەگجەي-تەگجەيىنە كوز جۇگىرتپەستەن ارەكەت قىلادى. وسىنداي ءبىر الا قىزبا، الىپ ۇشپا «پاتريوتتارعا» بيىلدىڭ ءساۋىر ايىندا كۋا بولعانبىز. «اڭىز ادام» جۋرنالىنىڭ ەكىنشى دۇنيەجۇزىلىك سوعىس قاسىرەتىنە ارنالعان سانى شىعار-شىقپاستان، جۋرنال بەتىندەگى گيتلەردىڭ سۋرەتىنە بولا، ەش وقىماعان بولسا دا جۋرنال ورتەۋ اكتسياسىن وتكىزگەن كيم سەرىكباۆ، سەرگەي پاشەۆيچ، مۇرات ابدىشۇكىروۆ باستاعان ءبىر توپ اۋعان سوعىسى ارداگەرلەرىنىڭ ارەكەتى قالىڭ جۇرتتى تاڭعالدىرىپ ەدى. «اڭىز ادام» تۋرالى اڭگىمە ءوز الدىنا. ال، مەن سول كەۋدەسىنە سولكەباي تاققان ادامداردىڭ ارەكەتىن ەش تۇسىنە الماعان ەدىم، ءسىرا ولاردىڭ ءىسى ەرەكشە ءبىر «پاتريوتتىقتىڭ» ۇلگىسى بولار. جۋرنال يەسى جارىلقاپ قالىبايدى سوتتان سوتقا سۇيرەپ ءجۇرىپ، جۋرنالدىڭ داۋعا قالعان سانىن تاركىلەۋگە ءتورت اي ۋاقىت جۇمساعان قۇزىرلى ورىنداردىڭ ءىسىن ولار جۋرنال شىعىپ، ءۇش كۇن وتپەستەن-اق اتقارىپ تاستاپتى. بۇلار ەل باسىنا قانداي دا ءبىر قاۋىپ تونسە الدىمەن ۇران سالادى دەپ بىلگەم، قايدام، جاڭىلىپپىن، سولتۇستىكتەگى كورشى ەلدىڭ پرەزيدەنتى پۋتين «قازاقتاردا ەشقاشان مەملەكەت بولماعان» دەپ ايتقانىنا ەكى اپتا ۋاقىت بولدى، جۋرنال ورتەگىش «پاتريوتتارىم» پۋتيننىڭ سۋرەتىن ورتەي مە دەپ ەلەڭدەيمىن، ءالى كورىنبەيدى...

قالىڭ جۇرتتىڭ ەسىندە بولسا، 21 ساۋىردە الماتى قالاسى، 28 پانفيلوۆشىلار پاركىندە پانفيلوۆتىڭ نەمەرەسى ايگۇل بايكاداموۆا دا قاتىسقان ءبىر توپ اۋعان سوعىسى ارداگەرلەرىنىڭ جۋرنال ورتەۋ اكتسياسى ءوتتى. بۇل 18 ساۋىردە شىققان «اڭىز ادام» جۋرنالىنىڭ كەزەكتى سانىنا بايلانىستى ەلىمىزگە رەسەي جىبەرگەن رەسمي نوتادان كەيىن بولعان وقيعا. ولار ەش وقىماستان جۋرنال ورتەپ، «سوۆەت وداعىنا فاشيستەر تيىسپەسىن!»، - دەپ ۇران سالعان ەدى. جۋرنال ورتەۋ اكتسياسىنا نكۆد فورماسىن كيىپ كەلگەن سەرگەي پاشەۆيچ جۋرنالدى نكۆد نايزاسىنا شانشىعان، ال، قالعان سوعىس ارداگەرلەرى جۋرنالدى ورتەپ جىبەرىپ، كۇلىن دە قالدىرماي اياققا تاپتاپ كەتكەن بولاتىن.

ال، مىنا ۆيدەودا گيتلەر تۋرالى قاراما-قايشى پىكىرلەردى باسىپ، ونى ادامزات قاسىرەتى دەپ اتاعان «اڭىز ادام» جۋرنالىن داۋلەت قارابەكوۆ ەسىمدى اۋعان سوعىسى ارداگەرى تاپ-تازا پروۆوكاتسيا دەيدى، بىراق «قازاقتاردا مەملەكەت بولماعان»، - دەپ، تۇتاس ءبىر حالىقتى ارانداتقان پۋتيننىڭ سوزىنە ءبىر اۋىز ءۋاج ايتا قويعان جوق.

ۋكراينانىڭ تۇتاستىعىنا قول سۇعىپ، قىرىمدى تارتىپ العان پۋتيننىڭ ءىسىن وڭ باعالاپ، بەيبىت زاماندا نكۆد فورماسىن كيىپ تايراڭداپ جۇرگەن پاشەۆيچتەر ءوزى عۇمىر كەشىپ جاتقان مەملەكەتتىڭ تاريحتا مەملەكەتتىگى بولماعانى تۋرالى سوزگە ەش ءمان بەرمەيتىنى تۇسىنىكتى دە شىعار. الايدا، سول جۋرنالدى ورتەۋگە بارعان وزگە ازاماتتار باعزى زامانداردان التاي-اتىراۋ اراسىن اتىن اۋىزدىقپەن سۋعارىپ، تولارساقتان قان كەشىپ قورعاعان باتىر قازاقتىڭ ۇرپاقتارى ەدى عوي. پۋتينگە ءلام دەي الماي، جىرينوۆسكيدى سىرتتاي عانا جەلكەلەگەن ءبىر-ەكى دەپۋتات بولماسا، نە ءبىر اسكەري شەندى، نە ءبىر قوعام قايراتكەرى تۇتاس قازاقتى قورلاعان رەسەي پرەزيدەنتىنە قاراتىپ رەسمي مالىمدەمە جاساي العان جوق.  اۋعان سوعىسىنىڭ جۋرنال ورتەگىش ارداگەرلەرى بولسا، ءتىپتى ءۇنسىز...

نۇرعالي نۇرتاي

Abai.kz