استانا قالاسىندا قازاقستان رەسپۋبليكاسى مەملەكەتتىك باسقارۋ جۇيەسىنىڭ رەفورماسىنا سايكەس بىرنەشە مينيسترلىك پەن اگەنتتىكتىڭ نەگىزىندە جاڭادان قۇرىلعان ينۆەستيتسيالار جانە دامۋ مينيسترلىگىنىڭ القا ءماجىلىسى ءوتتى. وندا مينيسترلىكتىڭ وتكەن جەتى ايداعى ءىسى قورتىندىلانىپ، بولاشاق جوسپارلارى ورتاعا سالىندى. 300-دەن استام ادام قاتىسقان بۇل جيىننىڭ باعدارلاماسىندا كورسەتىلگەندەي جيىنعا قاتىسۋشىلاردىڭ جانە  بايانداماشىلاردىڭ بارلىعى قازاق ازاماتتارى. التى ادام بايانداما جاسادى. جيىن باستان اياق تەك ورىس تىلىندە ءوتتى.

بايانداماشىلاردان باسقا ءبىر ادامعا ءسوز بەرىلمەدى. وسى كەزدە «مەملەكەتتىك ءتىل» قوعامدىق قوزعالىسىنىڭ توراعاسى، بەلگىلى قوعام قايراتكەرى مۇحتار شاحانوۆ ميكروفونعا بارىپ بىلاي دەدى: يسەكەشەۆ مىرزا، سىزگە سۇراعىم بار. وسىندا قاتىسىپ وتىرعانداردىڭ بارىنە بۇگىنگى القا ءماجىلىسىنىڭ جۇمىس جوسپارى تاراتىلىپ بەرىلدى. جوسپار تۇگەلدەي ورىس تىلىندە جازىلعان. مەملەكەتتىك تىلدە ءبىر اۋىز ءسوز جوق. تىم قۇرىسا، بۇگىنگى جيىنداعى ءبىر بايانداما مەملەكەتتىك تىلدە بولمادى. تورالقادا وتىرعاندار دا جيىنعا قاتىسۋشىلار دا قازاق ازاماتتارى. بۇل مەملەكەتتىك ءتىلدى مەنسىنبەۋ ەمەس پە؟ ەندى مىنا ماسەلەگە نازار اۋدارالىق. رەسپۋبليكامىزداعى تەلەارنا باعدارلامالارىنداعى مەملەكەتتىك ءتىل 50 پايىزدان كەم بولماۋى كەرەك. بىراق كەيبىر تەلەارنالارداعى مەملەكەتتىك تىلدە حابار تاراتۋ 25, 20 ءتىپتى 15 پايىزعا دەيىن قۇلدىراعان. ءتورت مينيسترلىكتىڭ باسىن قوسقان، ءوزىڭىز باسقاراتىن جاڭا مينيسترلىك الداعى كەزدە دە مەملەكەتتىك ءتىلدى مويىنداماي ما، نەمەسە ەلدىك، ۇلتتىق مۇددە بيىگىنەن كورىنۋگە قام جاساۋى مۇمكىن بە؟

بۇل سۇراققا ينۆەستيتسيالار جانە دامۋ ءمينيسترى اسەت يسەكەشەۆ بىلاي دەپ جاۋاپ قايىردى: «سۇراعىڭىز دا، تالابىڭىز دا وتە ورىندى. بۇدان بىلاي مينيسترلىكتەگى بارلىق جيىندار تەك مەملەكەتتىك تىلدە وتەتىن بولادى!» ءمينيستردىڭ ءسوزىن جينالعان قاۋىم دۋ قولشاپالاقپەن قارسى الدى.

ىلە-شالا وسى جينالىس تۋرالى كەيبىر سايتتاردا قازاق، ورىس تىلدەرىندە  «مۇحتار شاحانوۆ ينۆەستيتسيالار جانە دامۋ مينيسترلىگىنىڭ جۇمىسىن سىنعا الدى» دەگەن ماقالا جارىق كورىپ، الەۋمەتتىك جەلىلەردە قىزۋ تالقىلانا باستاعان ەدى. كەلەسى كۇنى تۇگەلدەي الىنىپ تاستالىپتى. بىرەۋلەرگە ۇناماعان شىعار. بىراق، شىندىق ءار كەزدە سالتانات قۇرۋى كەرەك ەمەس پە؟

ەركىنبەك سەرىكباي

Abai.kz